Read Nyishi DOOGIN 16 Bible Online

DOOGIN 16 - Nyishi bible

DOOGIN 16

¹Bulv Elim hoqgv wrab kunum, hoo Israelwg nyiilu mvqlwngv Sin deexa-raraho haaknum, hogloq hv Elim la Sinai pengko ho doonum, Ijipt gvda hoqgv lengknamv pool bvrnyi gola camleq loongob nyiknum

²‍Hoo Israelwg nyiilu mvqlwngv Mojes nvla Aaronnvn deexa-raraho ceekol sup punum,

³‍hoo Israel nyiilungv bulam benum, “Ijipt gvdaho At Swg alaqb ngulam mengpaq nyiloqkam al tvbv, hwdlo ngulv vdin pwcwngam la wtwngam dvdeq dvb dvmin dooyikho, hoggab nulv ngul mwlw Israel dvparam kanob soq deexa-rara so mengtab boolin pakun.”

⁴‍Ho At Sw Mojesnvn benum, “Kaato, ngo toloqkv wtwngam nyodob nulgab hol mvta dvn, hoo nyiilungv lvvgwb lengdvl aal looxig dvsam nookum mvto, ho ngo bulam pooka tayin, bulv ngoqg pvvb bekwb wdnvi yv ma wma dvn.

⁵‍Loox deen aalam bulv aal loonyi gab nookum hoo ham aal loo-loo gab mwx-mvaq aptayin.”

⁶‍Ho Mojes la Aaron nyiilungam benum, “Ariyum mam At Sw nulam Ijipt gvda hoqgv boolin bo akv hvl nulv cengtayin,

⁷‍hoo aram nulv At Swg yuunam mam kaapa tayin, hoggab nulug At Swn ceekol sup punam mam mwv tapa paku. Hoggab ngulv hiyv, ngulam nulv ceekol sup pudwn?”

⁸‍Hoo Mojes benum, “Hwdlo At Sw nulam ariyum mam vdin dvm dvb jitayin hoo aram wtw dvdeq dvb jitayin, hoggab At Sw nulug sup pudunam mam ho nulug mwam ceekol sup punam mam tapa paku—ngulv hoggv? Nulug ceekol sup punamv ngulam ma hvbmabde At Swn ceeko dvn.”

⁹‍Ho Mojes Aaronnvn benum, “Israelwg nyiilu mvqlwngam beto, ‘At Swg ogum hvvnwqto, hoggab mwv nulug sup pudunam mam tapa pakun.’”

¹⁰‍Hoo Aaron nyebia jaqb Israelwg nyiilu mvqlwngam agam goonum, bulv deexa-rara daiyab kaanum, hoo kaato, At Swg yuunamv doomwq ho daqlinum.

¹¹‍Hoo At Sw Mojesnvn benum,

¹²“Ngo Israel nyiilug sup pudunam mam tapa paku. Bulam beto, ‘Ariyum mam nulv vdin dvtayin, hoo aram nulv wtw lvgab dvdeq tayin. Ho ngo nulug Pwnbo At Swv hvl nulv cengtayin.’”

¹³‍Ariyumho pvta puxungv jarlin layil svmcwngam pumlupnum, hoo ar svmcwg taqg-loosaqho gumsiv hwryum tvl doonum.

¹⁴‍Hoo hwdlo gumsiv daaikun, deexa-rara aoho kaor-pijor dvb nyitwl wtwngam loptvl doonum, hoqhv tapam pamtaq hvb ked aoho doonum.

¹⁵‍Kokw so Israel nyiilungv ham kaapanum, ho bulv akwn-akwn bemin sunum, “Hoggv yu si?” Hoggab hoqhv hoggv yu ham bulv cengmanum. Hoo Mojes bulam benum, “Hoqhv wtwngv At Sw nulam dvm dvb jipa kun.

¹⁶‍Soq si At Swg gaml jiknamv: ‘Nyi vx-cwrv hog hwdwg dvla dvn, hwdgo dvsam dorkum to. Nulv vx-cwrv huc pvs vnyi (omar) gob naato, ho nyiingv okug mwwg tombu ho doodwn hvbkalam naato.’”

¹⁷‍Hoo Israel nyiilungv hvb nyiknum. Bulv tuugin koigo, hoo tuugin anyo go dorkumnum.

¹⁸‍Hvbmabde hwdlo huc pvs (omar) lvgab xikanamv hiyv xeq koi go dorkumnam hv laleq doomanum, hoo hiyv xeq anyo go dorkumnam hv pwwmab nyimanum. Nyiicwr-cwrxiv bulug dvgnam gob dorkumnum.

¹⁹‍Hoo Mojes bulam benum, “Hiyv kam dvsam aaram ar namgob pvvma bvka.”

²⁰‍Hvbmabde bulv Mojesnvn tamanum. Tuugin dvsam ar namgob pvvnum, hoo dvsam topumv pwwlwql hoo yaaknum. Hoo Mojes bulam hang lengnum.

²¹‍Mwv hog hwdgo dvla dvn, ar roxiam bulv dvsam dorkumnum; hvbmabde hwdlo doonyiv caalinl og yukun hoqhv jiqpaq kunum.

²²‍Loox deen aalam bulv aal loonyi gab wtwngam dorkum tayin, huc pvs (omar) vnyi gogab. Hoo rolungam nyigbo tulungv haanum hoo Mojesnvn betamnum,

²³‍mwv bulam benum, “Soq sib At Sw gaml jipa ku: ‘Aram aalv doonu dvb mwrwl apkunamv, At Swg dvrwqbo Doonu Aalv; hoggv nulv wtw mviyin dvn ham mvto, hoo hoggv nulv xwwnu yindwn ham xwwnul apto, hoo nyingongv dooi nyiloqkam ham aaram ar namgob pvvl apto.’”

²⁴‍Ho bulv Mojesg gaml bekjaqb bulug nyingongam bulv ar namgob pvvl apnum, dvsv naxa maanum, hoo dvsam topum gokam pwwlwq maanum.

²⁵‍Mojes benum, “Dvsam soolo dvto, hoggab soolo aal si At Sw Doonu Aalv; soolo nulv rongo alo soq dvsam kaapa ram.

²⁶‍Aal loox go nulv dvsam dorkum tayin, hvbmabde kvn deen aalv Doonu Aalv, ho dvsam hoglo kam kaapa ram.”

²⁷‍Kvn deen aalho nyiilu tuugin lvvgwb lengnv dvsam dorkum taab wnum, hvbmabde bulv akkam kaapa maanum.

²⁸‍Hoo At Sw Mojesnvn benum, “Hog hwd oyu go nulv ngoqg gamlam la pvvbam tvjwl pvvmab nyita yukun?

²⁹‍Kaato, At Sw nulam Doonu Aalam jipa kun; hoqgab loox deen aalam mwv nulam aal loonyi gab wtwngam jinum; ho kvn deen aalam mwwg dook hoqgv nyi akkam lvvgwb wlin mvma dvb benum.”

³⁰‍Ho nyiilungv kvn deen aalho doonum.

³¹‍Ho Israel nyiilungv ham manna hvl emin mingnum. Hoqhv taiyaq yvqmin hvb puulunum, hoo hoqhv ngola lvgab mviyonam wtw hvb ngvmciqnum.

³²‍Mojes benum, “Soq sib At Sw gaml jipa ku: ‘Hoq dvsam huc pvs (omar) sig nulug hotam-hotam xaqb pvvl apto, ho hwdlo ngo nulam Ijipt gvda hoqgv boolin yukho, ngo nulam deexa-raraho dvs jinam wtw ham bulv kaatayin.’”

³³‍Hoo Mojes Aaronnvn benum, “Pvtaq taqg naato, hoo hoqho huc pvs (omar) akgob manna lo vlwq apto, hoo ham At Swg agaho tvpto nulug hotam-hotam xaqb doom dvb.”

³⁴‍At Sw Mojesnvn gaml jinam hvb Aaron hoqham pvvb uddumg agaho pvvl apnum.

³⁵‍Hwdlo bulv bulug gvda doodyko ho haama deedib, Israel nyiilungv mannangam vnyw campy gob dvnum. Bulv Kanaan gvda vrrho haanam xaqb bulv mannangam dvnum.

³⁶(Omer si Ipa hoqg pac wyw gon).