Read Nyishi DOOGIN 29 Bible Online

DOOGIN 29 - Nyishi bible

DOOGIN 29

¹Soq sib no bulam nyigdvl ngoqg nyubwb bon nyim dvb darxaq tayin. Svv hvvb loq dorg naato hoo un-tar gvma bo yaap tvmwr dornyi go naato,

²‍hoo opap kiilwq maanam wtw loq naato, opap kiilwq maanam kuty lvgab mviyonam wtw loq naato, hoo opap kiilwq maanam kuty neeyo-neeconam loq naato. No hoq tulu ham dvngam bo wtwb mvto.

³‍No hoq tulu ham huc cikin gol vlwqtvl hoo hoq tulu ham huc ho bwa to, hoo hvvb dorg la yaap tvmwr dornyi go boa to.

⁴‍No Aaron nvla hoo mwwg ko tuup tulu ham haagag kvvrwq minsko ho boalayil bulam iss lvgab hwrxaqto.

⁵‍Ho no vj tulu ham naatayin, hoo Aaronnvn lvlwq ham koomto hoo lolup ham pitam mvto, hoo lolup pam pilwqto, hoo haabog kuiyam gvmto, hoo hingky jaqb pus hamnam ham hiqmto.

⁶‍Hoo no mwwg dumpo aoho bopyangam tulwq tayin hoo dvrwqbo ywr dumtup pam gvmto.

⁷‍No darxaqnan kutiam naatayin hoo ham mwwg dumpo ho darxaql neetayin.

⁸‍Ho no mwwg ko tuup tulungam boal hoo lvlwqkam bulam koom tayin,

⁹‍hoo no Aaron nvla mwwg ko tuup tulungam pusam la bopyangam gvm tayin. Hoo nyub hoolu si bul gab nwrba xaqb pvvb gob nyitayin. Ho no Aaron nvla mwwg ko tuup tulungam xuqbwql xuqlin tayin.

¹⁰“Ho no hvvbam kvvrwq minsko agaho boatayin. Aaron nvla mwwg ko tuup tulungv hvvbwg dumpo ho bulug alaqkv idaq tayin.

¹¹‍Ho no At Sw agaho kvvrwq minsko haagaho hvvbam patab tayin,

¹²‍hoo hijum tuugin naalayil ham noqg lvqcw lvgab yugwg vrrw tulu ham tiyaq tayin, hoo hijum tuugin ham no yugw lwkwg deela ho toopto.

¹³‍Hoo no haara hoqg oxam naalin to, hoo vsinam la xiicwr pwnyi ho ox doon boam naato, hoo hoq tulu ham yugw ho wm ramto.

¹⁴‍Hvbmabde hvvb hoqg vdinam hoo vpinam hoo hoqg haara vdinam no svmcw lvvg alo wm parpaqto; hoq hv nyicig akiv.

¹⁵“Ho no sviya dorgwn naatayin, hoo Aaron la mwwg ko tuup tulungv yaap tvmwr dumpo ho bulug alaqkv idaq tayin,

¹⁶‍hoo no yaap tvmwram patab tayin hoo hoqg hijum mam naalayil hoo ham yugw bviywrho hurtayin.

¹⁷‍Ho yaap tvmwram no twqmwq tayin, hoo haara vdinam hoo hoqg lvpia tulungam twqmwqtvl hoo ham dumpo lvgab aptayin,

¹⁸‍hoo sviya dorpwngam yugw ho wm ramtayin. Hoqhv At Sw gab boyuqnam aky gob nyidwn. Hoqhv At Swn sungam bo dvsam aky jinam hvb nyidwn.

¹⁹“No sviya dorgwn ham naatayin, hoo Aaron la mwwg ko tuup tulungv sviya dumpo ho bulug alaqkv idaq tayin,

²⁰‍hoo no yaap tvmwram patab tayin hoo hoqg hijum tuugin naatayin hoo ham Aaron ruubwq nyuru ruubar niqtuqho tiyaq tayin hoo mwwg ko tuup tulug ruubwq nyuru ruubar niqtuqho tiyaq tayin, hoo bulug lvqbwq alaq laqnam la lwbwq lvpiag lvnam tiyaq tayin, hoo hoqg hijum mam yugw bviywrho hurtayin.

²¹‍Ho no yugw hoqg hijum tuugin naatayin, hoo neel darxaqnan kutiam naatayin, hoo hoqham Aaron nvla mwwg vj tulu ham pwqyaq tayin, hoo mwwg ko tuup tulungv la mwwg ko tuup tulug vjam mwwg lvgab pwqyaq tayin. Mwv la mwwg vjv dvrwq tayin, hoo mwwg ko tuup tulungv la mwwg ko tuup tulug vjv mwwg lvgab dvrwq tayin.

²²“No ox tulungam sviya hoqgv naatayin hoo oxbo nyicwngam naatayin hoo haara vdinam pulup bo ox tulungam la vsinam hoo kiicwr pwnyi ho ox doon boam, hoo xvrbwq axaram (hoqhv sviya akwg xuqbwql xuqlin kunamv),

²³‍hoo At Swg agaho doonbo kuty mviyo tvl cwwnam wtw loq ak hoo kabnam wtw loq ak, hoo opap kiilwq maanam wtw loq ak huc hoqgv naalin to.

²⁴‍No hoq tulu ham Aaron gv laqc koro ho apto hoo mwwg ko tuup tulug laqc koro ho apto hoo At Swg agaho bulam kaacin dvb aky jil ngoqgab xuqlinl darxaqto.

²⁵‍Ho no hoq tulu ham bulug alaq hoqgv naag dukul boyuq ko aky jik aoho wm ramto, hoqhv At Sw agaho sungam bo aky gob nyitayin. Hoqhv At Sw dvs akib nyidwn.

²⁶“No Aaronnvn xuqlin darxaqnan sviya hoqg swqbwngam naatayin hoo ham At Swn xinam aky gob jitayin, hoo hoqhv noqg bulwb nyitayin.

²⁷‍Hoo no nyubam xuqlinl darxaq yukam sviya swqbwngam la axar xarpongam jibwqnam tulu ham ngam xinam aky gob jitbv hoo hoq tulu ham nyub tulug bulw gob jito.

²⁸‍Hoq tuluhv Aaron gab la mwwg ko tuup tulu gab kuiyum namgub Israelwg nyiilu gab nyisv, hoggab hoqhv jikumnamv. Hoqhv Israel nyiilug bulug swrso aky jikumnamv, At Swn bulug jikumnamv.

²⁹“Aaron gv dvrwqbo vj tuluhv mwwg kokwb mwwg ko tuup tulu gab dootayin; bulv hoq tulu ham darxaq tayin hoo bulam xuqlinl xuqbwq tayin.

³⁰‍Hiyvg ko ak hv mwwg abwg nyub butungam busiq tayin, hoo kvvrwq minsko Dvrwqbo Dook ho bon nyitab haata dvn hv vj tulu ham aal kvn gob kootayin.

³¹“No yaap tvmwram xuqlinl xuqbwqnam mam pwr jinam hoqg vdinam dvrwqbo nyook ho xwwtayin.

³²‍Hoo Aaron la mwwg ko tuup tulungv kvvrwq minsko haagaho apnam sviya vdinam la huc hoqg wtwngam dvtayin.

³³‍Bulam xuqlinl darxaqnan pwr kwlib jinam dvs-twws tulu ham bulv dvtayin, hvbmabde hoq tulu ham asaq nyiv dvnyi ram, hoggab hoq tuluhv dvrwqdvn.

³⁴‍Hoo xuqlin darxaqnan vdin maalo wtwngv ar namgub dook baloqkam, no ham wm lvgab parpaq tayin. Ham dvdwb nyikram hoggab hoqhv dvrwqdvn.

³⁵“Hoqgab no Aaron nvla mwwg ko tuup tulungam ngo nam gaml jinam hvbjaq nyitayin. No bulam aal kvn gob darxaql nyis besam nyitayin,

³⁶‍hoo aal looxiam no hvvb loq dorg-dorgub nyic kwlib pwr aky jitayin, hwdlo no hoqho nyic kwlib pwr jita yukam, no yugwngam paxy-xeexaq tayin, hoo hoqham garxaqtayin.

³⁷‍No aal kvn gob yugw ho nyic kwlib pwr jil hoo ham garxaqtayin, hoo yugwngv dvrwq kwrwq tayin. Hoggv xeq yugwngam idaq tayin hv dvrwq tayin.

³⁸“No soq sib yugw ho aky pwram jitayin: vnyw nywg bo sviya ko dornyi go aal loocw-lootam peqmab jidwb nyitayin.

³⁹‍Aram sviya dorgwn pwr jitayin, hoo dorgwn ham ariyum mam pwr jitayin.

⁴⁰‍Hoo otuqb sviya jiconam lvgab wtw svrnyi go kuty lvgab neeyonam mam, hoo twws meeg la twwnam akib jitayin.

⁴¹‍Sviya dorgwn ham ariyum mam pwr jiyikam aram jinam hvbkalam jitayin, hoggab hoqhv At Swn sungam bo dvsam aky jidwn.

⁴²‍Hoqham noqg hotam-hotamb At Swn kvvrwq minsko haagaho nam ngo kvvrwq tayin, hoo nam agam gootayin, hoqho lwxiam boyuqnam akiam jitayin.

⁴³‍Hoqho ngo Israel nyiilungam kvvrwq tayin, hoo hoqham ngam yuum dvb garxaqtayin.

⁴⁴‍Ngo kvvrwq mins koam la yugwngam garxaqtayin. Aaron nvla mwwg ko tuup tulungam ngoqg nyubwb swwl bon nyim dvb ngo garxaqtayin.

⁴⁵‍Ngo Israel nyiilug pengko ho dootayin hoo bulug Pwnbob nyitayin.

⁴⁶‍Hoo ngo bulug Pwnbo At Swv hvl bulv cengtayin, hiyv bulam Ijipt gvda hoqgv boolin kunam ho mwv bulug pengko lo doodwb. Ngo bulug Pwnbo At Swv.