Read Nyishi DOOGIN 30 Bible Online

DOOGIN 30 - Nyishi bible

DOOGIN 30

¹“No yugw ho sulum mwwk loq mvtayin ho hoqho sulum mam mwwtayin; no ham akasiya svvn hoqgv mvtayin.

²‍Hoq daayaram kiubit ak gob, hoo taqtam kiubit ak gob mvto. Hoqg poop-daayaram homyin dvb mvtayin, hoo hoqg aongam kiubit vnyi gob mvtayin. Hoqg cuurw-bvvrwho tuuly ak-akwb mwlwqtayin.

³‍Hoqg aongam hoo hoqg taqg-loosaqkam hoo hoqg tuuly tulungam, no loodwrbo hun lvgab pioqlup tayin. Hoo no hoqg gambam hun lvgab ywrtup tayin.

⁴‍Hoo no hoq gab hun kookwr loq kwrnyi go mvtayin. Hoqg gamb niikumg tuur-tuusaqho no kookwr tulu ham kvrlwq tayin, hoo hoq tuluho lyvxar xwrlwqtvl ham joon tayin.

⁵‍No akasiyag svvn lyvxar loq mvtayin hoo hoq tulu ham hun lvgab pioqlup tayin.

⁶‍Hoo no ham pvvb wywngam vj tortumko agag aoho, hoo pvvbam pvvkwg aya mwwpa ko dootam aoho aptayin, hoqho ngo nam kvvrwq tayin.

⁷‍Hoo Aaron hoqho sungam bo sulum mam mwwl dootayin. Ar roxiam hwdlo mwv lemp tulungam mvdar-mvpar yin mwv ham mwwtayin,

⁸‍hoo hwdlo Aaron ariyum mam lempam mvdar-mvpar yin, mwv ham mwwtayin, At Swg agaho sulum akiam noqg hotam-hotam xaqb nyil dootayin.

⁹‍No jimanam sulum mam hoqho aky jima bvka, ho boyuqnam aky gab parkam maabv, ho dvs akiam jimabv, hoo no twws akiam kam hoqho jimabv.

¹⁰‍Aaron vnywngam lok hoq tuuly tulug aoho nyic kwly pwram jitayin. Nyic kwlib pwr aky jinam hijum lvgab vnywngam lok nyic kwlib pwr jitayin hoo ham noqg hotam-hotam xaqb nyitayin. Hoqhv At Sw gab mwlwngam dvrwq yaan bov.”

¹¹‍At Sw Mojesnvn benum,

¹²“Hwdlo no Israel nyiilungam xika yin, hwdlo no bulam xika yin nyiicwr-cwrxiv At Swn mwwg swwgab nyooga jidwb nyitayin, ho hwdlo no bulam xika yin, hoqho swlin-mominamv bulug pengko ho dooram.

¹³‍Nyiicwr-cwrxiam hiyam xika ko ho xitaq pakun hv sam jitayin: dvrwq namlog sikil xik jaqb sikil papo gob jitayin (sikil papo si gera camnyi gob nyidwn), At Sw gab sikil papo gob aky jitayin.

¹⁴‍Nyiicwr-cwrxiam nyi xika ko ho xitaq tayin, vnyw camnyi hoqgv naarab layil hoq odum mam xilwq tayin, ho bulv At Swn aky jitayin.

¹⁵‍Hwdlo bulv At Swn bulug swwgab nyic kwlib aky jiyikam, nyetbov vigo jita ma, hoo jwwgw bov anyo go jita ma, hvbmabde nyiicwr-cwrxiv jidwb nyinam ham jitayin.

¹⁶‍No Israelwg nyiilu hoqgv nyic kwlib aky jitanam twngkam naatayin hoo ham kvvrwq mins ko tombu ho bon nyin mvdwb jitayin, ho hoqhv Israel nyiilungam At Swg agaho lwxiam mwwpa mvtayin, hoqgab nulug swwgab nyic kwlig akiam jito.”

¹⁷‍At Sw Mojesnvn benum,

¹⁸“Hwrxaq koam no tama pagam loq ak mvtayin, hoqg lvpiangam tama loq mvnto. No ham kvvrwq minsko tombu dook gvla yugwg pengko ho mvptayin, hoo hoqho no iss loq mwlwqtayin,

¹⁹‍hoqho Aaron la mwwg ko tuup tulungv bulug all-alaqkam hurstayin.

²⁰‍Hwdlo bulv kvvrwq minsko tombub wta yukam, ho hwdlo bulv yugw ogumb hvvnwql At Swn boyuqnam dvs akiam jil bon nyitab haata yukam, bulv iss hoqgv hurstayin, ho bulv sidwb nyiram.

²¹‍Bulug all-alaqkam bulv hurstayin, ho bulv sidwb nyiram. Hoqhv bul gab nwrba xaqb pvvb gob nyitayin, mwam la mwwg ko hosiqkam bulug hotam-hotam xaqb dootayin.”

²²‍At Sw Mojesnvn benum,

²³“Nikatala bo duiyup-twwgab pam naato: Mirr ala loq sikil 500 gob, hoo tiiswrl sungam bo asing tari loq 250 gob, hoo sulum xoociq loq 250 gob,

²⁴‍hoo dvrwq namlog sikil xikjaqb kassiya loq 500 gob, hoo kuty loq hin ak naadwb nyitayin.

²⁵‍Hoo no soq tulu sam sungam boam neeyo-nvvconam hvb dvrwqbo kuty neenanam mviyo-mvco tayin; hoqhv dvrwqbo kuty neenan gob nyitayin.

²⁶‍No soq lvgab kvvrwq minsko tombu dook ham la gaml uddum ham neexaq tayin,

²⁷‍hoo tebolam hoo hoqg dupum-dvrab pam, hoo lemp dvqgwnanam hoo hoqg dupum-dvrab pam, hoo yugwg sulum mam,

²⁸‍hoo yugwg boyuqnam aky jinam lvgab hoqg dupum-dvrab pam hoo pagam hoo hoqg dvqgw tulungam neexaq tayin.

²⁹‍No hoq tulu ham garxaqtayin, ho hoq tuluhv mwlwngam dvrwq yaatayin. Hiyv lajaqkam hoq tulu ham idaqbov dvrwq tayin

³⁰‍No Aaron nvla mwwg ko tuup tulungam neel darxaqtayin, ho bulv nyub gob nyitwl ngoqgab bon nyitayin.

³¹‍Hoo no Israel nyiilungam betayin, ‘Soq si ngoqg neel darxaqnan kuty gob hotam-hotam xaqb dootayin.

³²‍Soq sam nyi nyiisam gv ho tooyaq maabv, hoo no soq sib homyin dvb mvmabv. Hoqhv dvrwq dvn, hoo hoqhv noqgab dvrwq tayin

³³‍Hiyv lajaqkam soq sib homyin dvb mvnboam ho hiyv lajaqkam sam asaq nyiam neen baloqkam ham mwwg nyiilu ho xitaq kuram.’”

³⁴‍At Sw Mojesnvn benum, “Tiiswrbo duiyup-twwgab naato: svvn hoqgv dilin bo ala (stacte), hoo ngui hoqgv jiqlinam kuty (onycha), hoo svvn hoqgv dilin bo ala (galbanum), hoo tiiswrbo lvgab svvn hoqgv yorlin bo dvrwqb sungam boam (vxy-cwram homyin lvkin dvb bwa to),

³⁵‍hoo sulum ham sungam boam neeyo-nvvconam hvb mviyo-mvco to, ho ham al loq vlwqtvl loodwr dvbla dvrwq dvb pvvto.

³⁶‍No hoqgv anyo go xumwqto, hoo ham pvvb wywngam pvvkwg kvvrwq mins ko tombu agaho tvpto hoqho nam ngo kvvrwq tayin. Hoqhv noqgab mwlwngam dvrwq yaan bob nyitayin.

³⁷‍Hoo no hoq sulum mvnam mam hoqg mwcw jaqb mvtayin, no atv noqgab mvmabv. Hoqhv noqgab, At Sw ho dvrwq dvn

³⁸‍Hiyv lajaqkam hoqhvb sungam boam mvnbo akam mwwg nyiilu dvpar hoqgv xitaq kuram.”