Read Nyishi DOOGIN 23 Bible Online

DOOGIN 23 - Nyishi bible

DOOGIN 23

¹“No xaalyo pui jimabv. No nyic-nyiabo lvgab nyimin gvl xaalyo hvvky jimabv.

²‍No mvqlwngv almab bon nyik ho haamabv, ho mvqlwngv almab nyel maqparho hvvky jikho no jimin gvl jvqtwngam biwql tvl beya mvmabv,

³‍ho no jwwgw bo nyi ak gab nyel maqparho mwwsw maabv.

⁴“Noqg ceebiog svv hvvbv maalo mwwg svdamv gaqxarl wl yvbnyiloqkam, no ham mwam bookurl boa jitayin.

⁵‍Hiyv nam hang baqnbog svdamv vgw baqtwl geqp baloqkam no mwam kvvmw peel wleq dvb nyiram; no mwwg lvgab ham seerab mingdvb nyitayin.

⁶“Mwwg jwwgw ko-gab, no jvqtwngam nyel maqparho biwql tvl beya mvmabv.

⁷‍Xaalyob timbnam mam aadob pvvto, hoo danyi nyiam la lootw bo nyiam mengma bv, hoggab ngo nyic-nyia boam apaqram.

⁸‍Hoo no kam naamabv, hoggab kamv dvrwqb kaanam mam nyiqmv mvdwn hoo jvqtw boam nyik-nyia tvl yuupaq mvdwn.

⁹“No nyoodo nyiam nyijab-nyiyiq maabv. No nyoodo nyi akwg hangam cengdwn, hoggab nulv Ijipt gvdaho nyoodo nyiib nyinum.

¹⁰“Vnyw nywx gob noqg gvda kedam no rongo mvtayin,

¹¹‍hvbmabde kvn deen vnywngam no ham apaqtvl doonu mvtayin, ho hoqho hog swwlin baloqkam ham noqg jwwgwbo nyiilungam dvmto; hoo bulug apaqnam mam nyorog svdin tulungam ham dvmto. Hoq hvbkalam noqg roo boolungam, hoo olib svvn boolungam kam hvb no nyimto.

¹²“Aal loox go no bonam nyitayin, hvbmabde kvn deen aalam no doonu tayin; ho noqg hvvbam hoo noqg svdam mam doonu mvto, hoo noqg paqnwg ko tuupam, hoo nyoodo nyiam yemol doonu mvto.

¹³“Ngoqg benam mwlw sam no ruucw kwrgab laka, hoo asaq pwnbog benam mam tama bvka, ho noqg nvbcwr hoqgv tapa mvmabv.

¹⁴“Vnywngam luum go ngoqgab no xilo soominl durum dvtayin.

¹⁵‍No Opap kiilwq maab xilo sool wtw dvtayin. Ngo nam gaml jiknam hvb, no opap kiilwq maanam wtwngam Abib poolwg mood xipko ho aal kvn gob dvtayin, hoggab hoqho no Ijipt hoqgv lengknum. Alaq asarb nyi akjijaqkam ngoqg agaho daqa maabv.

¹⁶‍Hoggv no rongo ho liiknam hoqg otuqcob noqg nyijo aaxy-amar tulu gab, no Amj Durum dvnam mam nyil pvvdwb nyitayin. Hwdlo no rongo hoqgv noqg nyijo vliam vnywngam boqcum yukun no Jurpy Durum dvnam mam nyil pvvdwb nyitayin.

¹⁷‍Pwnbo At Swg agaho noqg nyega ko tulungv vnywngam luum go haadwb nyitayin.

¹⁸“Ngam hijum lvgab pwr aky jiyikam no opap kiilwqnam mam jimab, ho ngam oxbo durum jinam ham ar namgub doolin mvto.

¹⁹“Noqg rongo ked hoqgv aaxy-amar otuqcob lengco boam noqg Pwnbo At Swg dvrwq namlo baqa tayin. “Ann gwwi twwdu bo noqg sibin koam dvdwb xeenu maabv.

²⁰“Kaato, ngo noqg otuqb gumtwngam kanam tvl noqg lamtangam nam rvkil kaol wg mvdwn hoo ngo noqgab mwx-mvaq kunam nyook ho boolwq tayin.

²¹‍Mwam ruucw kwrgab to hoo mwwg yalam tal nyito; mwam bidu-bel tamab ceeko maabv, hoggab mwv nulug nyimuram danyib apaq jiram, hoggab mwwg lvgab ngoqg eminv doodwn.

²²“Hvbmabde no mwwg yalam ruucw kwrgabl hoo ngoqg benam hog mwlwngam nyib nyiloqkam, ho noqg ceebio tulungv ngoqg ceebiob hoo noqg nyemaq tulungv ngoqg nyemaqb nyitayin.

²³“Hwdlo ngoqg gumtwngv noqg otuqb wl hoo nam Amor nyi tulu dookho, Hittait nyi tulu dookho, Perijj nyi tulu dookho, Kanaan nyi tulu dookho, Hibitait nyi tulu dookho hoo Jebus nyi tulu dookho boolwq yin, hoo ngo bulam mvpaq tayin,

²⁴‍no bulug pwnboam pvxwl xumabv ho bulam bon nyij maabv, ho bulug nyinam hvb nyimabv, hvbmabde no bulam twrkiq-twrmal twrtayin hoo bulug pwlw soogw tulungam vmwq yumgub mvtayin.

²⁵‍Nulug Pwnbo At Sw gab bon nyito, hoo mwv nam dvsam la twwsam lvqc citayin, hoo noqg pengko hoqgv ngo vcam aadob naapaq tayin.

²⁶‍Noqg gvdaho nyi akjijaqkam ko jaqpaqram ho twrngum kamram; ngo nam swwiyu mvdwb jitayin.

²⁷‍Ngoqg bos dvb nyinam mam ngo noqg otuqb kanam cootayin hoo no hiyam ceekol haatanam nyiilungam ngo mwwdar-mwwpar mvma dvb mvtayin, hoo noqg ceebio tulungam bulam tobkurl wdwb ngo mvtayin.

²⁸‍Hoo noqg otuqb ngo bos haai mwwdwqkam kanam tayin, hoqhv noqg otuqb Hibait nyi tulungam, Kanaan nyi tulungam, hoo Hittait nyi tulungam ruqpaq tayin.

²⁹‍Bulam vnyw nywg noqg otuqb ngo ruqpaq tayin, hvb mabalo gvdangv nyoro tayin hoo nyorog svdinv dumtwq-miilywl naleql nam ceeko tayin.

³⁰‍Noqg otuqb bulam ngo anyo-anyob ruqg dvl ruqpaq tayin, ho no vigo gvdangam naal naol doog maady deedib.

³¹‍Noqg gvda vrram Swlw Sa-svlo hoqgv naalayil Palistan gvdag Sa-svlo namgub, hoo Iupratas deexa-rara namgub ngo jitayin, hoggab gvda hoq nyi doonbo tulungam ngo nulug alaqho jitayin, hoo no bulam noqg aga hoqgv ruqpaql ruqlin tayin.

³²‍No bulug lvg bvla bulug pwnbo lvgab pvvb birnam mvmabv.

³³‍Noqg gvdaho bulam doogw mvmabv, hvbnyima baloqkam bulv ngam ceeko mvdwb nam nyic nyig tayin; hoggab no bulug pwnbo tulungam bon nyij baloqkam, hoqhv jvqtw jaqb noqg pwd-poto gob nyitayin.”