Read Nyishi DOOGIN 22 Bible Online

DOOGIN 22 - Nyishi bible

DOOGIN 22

¹“Nyi ak hvvb maalo sviya dorg dvco layil hoo ham patabl puqnyiloqkam, mwv hvvb dorkin gab dorng go jitayin hoo sviya dorkin gab dorpy yaag jitayin.

²“Dvco bo akam dvco codu dvb kaapal mwam jwwx baloqkam, mwwgab hiyam kam pw-hwwram,

³‍hvbmabde mwv doonyi caalin namgub dook baloqkam, mwv dvconam kwliam jidwb nyitayin. Mwv hoggub nyijaqkam kwliam hiqkur dukub nyitayin. Mwv hog dooma baloqkam mwam mwwg dvco kogab puqtayin.

⁴‍Dvco coknam hvvb hv, ho svdam hv, ho sviya hv, mwwg lvgab daqk mabnyiloqkam, mwv leqbaq tukul jikur taikun.

⁵‍Nyi akv rongo maalo roo boolungam tuun-meengam roolwq tvl dvm baloqkam, ho mwwg svdinv nyi asaqg rongongam dvbaloqkam, mwv mwwg tuun-mee dvgo gab kwliam mwwg rongo maalo roo boolu hoqgv jidwb nyitayin.

⁶“Nyi akv ww hwwtaqkam wm rwlwqnamv nyi asaqg am boqkumnam mam, ho rongo ho am doqdu boam wmv gubnyiloqkam, hiyv wm rwlwqbo akv pwbwb kwliam jikur dvb nyitayin.

⁷“Nyi akv mwwg twngk maalo dupum-dvrab pam mwwg door-doopwngam tingl apnam mam hoqg nam hoqgv dvco baloqkam, ho dvco boam kaapal hwwnwq baloqkam, mwv dvco kunam ham leqbaq tvl jikur dvb nyitayin.

⁸‍Dvco boam kaapa kuma baloqkam, tingwnam akv Pwnbog ogumho haatayin ho mwwg alaqkv mwwg door-doopwg gumnam idaq jima hvl dingdu dingtayin.

⁹‍Nyi tulungv hvvb dor gab, svdam dor gab, sviya dor gab, kamt rumg gab, ho dupum-dvrab niinbo tulu gab ceql gaqyaq mins baloqkam, soq sam bem to, ‘Soq sib nyim to,’ dvpar vnyi-vnyiv Pwnbog agaho haatayin. Ho hiyam Pwnbov haqpaq tayin hv mwwg door-doopwngam leqbaq tvl jikur jitayin.

¹⁰“Nyi ak mwwg door-doopwngam svdam maalo, hvvb, ho sviya ho tuun-meengam gootu tingpnamv sibnyiloqkam, hoo un-tar gvbnyiloqkam ho ham nyi kaapa maab boopaq baloqkam,

¹¹‍At Swg emin lo bunyig pengko ho pw-hwwdar mvdwb dingtayin ho mwwg alaqkv mwwg door-doopwg gumnam idaq jima hvl dingtayin. Tuun-mee atv ham loorwq tayin hoo mwv hoq tulu kwliam naadwb nyiram.

¹²‍Hvbmabde mwwg hoqgv dvco baloqkam, mwv hoqg atam kwly jidwb nyitayin.

¹³‍Dwr-peengv ham cexbaloqkam, hvvky gab cexnam mam mwam baqa mvto. Hoggv cexkunum ham mwv kwly jidwb nyiram.

¹⁴“Nyi akv mwwg door-doopw hoqgv tuun-mee ceenamv hoqg atv dooma dookho un-tar gvl ho sibnyiloqkam, mwv bumpwb kwliam jikur dvb nyitayin.

¹⁵‍At Swv hoqg tuun-mee lvgab doob nyiloqkam, mwv ham kwly jikur dvb nyiram; hoggab hoqham ceenum, ho hv ceenam twngk hiqnam ura haanum.

¹⁶“Nyi akv mvvngam mam pwqlayil mwnwn doog baloqkam, mwnwg sooram mwv jidwb nyitayin hoo mwnwn mwwg nywxwb mvtayin.

¹⁷‍Mwnwg abv mwnwn mwam twrtwr looda jiram hvbnyiloqkam, mwv mvvngam kwlib homyin kalam dvb soor jidkub nyitayin.

¹⁸“No sootu tunbo nyiingam swwm mvmabv.

¹⁹“Hiyv lajaqkam svdin lvgab yuba-karbo boam mwam sim tayin.

²⁰“Hiyv lajaqkam At Swg lvvgho, asaq pwnboam pwr jibnyiloqkam hv twrdwb pwr jidwn.

²¹“No nyoodo nyiam nyijab-nyiyiql almab nyimabv, hoggab nulv kam Ijipt ho nyoodo nyiib nyinum.

²²‍Nulv xwwmiam la ab dooma bo koam nyinyi-nyiyal hentwr dvb nyimabv.

²³‍Nulv bulam nyinyi-nyiyal hentwr dvb nyib nyiloqkam bulv ngam xabkin tayi, ngo hoggub nyijaqkam bulug xabnam mam tapa tayin,

²⁴‍hoo ngoqg hang lingtwrnamv bioqlin tayin, hoo ngo nulam lyoqr orioq lvgab mengtayin, hoo nulug nywxw tulungv xwwmib nyitayin hoo nulug ko tulungv ab doomab hopinb nyitayin.

²⁵“No ngoqg jwwgwbo nyiilungam twngk ciirwq baloqkam, no mwam twngk ciirwq keenbo hvb nyimabv, hoo no mwwg hoqgv leqbaql naamabv.

²⁶‍Noqg door-doopwg kamt vjam huttab ap baloqkam, no ham mwam doonyi haama taab jikur dvb nyitayin,

²⁷‍hoggab hoq aro hv mwwg vj pamnamv, hoo hoqhv mwwg vjv mwwg gvvngam pomlup nanv; mwv hoggv pamtwl yubn tayin? Hoo mwv ngam xabnyiloqkam, ngo tapa tayin, hoggab ngo aya mwwpa bo akv.

²⁸“Pwnboam alman agam goomabv, ho noqg nyiilungam pvvb bwwl doogbo akam beemabv.

²⁹“No vly noocumnam hoqgv la roo alangam mvlinam hoqgv aky jidwb dugub doomabv. Noqg otuqcob nyega ko bwwnam tulungam ngam jitayin.

³⁰‍Hoq hvbkalam noqg svv hvvbam, hoo noqg sviya kongam aal kvn go sviya ann lvgab daqm to; ho piin deen aalam ham ngam jidwb nyitayin.

³¹“Nulv ngoqgab darxaq dvb nyitayin. Hoqgab nulv nyoro alo dwr-pee cexnam vdinam dvdwb nyiram; nulv ham iky tulungam jooj laka.