Read Nyishi DOOGIN 26 Bible Online

DOOGIN 26 - Nyishi bible

DOOGIN 26

¹“Hoq aoho no xumk pirram vj rwwtumnan rumyw go kangam bo vjam hoo yajbo la lwwsa-lwwma bo vjam hoo lwwcw cwwmo-cwwlo boam mwlwqdvb nyitayin; no hingky jaqb cerubim mam hoq tuluho hingky jaqb hvmlwq tayin.

²‍Vj rumx cwr hoqg daayaram kiubit camnyi leq piin gob hoo taqtam kiubit vpy gob mvtayin; rwwtumnan vj tulu ham homyin lvkin dvb mvtayin.

³‍Rwwtumnan vj rumg gonham lvkin gob hvmsiq tayin, hoo rumg gon hamkam hvb vpwb hvmsiq tayin.

⁴‍Hoo no rwwtumnan vj hvmsiqnam otuq ak ham yajbo tan lvgab jemiam gamb ho hiqlwq tayin. Hoq hvbkalam vnyi deen hamkam hvb hiqlwq tayin.

⁵‍Rwwtumnan otuq vjho camng go jemiam hiqlwq tayin, hoo vnyi deen hamkam hvb hiqlwq tayin; jemy tulu ham hamko-hampeq gvdwl hvmlwq tayin.

⁶‍Hoo no hun peqs loq camng go mvtayin, hoo vj rumnyi-rumnyi ham lvkin gob jabkab tayin, ho xumk pirram akin hvb kaatayin.

⁷“No xumk pirr tombungam rwwtumnan loq sibin vm lvgab vj loq camleq rumkin go mvdwb nyitayin.

⁸‍Rwwtumnan vj hoqg daayaram kiubit cammum gob hoo taqtam kiubit vpy gob mvtayin. Camleq rumkin rwwtumnan vjam homyin lvkin dvb mvdwb nyitayin.

⁹‍No rumg gon ham lvkin gob hvmsiq tayin, hoo rumx gon hamkam lvkin gob hvmsiq tayin, hoo rumx gon ham cwrkap tvl tombu haagaho rwwtum to.

¹⁰‍No rwwtumnan otuqg vj rumho jwgw niqtuq jaqho camng go jemy loq hiqlwq tayin, hoo camng go kalam vnyi deen rwwtumnan vj ho hiqlwq tayin.

¹¹“No camng go tama peqsam mvtayin, hoo peqs tulu ham jemy ho kvrlwq tayin hoo tombungv akin hvb nyitayin.

¹²‍Hoo tombug rwwtumnan hoqg laleql yupoql doonbo rwwtumnan papo gon xumk pirr langkam rwwtum tayin.

¹³‍Hoo taqcgon ho kiubit ak, hoo taqcgon ho kiubit ak, rwwtumnan tulug daayaram laleq dvb xumk pirram taqc-taqsab vjam lyup dvb rwwtum tayin.

¹⁴‍Hoo no tombu ak ham yaap tvmwr vpinam tamin neenam hoqgv rwwtum to hoo ao jaqho sibin vpinam rwwtum to.

¹⁵“No akasiya svvda hoqgv xumk pirram tuudaql daqdwb yarabl mvto.

¹⁶‍Hoqg daayaram kiubit camgwb gob, hoo yarabnam vx-cwrwg taqtam kiubit papo gob yarabto.

¹⁷‍Hoqg dvqgwngam jubn boloq vnyi go yarabto ho ham lvkin gob yvrwq suto. Hoqhvb no yarab gvdwl xumk pirr mwlwngam yvrwq-yartaql yarab tayin.

¹⁸‍No xumk pirr gab yarabl mvtayin: nyooko daiya ho camnyi go yarabto;

¹⁹‍hoo campy go rupam hoqg camnyi yarabko uraho wmto, ak yarabnam ho vnyi gogab rupam uraho vlwqto, hoo yarabnam vnyi-vnyiam guugabl doog tayin;

²⁰‍hoo vnyi dvb xumk pirram nyoodum daiya ho camnyi kalam go yarabto,

²¹‍hoo campy go rupam hoqg camnyi yarabko doopy ho vlwqto, hoo vnyi gogab yarabko ho wsiq-wmeql wmto.

²²‍Hoo xumk pirr langkwg dou-haaga daiyaho mwgwnan ax go yarab tayin.

²³‍Hoo no cuukiq kiqnyi go xumk pirrwg langk ho yarab tayin;

²⁴‍hoq tulug lwkwngv asaq-asaq tayin, hvbmabde aog otuq kookwrho wrwq minstayin. Hoqhvb vnyi-vnyiam mvtayin; hoq tuluhv hvb nyil cuukiq kiqnyi gob nyitayin.

²⁵‍Hoo hoqho piin go yartayin, camleq ax go rup doopiam vlwq tayin, hoo ak-ak ho rup vnyi gogab vlwq tayin.

²⁶“No akasiya xaapo loq padwb nyitayin, xumk pirram yarn dvb poong go taqcgon gab padwb nyitayin,

²⁷‍hoo xumk pirr taqcgon ho poong kalam go yarn dvb patayin, hoo poong kalam go xumk pirrwg dou-haaga daiyangam langk ho mwgwngam yarn dvb patayin.

²⁸‍Lvpag xaapongv kviyw swcwb tuur gon hoqgv tuur gon namgub lengtayin.

²⁹‍No yarabnam tulu ham hun lvgab pioqlup tayin hoo hun hoqgv anyo bo kookwram xaapo tulu ham hoqgw naadwb mwlwqtayin, hoo no xaapo tulu ham hun lvgab pioqlup tayin.

³⁰‍Ho no xumk pirram nam puutu aoho kaakin kunam hvbjaq mvgdvl diirabto.

³¹“Hoo no yajbo hoo lwwsa-lwwma bo hoo lwwcw cwwsa-cwwma bo hoo kangam albo vjam rwwtumnan dvb mvtayin. Hoq tulu ham hingky jaqb cerubim mam hamtaql hvmlwqto.

³²‍Hoo ham akasiya lyvxar dvvpy go hun lvgab pioqlupnam hoqgv joon tayin, hun tooky tulungam hvqlwq tayin hoqgv rup vpy go doopiam piuptayin.

³³‍Hoo no rwwtumnan ham tooky lvgab torp to, hoo pvvb wyw ham hoqg rwwtum ko uraho apto. Hoo hoq rwwtumnan hv nam Dvrwq Dook hoqgv Dvrwq Kwrwqko Dookwb mwbwq tayin.

³⁴‍No aya mwwpa ko dootam ham Dvrwq Kwrwqbo Dook ho gaml uddumho aptayin.

³⁵‍Hoo no rwwtum ko agaho tebol pvvtayin, hoo lemp tvtamnan ham xumk pirrwg nyooko daiya ho pvvtayin, hoo no tebolam nyoodum daiya ho aptayin.

³⁶“No tombug haagangam rwwtumnan ak mvdwb nyitayin, ham yajbo hoo lwwsa-lwwma bo ho lwwcw cwwmo-cwwlo bo hoo kangam albo vjam alaq lvgab hvmsiq-hameq tvl rwwtum tayin.

³⁷‍Hoo no akasiya swwrw daang go mvtayin, hoo hoq tulu ham hun lvgab pioqlup tayin. Bulug tooky tulu ham hun hoqgv mvdwb nyitayin, hoo no tama loq ang go hoq tulu gab piaqdwb nyitayin.