Read Nyishi DOOGIN 28 Bible Online

DOOGIN 28 - Nyishi bible

DOOGIN 28

¹“Ho noqg ogumho noqg vbw Aaron nvla mwwg lvgab mwwg ko tuup tulungam Israel nyiilug pengko hoqgv ngoqgab nyubwb swwm dvb boato—Aaron hoo Aaron gv ko tuup tulungam, Nadab hoo Abihu, Eleajar hoo Itamarnvn boato.

²‍Hoo mwam yuum dvb la kangam mvdwb, noqg vbw Aaron gob no dvrwqbo vj tulungam hvmj to.

³‍Hiyam ngo jem mvlaq mvdwb ywrnam nyi tulu ham no mwlwngam agam gooto, ho bulv Aaron gab vj tulungam mvtayin hoo mwam ngoqg nyubwb swwm dvb darxaq tayin.

⁴‍Soq vj tulu sam bulv mvdwb nyitayin: haabog kuiyam, gorbwg poqbaqnam mam, kamtam, lvlwqkam, bopyangam, hoo pusam mvmto. Bulv noqg vbw Aaron gab dvrwqbo vjam mvtayin hoo mwwg ko tuup tulungv ngoqg nyubwb nyil swwtayin.

⁵‍Bulv hun, yajbo hoo lwwsa-lwwma bo hoo lwwcw cwwmo-cwwlo bo, hoo albo jet tulungam naanum.

⁶“Hoo bulv hun, yajbo hoo lwwsa-lwwma bo hoo lwwcw cwwmo-cwwlo bo, hoo lolup pam hingky jaqb mvtayin.

⁷‍Gorbw poqbaqnanam vnyi go mvdwb nyitayin, ho hoqg niqtuqkam lvkin gob hvmsiq minstayin.

⁸‍Hoo hun, yajbo hoo lwwsa-lwwma bo hoo lwwcw cwwmo-cwwlo bo, hoo albo tan tulu hoqgv pusam hingky jaqb alaq lvgab cumtwl lolup lvgab lvkin gob koom tayin.

⁹‍No onex wlw loq pwnyi go naatayin, hoo hoq tulu aoho Israelwg ko tuup tulungam taqg dvl xiqtwqto,

¹⁰‍Ax gonwg eminam wlw pwgwn ho taqg dvl xiqlwqto, hoo ax gon hoqg eminam wlw pwgwn ho taqg dvl xiqlwqto, bulug vbw hoqgv naarab layil bor anya namgub taqg dvl xiqlwqto.

¹¹‍Lvqcam yip pwnbov hoggub hingky jaqb pwnam hvb, no wlw pwnyiam Israelwg ko tuup tulu ham yip pwlwql apto. No hoq tulu ham hun lvgab putum tvl apto.

¹²‍Hoo no hoq wlw pwnyiam lolupho cumlwq mvto, ho hv Israelwg ko tuup tulungam mwwpa dvb nyinanv. Hoo At Swg agaho Aaron mwwg gorbw taqg-taqsaqho bulug eminam mwwpa dvb gvtayin.

¹³‍No hoq tulu ham hun lvgab putum tvl aptayin,

¹⁴‍hoo loodwrbo hun gai loq soonyi go tuko-tupeqto; hoo no gai ham pvvgw nanho xubtaql aptayin.

¹⁵“No pw-hwwnnan haabog kuiyam hingky jaqb mvdwb nyitayin. Lolup mwcw jaqb no hoqham mvdwb nyitayin—hun, yajbo hoo lwwsa-lwwma bo hoo lwwcw cwwmo-cwwlo bo, hoo albo tan tulu hoqgv no ham mvtayin.

¹⁶‍Hoqg poop-daayarv homyin tayin hoo ham cwrkap tayin, poop-daayarv haqg kiya gob nyitayin.

¹⁷‍No hoqho lwwjab vpy go jabca tayin. Otuqcob sardius, topaj, hoo karbunkelam japtayin;

¹⁸‍hoo vnyi deenho emerald, sappir, hoo viyinam;

¹⁹‍hoo oum deenho jakin, agat, hoo ametisam;

²⁰‍hoo vpy deenho beril, onex, hoo jasparam japtayin. Hoq tulu ham hun putumko lwkw ho aptayin.

²¹‍Hoqho wlw camleq pwnyi go Israelwg ko tuup tulug eminam gab dootayin. Hoq tuluhv morx lvqc hvb nyitayin, ak-ak ho hoqg eminam xiqlwq tayin, hoqg camleq vnyig nyob hoolu tulu gab.

²²‍No haabog kuiyam loodwrbo hun gai loq tuko-tupeql tulwqtayin.

²³‍Hoo no haabog kui gab hun lvgab kookwr loq kwrnyig mvdwb nyitayin, hoo kookwr kwrnyiam haabo kuiywg gamb ho kvrlwqto.

²⁴‍Hoo no haabog kuiywg kookwrho hun axa loq mwlwq tayin.

²⁵‍Tuur-tuusaqg axa ham hunwg putum nanho xaqtinto hoo gorbwg kaaga daiya lolup cumlwqto.

²⁶‍No hun lvgab kookwr loq vnyi go mvdwb nyitayin, hoo hoq tulu ham haabog kuiyam tuur-tuusaqb xaqtinto, ho ham gorbwg ura daiya lolupho doomto.

²⁷‍Hoo no hun lvgab kookwr vnyi go mvtayin, hoo hoq tulu ham lolup akog jwgw odumho hingky jaqb cumlwq tayin.

²⁸‍Hoo hoq tuluhv haabog kuiywg lolupg kookwram yajbo pus lvgab hamtinl aptayin, ho hoqham hingky jaqb alaq lvgab lolup vj ho cumlwql aptayin, ho haabog kuiyv lolup hoqgv hwdlo kam pusuqram.

²⁹‍Hoqgab Aaron Israelwg ko tuup tulug eminam mwwg hangwg nyidy dinanam haabog kuiho gvl yvgtayin, hwdlo mwv Dvrwqbo Dook ho haaikam bulam At Swg agaho lwxiam mwwpa mvdwb gva tayin.

³⁰‍Hoo nyidy dinanam haabog kuiho no Urim mam la Tummim mam vlwq tayin, hoo hwdlo mwv At Swg agaho wikam hoq tuluhv Aaron gv hang hvvpv. Hoqgab Israel nyiilungam pw-hwwnam mam Aaron mwwg hangho At Swg agaho lwxiam baqa dvb nyitayin.

³¹“Nyvj tan hoqgv no lolup pam mvdwb nyitayin.

³²‍Hoqg lvpa ra ho dumpo tulwqko ung loq mvto, ho ham puceq mvma dvb cumnam vj loq hiqcub nadwb hvmlwqto, ho hoqhv pujar deema.

³³‍Hoqg akog jwgw bviywrho nvj, lwwsa-lwwma bo hoo lwwcw cwwmo-cwwlo bo tan hoqgv annar aaxiam rumpwho cumlwqto, ho hoq pengko ho hun riinyiam hiqlwqto,

³⁴‍hun riinyiam la annar aaxiam la mvko-mvpeq gvdwl lolup rumpwho mwlwqto.

³⁵‍Hoo hwdlo Aaron mwv At Sw agag Dvrwqbo Dookub bon nyitab wikam hoqg yal dunam mam tapa tayin, hoo hwdlo mwv hoqgv lvvgwb lengyikun tapa tayin, ho mwv sita ma.

³⁶“No loodwrbo hun hoqgv beta golo morx lvqcam taqnam hvb hoqho soq sib tvqlwq tayin, ‘At Sw gab Dvrwq dvn.’

³⁷‍Hoo no poi duduram bopya ho nvj hoqgv hwwtin tayin. Hoqhv bopyag agaho dootayin.

³⁸‍Hoqhv Aaron gv tuqt ho dootayin, hoo Israel nyiilungv bulv dvrwqb aky jik ho nyimur kujaqkam ham Aaron mwv dvrwqbo aky gob darxaql baqya tayin. Hoqham mwwg tuqt ho lwxiam gvdwb nyitayin, ho bulam At Swg agaho loorwq tayin.

³⁹“No pomo vjam cumtayin, hoo albo tan hoqgv bopyangam mvtayin, hoo no peqs hoqgv alaq hamnam pusam hamtayin.

⁴⁰“Aaron gv ko tuup tulu gab no lvlwqkam hoo pusam hoo bopyangam mvdwb nyitayin. No hoq tulu ham yuum dvb la kangam dvb mvtayin.

⁴¹‍Hoo noqg vbw Aaronnvn hoq tulu ham gvmto, hoo mwwg lvgab mwwg ko tuup tulungam gvmto, hoo bulam kuty neel xuqbwql xuqlin to hoo bulam darxaql nyedar dvb mvto, ho bulv nyub akwb nyitwl ngam bon nyij tayin.

⁴²‍No bul gab ura vj koosam mvdwb nyitayin ho bulug talonam mam bulv kootum tayin. Hoq tulu ham gvvs hoqgv xarpo namgub aaso dvb gvmto;

⁴³‍hoo hoq tulu ham Aaron nvla mwwg ko tuup tulungam koomto hwdlo bulv kvvrwq minsko dook ho haaikam ho hwdlo bulv Dvrwq Dook yugw ogumho bon nyitab haaikam koomto, hvbnyima baloqkam bulv nyixiaql hoo sitayin. Soq sam nwrba xaqb mwwgabl soq pvvb si dootayin hoo mwwg kokwb mwwg ko hosiqkv pvvtayin.