Read Nyishi DOOGIN 17 Bible Online

DOOGIN 17 - Nyishi bible

DOOGIN 17

¹Israel nyiilu mvqlwngv Sin deexa-raraho At Swg gaml bekjaqb doonum, hoo Repidimho svmcw doanum, hvbmabde hoqho nyiilu gab iss twws doomanum.

²‍Hoqgab nyiilungv Mojes lvgab yolu dul hoo benum, “Ngulam iss twws jito.” Hoo Mojes bulam benum, “Hog gab nulv ngam yolu dudwn? Hog gab nulv At Swn pooka dvn?”

³‍Hvbmabde nyiilungv hoqho iss hvngwrnum, hoo nyiilungv Mojesnvn ceekol sup punum hoo benum, “Hog gab no ngulam Ijipt gvda hoqgv boolinum, ngulug ko tulungam hoo ngulug tuun-meengam iss hvngwrl sim dvb?”

⁴‍Ho Mojes At Swn xabkinum, “Soq nyiilu lvgab ngo hoggv nyitayin? Bulv ngam wlw hurx twqdkub mwx-mvaq do.”

⁵‍Hoo At Sw Mojesnvn benum, “Nyiilug agab wpeqto, Israelwg nyi axa meeg noqg lvgab bool wgto, hoo noqg alaqho no Nail pobungam jwwnan beqnyiangam noqg lvgab bwwl wgto.

⁶‍Kaato, ngo nam Horeb alo wlw haabo gol daqm tayin, hoo wlwngam jwwdin to, hoo hoq hoqgv issiv lengtayin, hoo nyiilungv twwtayin.” Hoo Mojes Israelwg nyi axa tulug kaagaho, hoqhvb nyinum.

⁷‍Hoo mwv hoq nyookam Massa la Meriba hvl eminam goqnum, hoggab Israel nyiilungv yolu doonum, hoo bulv At Swn pooka nv begamv, “At Sw ngulug pengko so dood nvi yv ma dooma dvn?”

⁸‍Ho Amalekv Repidimho haalayil Israelam nyob panum.

⁹‍Ho Mojes Josuanvn benum, “Ngul soqgv nyi loq xuqlin to, hoo wgdvl Amalek nyi tulungam nyob padwb. Aaram mam ngoqg alaqso Pwnbog beqnyiangam bvvtwl puutu tol daqtayin.”

¹⁰‍Ho Mojesg benam hvb Josua mwv nyiknum, hoo Amalek nyi tulungam nyob panum, ho Mojes, Aaron, hoo Hur yorn puutu aob caanum.

¹¹‍Hwdlo Mojes mwwg alaqkv idu tvl dooikam Israel nyiilungv bulam mviyanum, hoo hwdlo mwv mwwg alaqkam laql yin Amalek nyi tulungv bulam mviyanum.

¹²‍Hvbmabde Mojesg alaqkv vpykunum, ho bulv wlw naalayil mwwg alaqkam kotwrl apnum, hoo mwv hoq aoho laqdaqnum, ho Aaron la Hur bunyiv mwwg alaq laqg-laqsab nwwtorl doog yaanum. Ho mwwg alaqkv idu tvl doonyi haanam gob doodunum.

¹³‍Hoo Josua Amalek nvla mwwg nyi tulungam lyoqr orioq lvgab nyob paiya kunum.

¹⁴‍Ho At Sw Mojesnvn benum, “Soq sam mwwgab dvb kitap ak xeqto hoo ham Josuag nyuru tagaho ritam to, ho ngo Amalek nyi tulungam nyodo niikum soqgv twrkiq-twrmal twrpaq tayin.”

¹⁵‍Hoo Mojes hoqho yugw ak mvnum hoo ham At Sw ngoqg jetamv hvl emin goqnum,

¹⁶‍ho begamv, “At Swg pvlw hoqgv alaqkv! At Sw Amalek nyi tulungam hotam-hotamb nyob patayin.”