Read Nyishi DOOGIN 25 Bible Online

DOOGIN 25 - Nyishi bible

DOOGIN 25

¹At Sw Mojesnvn benum,

²“Israel nyiilungam beto, ho bulv ngoqgab aky jikum mvto. Nyi vxig hangv hog hwdgo jidwb mwwl jinam mam nulv ngoqgab nvvrwqto.

³‍Hoo soq aky tulu sam nulv bul galoqkv nvvrwq tayin: hun, rup, hoo tama,

⁴‍yajbo hoo lwwsa-lwwma bo vjam, lwwcw cwwsa-cwwma bo hoo kangam albo pud vjam, sibin vm mvm,

⁵‍yaap tvmwr vpinam tamin neenam mam, sibin vpinam, akasiya svvdangam,

⁶‍lemp gab kutiam, darxaqnan kutiam hoo sungam bo sulum mam,

⁷‍onex wlwngam, hoo asaq xinam wlwngam jitwl gorbw poqbaqnam vjam la haabog kuiyam haql ap mvmto.

⁸‍Hoo bulam ngoqgab dvrwq namlo loq ak mvmto, ho ngo bulug pengko ho doogw tayin.

⁹‍Hoggub jaq xumk pirram mvdwb nyitayin, ngo nam mam kaakin tayin, hoo hoqg dootam-daqtam mwlwngam hoggub mvtayin, ham kaakin tayin, ho ham nulv mvdwb nyitayin.

¹⁰“Bulv akasiya svvda hulu ak mvdwb nyitayin. Daayaram kiubit vnyi gola papo gob, taqtam kiubit ak la papo gob, hoo aongam kiubit ak la papo gob xigdvl mvtayin.

¹¹‍No ham loodwrbo hun lvgab pioqlup, urangam la aongam pioqlupto, hoo no ham kangam dvb hun tvdar lvgab ywryiq tayin.

¹²‍No hun lvgab kookwr loq kwrpy go mwlwqto hoo hoq tulu ham hoqg lvpia dvvpy ho tvqlwql apto, kookwr kwrnyi gonham taqcgon ho hoo kwrnyi gonham taqcgon kalam ho tvqlwqto.

¹³‍No akasiya lyvxar loq mvto hoo ham hun lvgab pioqlupto.

¹⁴‍Hoo lyvxar tulu ham kookwr tuluho xwrlwqtvl hulu ham bulam joon mvtayin.

¹⁵‍Lyvxar tulu ham kookwrho xwrlwqtvl doomto; lyvxar tulu ham hoqgv naalin maabv.

¹⁶‍Hoo no hulu uraho nam ngoqg pvvb jinam ham vlwql ap dvb nyitayin.

¹⁷“No aya mwwpa ko dootam ham loodwrbo hun lvgab mvdwb nyitayin. Daayaram kiubit vnyi gola papo gob, hoo taqtam kiubit ak la papo gob mvdwb nyitayin.

¹⁸‍Hoo no hun hoqgv cerubim vnyi go mwlwq dvb nyitayin; hoq tulu ham kvnyi lvgab taql aya mwwpa ko dootamg tuur-tuusaqho mwlwq dvb nyitayin.

¹⁹‍Cerub akwn tuur gonho mwlwqto, hoo cerub akwn tuur gon kalam ho mwlwqto. Aya mwwpa ko dootam ham no tuur-tuusaqb luukin cerubim mam mwlwqtvl aptayin.

²⁰‍Cerubim tulu alapv aya mwwpa ko dootam ham bulug alapv lobyum tvl doog tayin; aya mwwpa ko dootam daiyab cerubimwg nyuqmv pwrtayin.

²¹‍Hoo no aya mwwpa ko dootam haam hulu ao jaqho mvptayin, hoo no hulu uraho nam ngoqg pvvb jinam ham vlwql ap dvb nyitayin.

²²‍Ho hoqho nam ngo kvvrwq tayin, hoo aya mwwpa ko dootam ao hoqgv, hoo pvvb uddum aoho doonbo cerubim vnyig pengko hoqgv, ngo nam Israelwg nyiilu gab gamlam jitayin.

²³“No akasiya svvda hoqgv tebol ak nyitayin. Daayaram kiubit vnyi gob, taqtam kiubit ak, hoo aongam kiubit papo gob mvdwb nyitayin.

²⁴‍No ham loodwrbo hun lvgab pioqlup tayin hoo ham hun tvdar lvgab kangam dvb ywryiq tayin.

²⁵‍Hoo no ham gobum gob gambam jwwkam dvb gamtayin, hoo gambam kangam dvb hun tvdar lvgab ywryiq tayin.

²⁶‍Hoo no hun kookwr kwrpy go mvtayin, hoo kookwr tulu ham tebol cwwrw vpig lvpia dvvpy ho tinglwq tayin.

²⁷‍Gamb bviywrho kookwr tuluhv paqyin tvl dootayin, hoq tuluhv tebolam lyvxar xwrlwq tvl joon tayin.

²⁸‍No akasiya svvda lyvxar loq mvdwb nyitayin, hoo hoq tulu ham hun lvgab pioqlupto, hoo tebolam hoq tulu lvgab joon tayin.

²⁹‍Hoo no hoqg sungam dvb parnan huku-betangam hoo pwcw-uddungam mvdwb nyitayin, hoo pvtaq-ujuqkam hoo pumkaq-paakaq tulungam aky toolwql twwnanam mvdwb nyitayin; no hoq tulu ham loodwrbo hun hoqgv mvtayin.

³⁰‍Hoo no wtwngam lwxiam tebol aoho pvvtwl ngoqg agaho doomto.

³¹“No loodwrbo hun hoqgv lemptvtam nan loq ak mvdwb nyitayin. Lemptvtam nan ham kvnyi lvgab taql mvdwb nyitayin: hoqg doopiam, hoqg apongam, hoqg pvtaqkam, hoqg opu guugab nanham, hoo hoqg opu tulu ham lvkin gob daakin ho mwlwql mvdwb nyitayin.

³²‍Hoo hoq hoqgv haqb haqx go mvlin dvb nyitayin, haqb oum gonham taqcgon hoqgv hoo haqb oum gonham taqcgon hoqgv mvlin tayin;

³³‍pvtaq toqum go almond opu puudo bo hvb mvtayin, vx-cwram opungam guugab tvl haqb ak ho doodwb, hoo pvtaq toqum hv almond opu puudu bo hvb nyitayin, haqb akwn hookam opungam guugab tvl doodwb mvtayin—ho haqb haqxv lemptvtam nan hoqgv lengtayin.

³⁴‍Hoo lemptvtam nanho almon opu puulin bo hvb pvtaq tvqpy go guugab dvb mwlwq tayin,

³⁵‍hoo opu guugab nanhv haqb haqxwg niikum ho lemptvtam nan lvgab lengtayin.

³⁶‍Bulug opu guugab nanv la hoo bulug haqb tuluhv akin gob nyitayin, ho mwlw hv kvnyi lvgab loodwrbo hun mvnam daakin gob nyitayin.

³⁷‍No kvn go lemplo mvdwb nyitayin. Hoo lemp tuluhv haagag namrangam huto jitayin.

³⁸‍Hoqg sabkungv la hukungv loodwrbo hun hoqgv mvdwb nyitayin.

³⁹‍Hoq dupum-dvrab tulu ham mwlwngam dengkil loodwrbo hun hoqgv mvdwb mvtayin.

⁴⁰‍Hoo no soq mwlw sam nam ngo puutu ao tolo kaakin kunam hvbjaq no mvdwn nyitayin.