Read Nyishi DOOGIN 21 Bible Online

DOOGIN 21 - Nyishi bible

DOOGIN 21

¹“No soq pvvb tulu sam bulug gab mvl aptayin.

²‍Noqg Hibru raasur akv rvikam, mwv vnyw nywx go nam bon nyij tayin, hoo kvn deen vnywngam no mwam danyib apaq tayin.

³‍Mwv vpwb haap nyiloqkam, mwv vpwb wtayin; mwv nyem naatwl haap nyiloqkam, mwwg nywxwngv mwwg lvgab wmin tayin.

⁴‍Mwwg atv mwam nywxw nvvjtvl hoo mwn mwwgab ko doob nyiloqkam, mwwg nywxwngv la kongv mwwg at akgab dootayin, mwv vpwb lengta yukun.

⁵‍Hvbmabde raasur ak atv bibwql, ‘Noqg atam, ngoqg nywxwngam, hoo ngoqg kongam, ngo aby dvn; ngo tolin kunw ma hvl bebnyiloqkam,’

⁶‍ho mwwg atv mwam Pwnbog agaho boatayin, hoo mwam viyap maalo yabg swwrw lwkw ho boatayin. Hoo mwwg atv mwwg nyurungam peqs lvgab hwko tayin, hoo mwwg atgab mwv nwrba xaqb raasur swwtayin.

⁷“Hwdlo nyi akv mwwg nyem koam paqn ak gob puqknamv, mwn raasur akam tolinam hvb tolin kuram.

⁸‍Mwnwn mwwgab mwwl rvstai nv hvbmab mwnwg at akv mwnwn xumt mabnyiloqkam mwnwg atwg ab-annam mwv pvlyw mvtayin. Mwv mwnwn nyoodo nyiilungam puqsiq nyoram, hoggab mwv mwnwn doog jikma.

⁹‍Mwv mwnwn mwwg ko tuup gab rvpnyiloqkam mwv mwnwn nyem ko hvb pvvtayin.

¹⁰‍Mwv atv asaq nywxw ak naak baloqkam, mwv mwnwg dvsam, mwnwg vjam, ho mwn hvraqb nywxw xwwdab nyitwl dvs-naasam naatayin.

¹¹‍Hoo mwv soq pagoq goqoum sam mwn gab nyima baloqkam, sooram jikur maab mwn danyib wta yukun.

¹²“Hiyv lajaqkam nyiingam jwwtwl sim baloqkam mwam kam sim tayin.

¹³‍Hvbmabde mwam mingduml mwv mengma, hvbmabde Pwnbog alaqho mwv haak baloqkam, ho noqgab ngo kigwl dook nyook loq mvptayin.

¹⁴‍Hvbmabde nyi akv mwv nyi asaqkam mingdum mengpel, ngoqg yugw ho kea sujaqkam no mwam naato, ho mwv siyi nvpv.

¹⁵“Hiyv lajaqkam mwwg ab-annam jwwn boam mwam kam sim tayin.

¹⁶“Hiyv lajaqkam nyi akgam dvco layil hoo mwam puqb nyiloqkam, hoo hiyv lajaqkam ham gumn doog boam mwam kam sim tayin.

¹⁷“Hiyv lajaqkam mwwg ab-annam been boam mwam kam sim tayin.

¹⁸“Hwdlo nyi tulungv yolu dumin sul nyi akwn hv nyi akwn wlw maalo mwwg alaq lvgab yumtum tvl jwwnam nyi ak hv simab mwwg namho vc geql karpe kul,

¹⁹‍ho nyi ak hv lokta gorabl hoo mwwg beqnyia lvgab wkar kubnyiloqkam, hiyv mwam jwwn bo akam laqm-baqm mvmabv; hvbmabde vcbo akwg mood-mooma doopaqnam mam la vcv poiyiq maady deedib mwam kaal bwqm-yaqm to.

²⁰“Hwdlo nyi akv mwwg nyera-paqnam dvvcw lvgab jwwnamv nyera-paqnv mwwg alaqho sibnyiloqkam, mwam kwly naatayin.

²¹‍Hvbmabde raasurv aal loog loonyi gob doobnyiloqkam mwam kwly naaram, hoggab raasuram mwwg twngkv rvnum.

²²“Hwdlo nyi vnyiv jwwmin sul hoo ko gvnbo nyem ak mwjwq baloqkam, ho mwnwg kongam un-tar gvmab tordwb bwwlin baloqkam mwnwn mwjwqbo akv hoggub nyijaqkam xootwr jidwb nyitayin, hoggv nyem akwg nyolv mwam kotayin ham nyegam tulungv hwwbwq layil jitayin.

²³‍Hvbmabde un-tar gvl sik baloqkam no swwgam swwgkalam jidwb nyitayin,

²⁴‍vnyiqkam vnyiqkalamb, exiam exy kalamb, alaqkam alaqkalamb, lvpiangam lvpia kalamb,

²⁵‍biaqnam mam biaqnam kalamb, unnam-unkalamb, jwwnam mam jwwnam kalamb nyilwq dvb nyitayin.

²⁶“Hwdlo nyi akv mwwg nyera-paqnam jwwl vnyiqkam jwwpiq baloqkam, bulug vnyiqkv piqgam gab, mwwg nyera-paqnam mwv tolin tvl wwm taikun.

²⁷‍Nyi akv mwwg nyera-paqnwg exiam jwwgeq baloqkam, bulug exiam gab, mwwg nyera-paqnam mwv tolin tvl wwm taikun.

²⁸“Hwdlo svv hvvbv nyi ak sidwb nwqx baloqkam, hvvb ham wlw hurx tayin, hoo hoqg vdinam dvram, hvbmabde hvvb atv hog akam jidwb nyiram.

²⁹‍Hvbmabde hvvbv nwqga bov nyi nwql yvi nyiloqkam, hoqg hvvb atam beol ham hingkib rwwp tvk hvl betayin, hvbmabde hoqhv nyi ak nwqx baloqkam, hvvbam wlw hurx tayin, hoo hoqg atam kam sim tayin.

³⁰‍Hvbmabde mwam nyi akwg swwg gab soor kob nyiloqkam, ho mwam hoggv soor kotayin mwwg swwg kwly gab mwv pvlyw tayin.

³¹‍Hoq svv hvvbv nyi akwg kongam nwqx baloqkam, mwam kam sim tayin hoo soq pvvb akin sam nyin tayin.

³²‍Svv hvvbv nyera-paqn ak nwqx baloqkam, hoqg atv bulug at-ai akam rup sikil cammum go jitayin, hoo hvvb ham wlw hurx tayin.

³³“Hwdlo nyi akv ung mutumnam mam mvkol ho hwdlo nyi akv ung dutwl hoo ham mutum maagam gab hvvb maalo svdam ak hoq ungngub yoqlwq baloqkam,

³⁴‍ung dunbo atv hoqg kwliam jidwb nyitayin. Mwv hoqg atam twngk jitayin, hoo sinbo svdin hv mw gvku.

³⁵“Hwdlo nyi akwg hvvbv akwg hvvbam nwqx baloqkam, ho bulv tornbo hvvbam puql kviyw swcwb naapin sutayin, hoo bulv sinbo svding vdinam xaqc sul naatayin.

³⁶‍Ho hvvb ham otuq hoqgv nwqga bob cengtwl, hoqg hvvb atv ham hingkib rwwp maab nyiloqkam, mwv hvvb kwliam hvvb jitayin, hoo sinbo svdin hv mw gvku.