Read Nyishi DOOGIN 13 Bible Online

DOOGIN 13 - Nyishi bible

DOOGIN 13

¹At Sw Mojesnvn benum,

²“Otuqcob ko bwwnam mam ngoqgab darxaq to. Nyi jaqkam hoo svdin jaqkam Israel nyiilug pengko ho otuqcob annwg kepo hoqgv lengco bov ngoqgv.”

³‍Ho Mojes nyiilungam benum, “Mwwgabto soq aal so nulv Ijipt hoqgv nyera-raasurb swwl dooknum nam hoqgv lengknum, hoggab At Swg atorbo alaq hoqgv nulam soq nyook so boolin pakun. Opap kiilwqnam mam dvma bvka.

⁴‍Soolo aalwg, Abib pool ho, nulv lengknum.

⁵‍Hoo hwdlo At Sw nulam Kanaan nyi tulug, Hittait nyi tulug, Amor nyi tulug, Hibitait nyi tulug, hoo Jebus nyi tulug gvda urab boolwq jinam, hogloq ham mwv nulug ab tulungam dingrwl apnam gvda ham jinam, hogloq gvda hv wtw lyuminko hoo ngola biqminko, no soq nyinam sam soq pool so nyila ka.

⁶‍Aal kvn go no opap kiilwq maanam wtwngam dvtayin, hoo kvn deen aalam At Sw gab durum dvtayin.

⁷‍Opap kiilwq maanam wtwngam aal kvn go dvtayin; opap kiilwqnam wtwngam noqg lvgab kaapa mvma bv, hoo opap kiilwqnam wtwngam noqg doogw ko nyook hookam kaapa mvma bv.

⁸‍No noqg ko tulungam hoq aalam betayin, ‘Hwdlo ngo Ijipt hoqgv lengyi kukho, soq sib At Sw ngam nyinum.’

⁹‍Hoo soq si noqg alaqho kaacin dvb nyinam akgob nyitayin hoo noqg vnyiqkv kvvgwnam akgob At Swg pvvbam noqg agam ho pvvtayin. Hoggab At Swg alaq ator hoqgv nam Ijipt hoqgv boolin pakun.

¹⁰‍Hoqgab no soq pvvb sam xuqlin kunam moodam vnyw vnywngam nyil dootayin.

¹¹“Hwdlo At Sw nam la noqg ab tulungam dingr kunam Kanaan nyi tulug gvda urab boa yukun, hoo ham nam jitayin,

¹²‍no At Sw gab otuqcob annwg kepo hoqgv lengco bo mwlwngam jibwql jilin tayin. Noqg svdin tulu hoqgv otuqcob nyega ko bwwnamv At Sw gab dootayin.

¹³‍Noqg svdam akwg otuqcob ko bwwnam mam no sviya ko lvgab pvlyw to, ho no ham pvlyw kuma baloqkam hoqg lwwpongam hiqswr to. Noqg otuqcob nyega ko vxy gab no pvlyw dvb nyitayin.

¹⁴‍Hoo hwdlo moodv haatayin noqg ko tulungv nam tox tayin, ‘Hog gab soq sam nyigdvn?’ No mwam betayin, ‘At Sw alaq ator hoqgv ngulam Ijipt hoqgv, raasurb nam hoqgv boolinum.

¹⁵‍Hwdlo Paro tamynv ngulam tolin maaikam, At Sw Ijipt gvdaho nyi tulungv la svdin tulug otuqcob ko bwwnam mam mengnum. Hoqgab nyega ko otuqcob annwg kepo hoqgv lengn boam ngo At Swn pwr jidwn, hvbmabde otuqcob ko tuup bwwnam tulungam ngo pvlyw pakun.’

¹⁶‍Soq si noqg alaqho maalo tuqtho noqg vnyiqkv kaagabl kaacinam akgob nyitayin, hoggab At Swg alaq ator hoqgv ngulam Ijipt hoqgv boolin pakun.”

¹⁷‍Hwdlo Paro nyiilungam wwm kunum, Palistan gvdab wk lamtangv koc sujaqkam, Pwnbov bulam hoq lamtab wg maanum. Hoggab Pwnbov benum, “Nyiilug mwwjam kwly mvma dvb hwdlo bulv nyob panam mam kaapel hoo Ijipt wkur tayi.”

¹⁸‍Hvbmabde Pwnbov nyiilungam Swlw Sa-svlo daiyag deexa-rara lamtab wgnum. Hoo Israel nyiilungv nyob padwb pwbw laikul Ijipt gvda hoqgv lengl wknum.

¹⁹‍Mojes mwv Josapg loobu tulungam naanum, hoggab Josap Israelwg ko tulungam piwr jwr-jwr dvb dingrwl begamv, “Pwnbov jvqtw jaqb nulam haal kaatayin, hoo nulv ngoqg loobu tulungam nulug lvgab soqgv baqlinl lengtayin.”

²⁰‍Hoo bulv Sukkot hoqgv deexa-rara bviywr Etamho hvvc kunv svmcw doonum.

²¹‍Hoo At Sw bulug otuqb aalam doomwq piuar gob nyitwl dooyuml yuml wgnum, hoo aiyam wm mur piuar gob nyitwl bulam huto jinam, ho bulam aal-aiyib lamtangam wdu mvnum.

²²‍Aalam doomwq piuarv hoo aiyam wm moily piuarv nyiilug otuq hoqgv wleq maanum.