Read Nyishi DOOGIN 24 Bible Online

DOOGIN 24 - Nyishi bible

DOOGIN 24

¹Ho mwv Mojesnvn benum, “No la Aaron, Nadab, hoo Abihu, hoo Israel nyi axa loq cam kvn gob At Swg dookub caato, hoo aado ho daqtwl xumto.

²‍Mojes aro At Swg ogumho hvvnwq tayin, hvbmabde asaqkv ogumho hvvnwq maabv, hoo nyiilungv bulug lvgab caamin gvmabv.”

³‍Mojes At Swg gomcwram la pvvb mwlwngam nyiilungam haaknv betamnum. Hoo nyiilungv lvkin gob sogoqnv birwqnv hoo begamv, “At Swg gomcwr mwlw gooknam mam ngulv nyitayin.”

⁴‍Hoo Mojes At Swg gomcwr tulungam xiqtul apkunum. Mwv ar komc gorab layil hoo puutu lvggap ho yugw ak mvnum, hoo Israel nyi tulug nyob camleq vnyi gab swwrw camleq dvvnyi gob diil apnum.

⁵‍Hoo Israelwg nyiilu hoqgv nyi yaapangam kanam tvl boyuqnam akiam la swrso gab pwr akiam svv hvvbam At Swn jimnum.

⁶‍Hoo Mojes hijum tuugin naalayil pukaqho vlwql apnum hoo hijum tuugin yugw ho pwqyaqnum.

⁷‍Ho mwv Pvvb Birnam Kitapam naanv hoo nyiilungam tapa dvb poorynum. Hoo bulv benum, “At Swg benam mwlw ham ngulv nyitayin, hoo ngulv hingkib tvjwl tayin.”

⁸‍Hoo Mojes hijum mam naalin layil nyiilungam pwqyaqnv hoo benum, “Kaato hijum lvgab pvvb birnam mam At Sw soq gomcwr tulu lvgab nulam bir gviyin.”

⁹‍Ho Mojes la Aaron, Nadab, hoo Abihu, hoo Israelwg nyi axa cam kvn nv bulv caaknum,

¹⁰‍hoo bulv Israelwg Pwnboam kaapanum. Mwwg lvpia niikumho lamta ho sappir wlwngv doonum, hoqhv doa aog cwwnyiaq-doonyiaq jeenam hvb jeenum.

¹¹‍Hoo mwwg alaqkam mwv Israel nyiilug peelo bo aoho idaq maanum; bulv Pwnboam kaapanum, hoo dvl-twwl doonum.

¹²‍At Sw Mojesnvn benum, “Ngoqg dookub puutu aoho cao gvdwl hoo tolo kaaya to, ngo nam pvvbam la gamlam pirr lwpia ho ngo xeqtwl, bulam tomswrnanam jitayin.”

¹³‍Ho Mojes mwwg lvgab mwam dvqsinbo Josua lvgab gorabl wnum, hoo Mojes Pwnbog puutu aob caaknum.

¹⁴‍Hoo mwv nyi axa tulungam benum, “Ngulv nulug dookub hookur maady deedib nulv so ngulam kaayal dooiya to. Hoo kaato, Aaron la Hur bunyiv nulug lvgab dooi nvla. Hiyv lajaqkam yolu-swcin doobaloqkam bunyig dookub wla ka.”

¹⁵‍Ho Mojes puutub caaknum, hoo puutungam doomwqkv hwrlup kunum.

¹⁶‍Sinai puutu aoho At Swg yuunamv haaknum, hoo puutungam doomwqkv aal loox gob hwrlup tvl doonum. Hoo kvn deen aalho doomwq pengko hoqgv Mojesnvn goqnum.

¹⁷‍Israel nyiilug vnyiq kaagaho At Swg yuunamv puutu aoho wmmwb bioqlinl kaakinum.

¹⁸‍Mojes doomwq urab haal puutu aob caonum. Hoo puutu aoho Mojes aal campy hoo ai campy gob doonum.