Read Nyishi DOOGIN 3 Bible Online

DOOGIN 3 - Nyishi bible

DOOGIN 3

¹Mojes mwwg at akwg, Midianwg nyub Jetrog sviya pvtwngam kaal yvgnam, hoo mwv mwwg sviya pvtwngam Pwnbog puutu Horebg dou-haagag deexa-rara daiyab bool wgnum.

²‍Hoo At Swg gumtwngv mwam puum pengko ho wm moilib bioqlinv kaakinum. Mwv kaanum, hoo kaato puum mam wmv gul doodunum, hvbsujaqkam hoqham gunyia maanum.

³‍Hoo Mojes benum, “Aloq swrjaqb nyinam alam ngo tobkurl wgdvl kaaka tayin, hog nyitwl puum mam wmv gunyia maadwn.”

⁴‍Hwdlo mwv tobkur wl kaatab wnam mam At Sw kaapanum, Pwnbov puum hoqgv goqlinum, “Mojes, Mojes!” Hoo mwv benum, “Ngo si doodwn.”

⁵‍Ho mwv benum, “Ogumb hvvnwq maabv; noqg lvpiag samtaq ham pipaqto, hoggab noqg doqdu gvdwn nyook hv dvrwqbo kediv.”

⁶‍Hoo mwv benum, “Ngo noqg abwg Pwnbov, Abraham gv Pwnbov, Aisakwg Pwnbov, hoo Jakubg Pwnbov.” Hoo Mojes mwwg nyuqm mam kvsnum, hoggab mwv Pwnboam kaadwb bosnum.

⁷‍Ho At Sw benum, “Ngo jvqtw jaqb ngoqg nyiilungv Ijipt gvdaho hentwr henl doonam mam kaapa paku hoo bonam nyim dvb nvmlwqbo tulug bulug hentwr-kaas dvb mvnam hoqgv bulug xabnam mam ngo tapa paku. Ngo bulug vc cil hentwram cengdwn,

⁸‍hoo Ijipt nyi tulug alaq hoqgv bulam ngo naalin taab ipoq yin hoo bulam diibuq bvla taqtwb lywminko gvdaho boolin tayin, hoq gvda hv wtw lyuminko hoo ngola biqmin kov, Kanaan nyi tulug, Hittait nyi tulug, Amor nyi tulug, Perijj nyi tulug, Hibitait nyi tulug, hoo Jebus nyi tulug dook nyookv.

⁹‍Hoo sija kaato, Israelwg nyiilug xabknamv ngoqg dook si hvvc paku, hoo ngo Ijipt nyi tulungv bulam nyijab-nyiyabnam mam ngo kaapa paku.

¹⁰‍Haato, ngo nam Parog dookub ngoqg nyiilu, Israel ko tulungam, Ijipt hoqgv boolin mvdwb kanam tayin.”

¹¹‍Hvbmabde Mojes Pwnboam benum, “Ngo hiyv Parog dookub wl hoo Israel ko tulungam Ijipt hoqgv boolin deen bov?”

¹²‍Mwv benum, “Hvbmabde ngo noqg lvgab dootayin, hoo ngo nam kanam pan hvl soq sib nam kaacin dvb nyitayin: hwdlo no nyiilungam Ijipt hoqgv boolin yukam, no Pwnboam soq puutu so xumtayin.”

¹³‍Ho Mojes Pwnboam benum, “Ngo Israelwg nyiilug dookub haal hoo bulam betaml, ‘Nulug abwg Pwnbov ngam nulug dookub kanam pan hvl beikam,’ hoo bulv ngam tox tai, ‘Mwwg eminv hoggv?’ Hoggv ngo bulam betam tayi?”

¹⁴‍Pwnbo Mojesnvn benum, “NGO NYIIPV ATV.” Hoo mwv benum, “Soq sam Israel nyiilungam beta, ‘NYIIPV ATV ngam nulug dookub kanam pakun.’”

¹⁵‍Pwnbov Mojesnvn benum, “Soq sam Israel nyiilungam beta, ‘Nulug ab tulug At Sw, Abraham gv Pwnbo, Aisakwg Pwnbo, hoo Jakubg Pwnbov ngam nulug dookub kanam pakun.’ Nwrba gob soq si ngoqg eminv, hoo hoqgab ngam hotam mwlwho mwwpa dvb nyitayin.

¹⁶‍Wgdvl Israelwg axa bo nyiilungam lvkin gob goqkuml hoo beta, ‘Nulug ab tulug At Sw, Abraham gv, Aisakwg, hoo Jakubg Pwnbov ngam daqlinl kaakinv begamv, “Nulam Ijiptho hoggv nyidul doogdvn ham ngo kaapa paku,

¹⁷‍hoo ngo dingr pakun ngo nulam Ijipt gvdag hentwr-kaas hoqgv boolin tayin, hoo Kanaan nyi tulug, Hittait nyi tulug, Amor nyi tulug, Perijj nyi tulug, Hibitait nyi tulug, hoo Jebus nyi tulug dook gvdaho boolwq tayin, hoq gvda hv wtw lyuminko hoo ngola biqmin kov.’”

¹⁸‍Hoo bulv noqg agam mam tvjw tayin, hoo no la Israelwg axa tulungv Ijipt lvpw at dookub wtayin hoo mwam betayin, ‘Hibrug Pwnbo, At Sw ngulam kvvrwqnum; hoo sija ngulam aal loum go wnam gob wgdvl deexa-rara alo ngulug Pwnbo At Swn pwr jim tvbv.’

¹⁹‍Hvbmabde hwdlo mwam atorbo alaqkv bon nyima deedib ngo cengdo Ijipt gv lvpw atv nulam danyib wmram.

²⁰‍Ho ngoqg alaqkv ngo ilin gvdwl Ijiptho naleqgo swrdorxeqkam ngo nyitayin; hoq kokwngam mwv nulam wm tayin.

²¹‍Hoo ngo soq nyiilu sam Ijipt nyi tulug vnyiq kaagaho mwwsw mvtayin; hoo hwdlo nulv wikun, nulv asarb wkram,

²²‍hvbmabde nyem vxiv mwnwg door-doopw namho doonbo nyem mam rup, hun gumnam, hoo vj koosam kootayin. Hoq tulu ham nulv nulug nyega ko hoo nyem ko tulungam gvm tayin. Ho nulv Ijipt nyi tulug gumnam hubyiql wgtayin.”