Read Nyishi DOOGIN 18 Bible Online

DOOGIN 18 - Nyishi bible

DOOGIN 18

¹Midianwg nyub Jetro, Mojesg at akv Mojes nvla mwwg Israelwg nyiilu gab Pwnbog naleqgo bon nyinam mam tapanum, ho hoggub At Sw Israelam Ijipt hoqgv boolin kunum ham tapanum.

²‍Jetro, Mojesg at akv, Mojes nywxw Jipporanvn boa jinum, Mojes mwnwn mwnwg ab-ann nammwb kanamnum,

³‍mwnwg ko tuup vnyig lvgab kanamnum. Akwn hoqgv eminv Gersom (hoggab mwv benum, “Ngo nyoodo gvda si nyiogy keal doonum”),

⁴‍hoo akwn hoqgv eminv Eliejer (hoggab mwv benum, “Ngoqg abwg Pwnbov ngam svka pa, hoo ngam Parog lyoqr orioq hoqgv ywwlinum”).

⁵‍Jetro, Mojesg at akv mwwg kongam la mwwg nywxwngam boolayil deexa-rara Pwnbog puutu Mojesg svmcw dookho haanum.

⁶‍Hoo mwv Mojesnvn agam bilwqnum, “Ngo, noqg at Jetro, ngo noqg dookub noqg nywxwngam la mwnwg ko tuup vnyiam mwnwg lvgab boa gviyin,”

⁷‍Mojes mwwg at akam wrwqtab lengnum hoo dumpo pvxwl hoo mwam moopupnum. Hoo bulv akwn-akwnwg al-koram toxnum hoo tombu urab haanum.

⁸‍Ho Mojes mwwg at akam At Swg Israelwg nyiilu gab Paro nvla Ijipt nyi tulungam, ho bulug lamtaho vs-axaq haaknam mam, hoo At Sw hoggub bulam ywwlin kunam, hog mwlw nyiknam ham betamnum.

⁹‍Hoo Jetro At Swg Israel gab albo hog mwlw nyiknam ham hemp mwwpanum, hoggab mwv bulam Ijipt nyi tulug alaq hoqgv ywwlinum.

¹⁰‍Jetro benum, “Hiyv nulam Ijipt nyi tulug alaq hoqgv hoo Parog alaq hoqgv hoo Ijipt nyi tulug alaq uraho doonbo nyiilungam ywwlin bo At Sw xinam jaqkv.

¹¹‍Sija ngo cengpa ku, At Sw mwlw pwnboam koi yaan bogo, hoggab nyiilungam bulv kwr-korwl nyijab-nyiyiqnum.”

¹²‍Hoo Mojesg at, Jetro boyuqnam akiam bwa layil hoo Pwnboam pwr jinum; hoo Aaron la Israelwg nyi axa tulungv Mojesg at dookub haal Pwnbog agaho wtw dvbamnum.

¹³‍Loogwn so Mojes nyiilungam twwiyw padwb doanum, hoo nyiilungv Mojesg taqg-loosaqb ar hoqgv daqgab layil ariyum namgub daqnum.

¹⁴‍Hwdlo Mojes hog mwlwngam mwv akin nyiilu gab nyidunam mam Mojesg at akv kaapa tvl, mwv benum, “Hoggv si no nyiilu gab no aro nyidul doodwn? Hog gab no vp-cwkwb doodwn, hoo nyiilu mwlwngv noqg taqg-loosaqb ar hoqgv ariyum namgob daqm dvn?”

¹⁵‍Hoo Mojes mwwg at akam benum, “Hoggab nyiilungv Pwnbog mwwlwqkam cengtab ngoqg dookub haadwn;

¹⁶‍hwdlo bulv yolu-swcin dooikam, bulv ngoqg dookub haadwn hoo ngo bulug pengko lo twwiyw padwn, hoo ngo bulam Pwnbog pvvbam la mwwg gamlam cengm gvdwn.”

¹⁷‍Mojes at akv mwam benum, “Hoggv no nyidu gvdwn hv kvtaq yoob nyima.

¹⁸‍No la noqg lvgab nyiilu yvnbov nyelin-dors tayin, hoggab noqgab nyisv vgw looda do. No sam vpwb hwdlo kam nyila ram.

¹⁹‍Sija ngoqg tomswrnam sam tato; ngo nam hoggub nyitayin ham betam tayin, Pwnbov noqg lvgab dooba nvka! No nyiilu kwlib Pwnbog aga tolo haato hoo bulug bvrwqkam Pwnbon betam jito,

²⁰‍hoo no bulam pvvbam la gaml tulungam beol betam to, hoo bulug lamta wta kongam hoo bulv hoggv nyidwb nyidwn ham bulam cengm dvb jito.

²¹‍Hoq aoho, nyiilug pengko hoqgv pwbw bo nyi loq xuqlin to, hiyv Pwnboam bosdvn, hiyv mwwgw dvb nyidwn hoo kam nanam mam oyum boloq, hoo hvkwg nyi tulu ham nyiilug lwwywg aoho, lwwg aoho, camng aoho, hoo wyw aoho peelo gob mvpto

²²‍Hoo bulam mood vxiam nyiilungam twwiyw pal yvtw-yakam mvmto. Koibo bvrwq arongam bulam noqg dookub haag mvto, hvbmabde anyo-amaq bvrwqkam bulam atam pvvb mvmto. Ho hv noqgab nyingaml nyijub tayin, hoo bulv noqg lvgab vgwngam baqba tayin.

²³‍Soq sam no nyim nyiloqkam, Pwnbov ngam tomswr tayin, no la soq nyiilu mwlw si nyelin-dors kamram hvbmab bulug dookub swrsob wtayin.”

²⁴‍Ho Mojes mwwg at ak hoqg tomswrnam mam tanum hoo mwv hoggv betamnum ham mwlwngam mwv nyinum.

²⁵‍Mojes Israel mwlwg pengko hoqgv pwbw bo nyiilungam xuqlinum hoo bulam lwwywg aoho, lwwg aoho, camng aoho, hoo wyw aoho peelo gob mvpnum.

²⁶‍Hoo bulam mood vxiam nyiilungam twwiyw pal yvtw-yakam mvmnum. Vs-axaqbo bvrwqkam bulv Mojes dook ho haagnum, hvbmabde anyo-amaqbo bvrwqkam bulv atv pvvb mvknum.

²⁷‍Ho Mojes mwwg at akam wwm kunum, hoo mwwg atwg gvdab mwv wknum.