Read Nyishi DOOGIN 15 Bible Online

DOOGIN 15 - Nyishi bible

DOOGIN 15

¹Ho Mojes la Israel nyiilungv soq bemin sam At Swn bijnum, hoo begamv, “Ngo At Swn bemin betayin, hoggab mwv twrkub mviya gvnkun; svpuram hoo mwwg xarn boam la mwv sa-svlo urab joolwq paku.

²At Sw ngoqg atorv hoo ngoqg beminv, hoo mwv ngoqg ywwlin bob nyipa ku; soq si ngoqg Pwnbov, hoo ngo mwam paqtayin, ngoqg abwg Pwnbov, hoo ngo mwam paqtayin.

³At Sw nyob panbo nyi akv; mwwg eminv At Sw.

⁴“Parog ceriot tulungam hoo mwwg sipaiyam mwv sa-svlo urab joolwqnum, hoo mwwg pwbw bo saab tulungam Swlw Sa-svlo ho yoqlwq mvknum.

⁵Sa-svlongv bulam lumlup gvnkun; bulv wlw hvbjaq ura jaqb yoqlwq nukun.

⁶At Swa, noqg lvqbwq alaqhv yuunam huqlwngv, At Swa, noqg lvqbwq alaqhv ceebiongam vmwq yumgub mvnum.

⁷Noqg koijaqb ator hoqgv noqg ceebio nyemaq tulungam mviya gvnkun; noqg hang lingtwrnam mam no kanam namlin do; hoqhv bulam am amro hvb guiyumnum.

⁸Noqg nyupum saqnam hoqgv issiv sulu hvb paaca dvn; diidwr issiv hwwpum hvb daqnum; sa-svlo haarangv ked diip hvb atornum.

⁹Ceebiongv benum, ‘Ngo ruqmin gvtayin, ngo ruqtin tayin ngo naareqnam mam mvpin-mvra tayin, ngoqg mwwbynam mam hoq hoqgv bwwr mvtayin. Ngoqg lyoqr orioqkam ngo seqlin tayin; ngoqg alaqkv bulam twrtayin.’

¹⁰Noqg dooi lvgab no miqnum; sa-svlongv bulam lumlup kunum; bulv koibo iss ho pitolv yoqlwqnam hvb yoqlwqnum.

¹¹“At Swa, pwnbo tulug pengko ho noqg hvb nyinbov hiyv doodwn? Hiyv noqg hvb swrdornyi dvb dvrwq kwrwqdvn, mwwc lama dvb swrdorxeq bonam nyidu dvn?

¹²Noqg lvqbwq alaqkam no ijinum; swcwngv bulam dvmeq gvnkun.

¹³“Hiyam no pvlyw kunum ham noqg tumanam abiv nyiilungam no bool wg paku; noqg ator hoqgv no bulam bool wg kunv noqg dvrwq gvdaho haam paku.

¹⁴Nyiilungv tapanum; bulv tvmdwrnum; Palistiya ho doonbo nyi tulungam bosiv mviya gvnkun.

¹⁵Sija Idomg peelo tulungv hang hodku; Moabg nyigbo tulungv tvmdwr hwqdu do; Kanaan ho doonbo nyi tulug haakamv jiqpaq nukba.

¹⁶Bosnamv la mwwdwqnamv bulug aoho haapa ku; hoggab noqg alaq atorl koijaqb bon nyigam gab, bulv sija godab wlw hvb nyido, At Swa, noqg nyiilungv wpeq maady deedib, noqg rvknum nyiilungv wpeq maady deedib.

¹⁷No bulam urab boatayin hoo bulam noqg atwg puutuho liitayin, At Swa, hogloq nyook ham noqg namlo gob no mvknum, At Swa, noqg alaqkv dvrwq namlongam mvko kunum.

¹⁸At Sw nwrba cwtam hoqgv nwrba gob pvvb bwwl doog tayin.”

¹⁹‍Hoggab hwdlo Parog svpur tulungv mwwg ceriot tulug lvgab hoo mwwg svpur xarg bo nyi tulungv sa-svlo urab wnum, ho At Sw sa-svlog issam bulug aoho lumlup mvknum, hvbmabde Israel nyiilungv sa-svlog lvpa raab ked pwtwho wnam hvb wknum.

²⁰‍Ho Aaron gv bwrm, Miriyam nyiqry benbo nyem gob nyinum, mwnwg alaqho tamborin tulungam bvvtwl, hoo mwnwg lvgab nyem mwlwngv tamborin tulungam bvvtwl mwnwg kokwb noso soomin gvnum.

²¹‍Hoo Miriyam soq bemin sam benum: “At Swn bemin to, hoggab mwv koijaqb yuudub mviya paku; svpuram la mwwg xarg bo tulungam mwv sa-svlo urab joolwq paku.”

²²‍Ho Mojes Israelam Swlw Sa-svlo hoqgv wrab gvknum, hoo bulv Sur deexa-rarab wknum. Bulv aal loum go deexa-raraho wknum hoo iss kaapa maanum.

²³‍Hwdlo bulv Mara ho haaikukam, bulv Mara hoqg issam kacaq ko-gab tuunyi kumanum; hoqgab hoqham Mara hvl eminum.

²⁴‍Hoo nyiilungv Mojesnvn haql begamv, “Hoggv ngulv twwtayin?”

²⁵‍Hoo mwv At Swn xabkinum, hoo At Sw mwam svvda ak kaakinum, hoo mwv ham naanv iss urab hurlwqnum, hoo issiv tiiswr kunum,

²⁶‍ho begamv, “No noqg Pwnbo At Swg benam yalam ruucw kwrgab baloqkam, hoo mwwg vnyiq kvvlwq koob kvtaqb nyib nyiloqkam, hoo mwwg gaml tulungam ruucw kwrgabl hoo mwwg pvvb tulungam pvvb nyiloqkam, Ijipt nyi tulungam vc-apy mvnam mam ngo nam akjijaqkam haam jiram, hoggab ngo jaq At Swv, nam mwpbov.”

²⁷‍Ho bulv Elim ho haaknum, hoqho camleq vnyi go issiv buqlinum hoo pvng svvnv kvn go daqnum, hoo bulv iss bviywrho svmcw mvl dooknum.