Read Nyishi DOOGIN 14 Bible Online

DOOGIN 14 - Nyishi bible

DOOGIN 14

¹Ho At Sw Mojesnvn Benum,

²“Israel nyiilungam wkur gvdwl hoo Migdol gvla sa-svlo pengkog Pi-hahirot, gvla Baal-jepon otuqho svmcw mvl doom to; nulv sa-svlo ham tuurwq dvb svmcw mvto.

³‍Ho Paro betayin Israel nyiilungv, ‘Bulv gvda uraso gaqkar yidu dvn pv; hoggab deexa-rarangv bulam dootum nvba.’

⁴‍Hoo ngo Parog hangam kamtwr mvtayin, hoo mwv bulam ruqmin gvtayin, hoo ngo Parog yuunam mam la mwwg sipai tulungam, hoo Ijipt nyi tulungv ngo jaq At Swv hvl cengtayin.” Hoo bulv hvb nyiknum.

⁵‍Hwdlo Ijipt gv lvpw atam nyiilungv ken kuba hvl betam yin, hoo Paro la mwwg nyera tulungv nyiilug aoho mwwdar kunv bulv benum, “Soq sib hoggub ngulv nyitkun, ngulam nyera-paqn gob swwnbo Israelam ngulv tolin tuk nui yu?”

⁶‍Ho mwwg ceriotam mwv mwx-mvaq layil hoo mwwg sipai tulungam mwwg lvgab bool wgnum,

⁷‍hoo lwwx go hengka bo ceriot tulungam naanum hoo Ijipt hoqg asaq ceriot tulu mwlwho saab tulungam bulam wg mvnum.

⁸‍Hoo Ijipt gv lvpw at Parog hangam At Sw kamtwr dvb mvnum, hoo hwdlo Israel nyiilungv hwrcw jaqb wdul dooyikho, mwv Israel nyiilungam ruqmin gvnum.

⁹‍Ijipt nyi tulungv bulam ruqmin gvnum, Parog svpur tulungv hoo ceriot tulungv hoo mwwg svpur xarg bo nyi tulungv hoo mwwg sipaiyv bulam Pi-hahirotwg Baal-jepon haagaho sa-svlo svmcw ho ruqtin kunum.

¹⁰‍Hwdlo Paro hvvnwql hoodu yin, Israel nyiilungv bulug vnyiqkv piorabl kaapanum, hoo kaato, Ijipt nyi tulungv bulug kokwb daayob soomin gvnum, hoo bulv vcjaqb bosnum. Hoo Israel nyiilungv At Swn sogoql xabnum.

¹¹‍Bulv Mojesnvn benum, “Ijipt alo svma liik dooma tvlayam no ngulam soq deexa-rara gvda so boogin layil sim tagdvn? No ngulam Ijipt aloqkv boolin laikul hoggv nyig gvikun?

¹²‍Nam ngulv Ijipt alo soq sib bemanam yv, ‘Ngulam vpwb apaq tvb ngulv Ijipt nyi tulu gab bon nyil doos tayin hvma namyv’? Deexa-rara nyook so sim mam lingsam ngulv Ijipt nyi tulu gab bon nyil doonamv alyat ba.”

¹³‍Hoo Mojes nyiilungam benum, “Bos maabv, hwngkwb daqto, hoo kaato At Swg ywwlinam mam mwv nulgab soolo bonam nyitayin. Hoggab Ijipt nyi tulungam nulv soolog kaagdvn sam nulv nywywngam lokta kaapa kuram.

¹⁴‍At Sw nulgab nyob patayin, hoo nulv cooikab dooiya twqto.”

¹⁵‍At Sw Mojesnvn benum, “Hoggub no ngam xabdwn? Israel nyiilungam otuqb wto hvl beto.

¹⁶‍Noqg beqnyiangam lwwrab to, hoo noqg alaqkv ijin gvdwl Sa-svlog aoho idaq gvdwl hoo ham mwrpin suto, ho Israel nyiilungv sa-svlo ho ked pwtwho wnam hvb wtayin.

¹⁷‍Hoo ngo Ijipt nyi tulug hangam kamtwr dvb mvtayin ho bulug kokwb bulv wmin gvtayin, hoo ngo Paro nvla mwwg sipai tulungam, mwwg ceriot tulungam, hoo mwwg svpur xarg bo tulungam mviya tayin.

¹⁸‍Hoo ngo jaq At Swv hvl Ijipt nyi tulungv cengtayin, hwdlo ngo Paro, mwwg ceriot tulungam, hoo mwwg svpur xarg bo tulungam nootul mviya yin.”

¹⁹‍Ho Israelwg otuqb wdu gvnbo Pwnbog gumtwngv bulug langk yaab wkurnum, hoo doomwq piuarv bulug otuqb mwrl wnum hoo bulug langk ho daqnum,

²⁰‍hoq hv Ijipt nyi tulungv la Israel nyi tulug pengkob haanum. Hoo doomwq pual kan twdwq gob nyinum. Hoo hoqhv hvb kan ko-gab akwn hoqgv akwb wko-wpeq mins lama dvb ai yupw doonum.

²¹‍Ho Mojes mwwg alaqkv ijinl laqlin banv sa-svlo aoho idaqnum hoo At Sw sa-svlongam wkur mvdwb dou-cagag lywt dooiyam ai yupw lywm banv sa-svlongam ked pwtw gob mvnum, hoo issiv mwrpin sunum.

²²‍Hoo Israel nyiilungv sa-svlo ra lvpab ked diip ho wnam hvb wnum, issiv bulug laqc-lvqbwqb gurum daqnam hvb daqnum.

²³‍Ijipt nyi tulungv ruqmin gvnum hoo bulug kokwb Parog svpur mwlwngv, mwwg ceriot tulungv, hoo mwwg svpur xarg bo tulungv sa-svlo lvpa raab wmin gvnum.

²⁴‍Hoo ar komc At Sw wm piuar hoqgv kaalnum hoo Ijipt nyi tulug sipai tulungam doomwq piuar hoqgv kaalnum hoo Ijipt nyi tulug sipai tulungam bos soma vrram sodwb hurpnum,

²⁵‍bulug ceriot cekangam duqkar duqarl wla maadwb mvnum. Hoo Ijipt nyi tulungv benum, “Kuj ngulv Israel aga soqgv ken kuj, hoggab At Sw Ijipt nyi tulungam ceekol bul gab nyob pado.”

²⁶‍Ho At Sw Mojesnvn benum, “Noqg alaqkv ijin gvdwl sa-svlo aoho idaqto, ho Ijipt nyi tulungam, bulug ceriot tulungam hoo bulug svpur xarg bo tulug aoho issiv lumkurl lumlup tayin.”

²⁷‍Ho Mojes mwwg alaqkam ijinv sa-svlo aoho idaqnum, hoo ar yukho sa-svlongv otuq hoq tocwb tokur kunum. Hoo Ijipt nyi tulungv hoq hoqgv kelin dvb kenum, hvbmabde At Sw Ijipt nyi tulungam sa-svlog pengko ho joolwq xaanum.

²⁸‍Issiv lumkur kunv ceriot tulungam hoo svpur xarg bo tulungam, sipai mwlwngam lumlup kunum; Parog sipai mwlwngv bulam sa-svlo uraho wmin gvnboam akjijaqkam torm mvmanum.

²⁹‍Hvbmabde Israel nyiilungv ked pwtw ho wnam hvb sa-svlongam wpeqnum, issiv bulug laqc-lvqbwqb gurum daqnam hvb daqnum.

³⁰‍Ho At Sw Israelam hoq aalho Ijipt nyi tulug alaq hoqgv ywwlinum, hoo Israelv Ijipt nyi tulug sa-svlog uraho sinam mam kaanum.

³¹‍At Sw Ijipt nyi tulungam ator jaqb huqlw baql ceekonam mam Israelv kaanum, ho nyiilungv At Swn bosnum, hoo bulv At Sw nvla mwwg nyera Mojesnvn mwwjwnum.