Read Nyishi DOOGIN 2 Bible Online

DOOGIN 2 - Nyishi bible

DOOGIN 2

¹Lebi nam hoqgv wnv mwwg nywxw gab Lebi nyem ak naanum.

²‍Nyem hv ko gvnv hoo nyega ko bwwnum, hoo hwdlo mwn kongam kaanamv anya jaqnum, ho mwn mwam pool borum go kvsil ciigaqnum.

³‍Hwdlo mwn mwam kvsil cwwla kuma yin, mwn mwwg gab tobum hoqgv poa ak naanum hoo ham katra la takin lvgab hiqcubl hiqtumnum. Mwn kongam joolayil poaho joolwqnum hoo ham pobu sugurg rapeq peqtaqho joopnum.

⁴‍Hoo mwwg bwrm akv aado ho doqtu tvl hoggv mwam nyin badwq mwwnv kaayal daqnum.

⁵‍Ho Parog nyem kov pobu ho gv hurs taab haanum, hwdlo mwnwg nyem nyijwr ak pobu sugurho wl yvnum. Mwn poa ak rapeq peqtaqho kaapanum hoo mwnwg paqn nyem akam kanamnum, hoo mwn ham naanum.

⁶‍Hwdlo mwn hoqham mvko yin, mwn ko ak kaapanum, hoo kaato, ko ak xobdul doonum. Mwn mwam aya kaapanum hoo benum, “Soq si Hibru ko ak go.”

⁷‍Ho mwwg bwrm akv Parog nyem koam benum, “Ngo wgdvl noqgab nwbw loq ak Hibru nyem tulu hoqgv ko sam noqgab som dvb goqta yv?”

⁸‍Hoo Parog nyem kov mwnwn benum, “Wn.” Ho nyijwr akv wnv ko hoqg annam nwbwb goqnum.

⁹‍Hoo Parog nyem ko akv mwnwn benum, “Soq ko ak sam baqg dvl hoo mwam ngoqgab sokam to, hoo ngo noqg sojongam jitayin.” Ho nyem akv koam naalayil mwam soknum.

¹⁰‍Hwdlo kov akam yukam, mwn mwam Parog nyem ko dookho baqa jinum, hoo mwv mwnwg nyega ko gob nyiknum. Mwn mwam Mojes hvl eminum, “Hoggab mwn benum, “Ngo mwam iss hoqgv joolin pan.”

¹¹‍Aal loog golo, hwdlo Mojes akam yukho, mwwg nyiilug dookub mwv lengnum hoo bulug vgwngam kaapanum, hoo mwwg nyiilu ak, Ijipt nyiingv Hibru nyi ak jwwdunam mam kaapanum.

¹²‍Mwv taqg-loosaqb kvviyiq-kaaxeql kaaka tvl nyi akkam kaapa maaikam, mwv Ijipt nyiam jwwtabnum hoo mwam xuqx uraho hoqlynum.

¹³‍Hwdlo mwv aal loogwn so gaqlinum, kaato, Hibru nyi vnyi go yolu paiyaq minsul doodunum. Hoo mwv nyixiaqbo nyi akam benum, “Hog gab no noqg ajinam jwwdwn?”

¹⁴‍Mwv birwqnum, “Hiyv nam lvpw atwg ko bvla ngulug pengko so hvvky mvnum? No ngam Ijipt nyi ham mengnam hvb mengta dvn yv?” Ho Mojes bosnum, hoo mwwnum, “Jvqtw jaqb bvrwqkam cengpor paku.”

¹⁵‍Hwdlo Paro ham tapa kuba lo, mwv Mojesnvn mengdwb meegaq tayin. Ho Mojes Paro hoqgv keleq kunv Midianwg gvdaho doonum. Hoo mwv iss sokum golo doanum.

¹⁶‍Midianwg nyub akv nyem ko kvn go doonum, hoo bulv haanv uppumho iss suqlwq layil bulug abwg sviya pvtwngam iss jinum.

¹⁷‍Sviya rvky bo tulungv haanv bulam ruqpaqnum, hvbmabde Mojes bulam mvturnv hoo ywwlinum, hoo bulug sviya pvtwngam iss twwmnum.

¹⁸‍Hwdlo bulv namho haaikun bulug ab Reuel, mwv benum, “Hog nyitwl soolo nulv nammwb nyebia jaqb haapa kun?”

¹⁹‍Bulv benum, “Ijipt nyi ak ngulam sviya rvky bo alaq hoqgv mvturl ywwlinum hoo ngul gab iss tuqlin jinum hoo sviya pvtwngam iss jinum.”

²⁰‍Mwv mwwg nyem ko tulungam benum, “Mwv hoglo? Hog gab nulv nyi ak ham apaq peen? Mwam goqta, ho mwam dvs loq dvmto.”

²¹‍Hoo Mojes nyi akwg namho doomin gvdkub mwwbwq kunum, hoo mwv Mojesnvn mwwg nyem ko Jipporanvn jiknum.

²²‍Mwn nyega ko ak bwwnum, hoo mwwg eminam mwv Gersom hvl mingnum, hoggab mwv benum, “Ngo nyoodo gvda so nyiody boa kunum.”

²³‍Aalv vigo kokw so Ijipt gv lvpw atv siknum, hoo Israel nyiilungv bulug raasur gob hentwr henl swwgam gab sigin ginl hoo svka kodwb xabnum. Nyera-raasurb swwnam hoqgv ywwlin tvbwk hvl bulug xabnv Pwnbog dooktv hvvcnum.

²⁴‍Hoo Pwnbov bulug sig ginam mam tapanum, hoo Pwnbov Abraham lvgab, Aisak lvgab, hoo Jakub lvgab mwwg pvvb birnam mam mwwpanum.

²⁵‍Pwnbov Israel nyiilungam kaapanum—hoo Pwnbov cengnum.