Read Nyishi DOOGIN 27 Bible Online

DOOGIN 27 - Nyishi bible

DOOGIN 27

¹“No akasiya svvda hoqgv yugw ak mvdwb nyitayin. Hoqg daayaram kiubit ang gob hoo taqtam kiubit ang gob mvtayin. Yugwg paap-daayaram homyin dvb mvtayin, hoo hoqg aongam kiubit oum gob mvtayin.

²‍Hoo no cuukiq vpyho tuuly vpy go tuulin mvtayin; hoqg tuuly tulu ham luukin hoqgv mvtayin, hoo tama lvgab no ham pioqlup tayin.

³‍No muiyam yoqkum nan pwcw tulungam, hoo tuqn nanam hoo pukaq tulungam hoo xwqgab nanam hoo loorangam mvdwb nyitayin. No soq dupum-dvrab tulu sam tama hoqgv mvtayin.

⁴‍No tama ponyiab pam tengko-tempeq dvb mvdwb nyitayin, hoo hoqg tengko-tempeqko cuurw vpy ho tama kookwr loq kwrpy go cuukiq vxho mwlwq dvb nyitayin.

⁵‍Hoo no hoqham yugwg gamb uraho twlwql aptayin ho hoqg tengko-tempeqnamv yugwg papo namgub itayin.

⁶‍Hoo no yugw gab lyvxar tulungam mvdwb nyitayin, akasiyag svvdangam lyvxar mvdwb nyitayin, hoo hoq tulu ham tama lvgab pioqlupto.

⁷‍Hoo lyvxar tulu ham kookwr tuluho xwrlwql aptayin, ho lyvxaram tuur-tuusaqb joon dvb xwrlwql apto.

⁸‍No ham taqt uro dvb mvdwb nyitayin. Puutu ao tolo nam hoggub kaakin kunam, hoqhvb mvdwb nyitayin.

⁹“No xumk pirr baagam mvdwb nyitayin. Nyooko daiyag baag taqcgon ham kangam albo vjam kiubit lwwgwb aaso gob torp dvb mvtayin.

¹⁰‍Hoqham swwrw camnyi go torca tayin hoo tama camnyi gob lwkw ham piulwq tayin, hvbmabde rup lvgab swwrw tulug tookiv la rubtin nanham rubn tayin.

¹¹‍Hoo hoq hvbkalam nyoodum daiya ho vjam kiubit lwwgwb aaso gob torp dvb mvtayin, hoqham swwrw camnyi go torca tayin hoo tama camnyi gob lwkw ham piulwq tayin, hvbmabde rup lvgab swwrw tulug tookiv la rubtin nanham rubn tayin.

¹²‍Hoo dou-haaga daiya hoqg baag taqtam kiubit camng gob tortumnan torp koob mvtayin, swwrw dvvyw lvgab doopy wyw kalam go mvtayin.

¹³‍Dou-caga haagag baagam kiubit camng gob taqt dvb mvtayin.

¹⁴‍Toggoq akwn ho tortum nanham kiubit camleq ang gob mvtayin, ho ham swwrw doum lvgab doopy oum kalam go mvto

¹⁵‍Taqgwn tortum nanham kiubit camleq ang gob mvtayin, ho ham swwrw doum lvgab doopy oum kalam go mvtayin.

¹⁶‍Baag toggoq ham kiubit camnyi gob aaso dvb yajbo hoo lwwsa-lwwma bo hoo lwwcw cwwmo-cwwlo bo hoo albo vjam alaq hamnam mam torp dvb mvtayin. Hoqham swwrw dvvpy lvgab doopy vpy go torgw dvb nyitayin.

¹⁷‍Baagwg swwrw mwlw ham rup lvgab tvqywq dvb nyitayin. Rupam bulug tookib mvtayin, hoo tamangam bulug doopib mvtayin.

¹⁸‍Baagwg yarsongv kiubit lwwgwb, taqtv kiubit camng gob, hoo aongv kiubit ang gob mvtayin. Hoqho kangam albo vjam torp tayin hoo hoqg doopiam tamangam mwlwqtayin.

¹⁹‍Xumk pirram nyin-mvnnan dupum-dvrab mwlwngv, hoo hoqg baagam tornan mwlwngv tama hoqgv mvdwb nyitayin.

²⁰“No Israel nyiilungam gaml jil beto ho bulam dvrwqbo kuty loq lempho pwlwq dvb bwa mvto, ho lempv lwxiam wm gul huto jil dootayin.

²¹‍Pvvb Wywngam aptvl tortumko agag kvvrwq minsko ho Aaron la mwwg ko tulungam ham ariyum hoqgv ar namgub At Swg agaho nyil doomto. Hoqham nwrba xaqb pvvb bwwg dvl bulug hotam-hotam xaqb Israel nyiilug pengko ho nyil doomto.