Read Nyishi DOOGIN 32 Bible Online

DOOGIN 32 - Nyishi bible

DOOGIN 32

¹Hwdlo Mojes puutu hoqgv ipoq kumab oyu dukub nyiilungv kaapa yin, nyiilungv bulv lvkin gob hookum layil Aaronnvn benum, “Gorabto, ngulug otuqb wco mvdwb ngul gab pwnbo loq ak pwtbv. Soq nyi Mojesvk hvnam nyi si ngulam Ijipt gvda hoqgv boolin kunum, hoggv mwam nyipa kun ngulv cengk ma.”

²‍Ho Aaron bulam benum, “Nulug nywxw tulug, nulug nyega ko tulug, hoo nulug nyem ko tulug nyuru hoq hun gagy gvnam tulu ham naagdvl hoq tulu ham ngoqg dookub bwa mvto.”

³‍Ho nyiilu mwlwngv bulug nyuru hoqg hun gagiam naalin layil hoq tulu ham Aaronnvn bwa jinum.

⁴‍Hoo mwv hunam bulug alaq hoqgv nvvrwq layil ham jiqlayil taqn-panan hoqgv hun svv ko murty gob yip pwknum. Hoo bulv benum, “Israela, soq tulu si nulug pwnbov, hiyv nulam Ijipt gvda hoqgv boolin bov!”

⁵‍Hwdlo Aaron hoq tulu ham kaanum, ho mwv hoq agaho yugw ak mvnum. Hoo Aaron pui betaml hoo benum, “Aaram mam At Sw gab durum dvtayin.”

⁶‍Hoo ar rogwn gv ar komc bulv gorab layil boyuqnam akiam la swrso akiam jinum. Hoo nyiilungv doal dvt-twwt kul hoo soomin-nyirminl daqrabnum.

⁷‍Hoo At Sw Mojesnvn benum, “Ipoq nuku, noqg nyiilu gab, hiyam no Ijipt gvda hoqgv boolinamv bulv atv-atam kacdvb nyipup supku.

⁸‍Ngoqg bulam gaml jiknam lamta hoqgv bulv oyu kama taab wxiaq paku. Bulv hunam svv ko hvb bulv atv mvptvl hoo ham xumnv hoo pwr jibnv benum, ‘Israela, soq tulu si nulug pwnbov, hiyv nulam Ijipt gvda hoqgv boolin bov!’”

⁹‍Hoo At Sw Mojesnvn benum, “Ngo soq nyiilu sam kaapa kun, hoo kaato, soq nyiilu si lwwpo xwqda-twqn bo go.

¹⁰‍Hoqgab sija ngam vpwb apaq tukub, ho ngoqg hang lingtwrnamv bulam guduq cwrcwr dvb ceeko tayin hoo ngo bulam dvmeqtayin, ho noqg hoqgv ngo nyob hoolu koi gob mvlin tayin.”

¹¹‍Hvbmabde Mojes mwwg Pwnbog At Swn mvnyi-moiyul benum, “At Swa, noqg hang lingtwrnamv noqg nyiilug aoho hoggub guduq cwrcwr dvb ceeko dvn, hiyam noqg koijaqb swrdorxeq nyinam hoqgv la noqg alaq atoram kaakin layil Ijipt gvda hoqgv boolin kunam ham?

¹²‍Hoggub Ijipt nyi tulungam hvl bem sutayin, ‘Mwv bulam almab nyidwb hvl boolinum, bulam puutu tuluho mengdwb hoo swcw nvg ao soqgv twrdwb hvl boolinum’? Noqg bioqdu-bioqbabl hang lengnam mam apaqto hoo noqg nyiilungam soqg almab nyil ceekol ciqcaq-bviyaq dvb mvtanam hoqgv mwwkurto.

¹³‍Abrahamnvn, Aisaknvn, hoo Israelnvn, noqg nyera tulungam hiyam no atv bulam dingrwl benv hoo benum, ‘Ngo noqg hosiqkam doag takar tulu tvvb dumtwq-miilyw mvtayin, hoo ngoqg dingrnam soq gvda mwlw sam noqg hosiqkam jitayin, hoo bulv ham nwrba xaqb gumn nvvsiql bwwtayin hvnam ham mwwpa labka.’”

¹⁴‍Hoo At Sw mwwg nyiilungam ceekol ciqcaq-bviyaq dvb mvtayin hvl agam gooknam mam mwwkur kunv nyik maanum.

¹⁵‍Ho Mojes puutu hoqgv gaml wywngam taqg-taqsaqb xiqlwqnam pirr lwpia tvqnyiam mwwg alaqho joola yukul ipoql ikur kunum.

¹⁶‍Pirr lwpia tuluho Pwnbog bonam nyinamv, hoo xeqnam tulu ham Pwnbov pirr lwpia ho taql xiqlwqnum.

¹⁷‍Hwdlo Josua nyiilu sogoql dunam-xaanam mam tapa tvl, mwv Mojesnvn benum, “Svmcw bv nyob patwl dunam-xaanam hvb dudo.”

¹⁸‍Hvbmabde mwv benum, “Hoq dunam-xaanam bv nyob paiyal mviya tvl dunam-xaanam hvb duma ho nyob paiya yin sogoql xabnam hvbkam duma, hvbmabde bemin bel dunam-xaanam go ngo tapa do.”

¹⁹‍Hoo mwv svmcw ogum ho hvvnwql kaaknamv svv koam kaapanum hoo nyi tulug hoq ogumho noso soonam mam kaapa tvl Mojes vc loodab hang lengnum, hoo mwv mwwg alaqho pirr lwpia joonam ham hurpaqnum hoo hoq tulu ham puutu lvggap ho joodub kunum.

²⁰‍Mwv svv koob bulug mvpkunam mam naalayil ho ham wm lvgab parnum hoo ham putwrb twrmwqnum hoo ham iss aoho tvvs-taatwrnum hoo Israel nyiilungam ham twwmnum.

²¹‍Hoo Mojes Aaronnvn benum, “Hoggv soq nyiilu si nam nyitwl no soq nyic koibo sam bulug ao lo haam pakun?”

²²‍Hoo Aaron benum, “Ngoqg ata hang lingtwr maabv. No nyiilungam cengdo, bulv almab nyidwb mwwr kunum.

²³‍Hoggab bulv ngam benum, ‘“Ngulug otuqb wco mvdwb ngul gab pwnbo loq ak pwtbv. Soq nyi Mojesvk hvnam nyi si ngulam Ijipt gvda hoqgv boolin kunum, hoggv mwam nyipa kun ngulv cengk ma.”

²⁴‍Ho ngo bulam benum, ‘Hiyv hun gvdwn ham korsuq gvdwl jito hvnum.’ Ho bulv ham ngam jinum, hoo ngo ham wm ho jiqtwl hoo soq svv koob mvnum.”

²⁵‍Hoo hwdlo Mojes nyiilug tojamnam mam kaapa kunum (hoggab Aaron bulam tojam ko-gab bulug ceebio tulug agaho boolwq kunum),

²⁶‍ho Mojes svmcwg toggoqho daqtwl benum, “Hiyv At Sw daiyab daqdwn? Ngoqg dookub haato.” Hoo Lebig ko tuup tulungv mwam hookuml hwwiyumnum.

²⁷‍Hoo mwv bulam benum, “Soq sib Israel Pwnbo At Sw bedo, ‘Nulug lyoqr orioqkam nyiicwr-cwrxiv buqto, hoo svmcwg toggoq akwn hoqgv toggoq akwnb wkur-wxy gvdwl wto, hoo nulv nyiicwr-cwrxiv mwwg vbw-bor hoo mwwg ajin tulungam hoo mwwg door-doopwngam mengtayin.’”

²⁸‍Hoo Lebig ko tuup tuluhv Mojes gomcwr bekjaqb nyiknum. Hoo hoq aal lookin ho nyiilungv lwwyw oum go mengknum.

²⁹‍Hoo Mojes benum, “Soolo nulam At Swg bonam nyim dukub xuqlinl darxaq pakun, hoggab nulv nyiicwr-cwrxiv mwwg ko tuupwg hoo mwwg vbw-borwg koram ximab nyipa ku, ho mwv nulug aoho soolo xinam jaq lvqcam cil tayin.”

³⁰‍Aal loogwn so Mojes nyiilungam benum, “Nulv koijaqb nyic nyipa ku. Hoo ngo sija At Sw dookub wtayin; ngo nulug nyic kwly gab pwr jitayin.”

³¹‍Ho Mojes At Sw dookub hookur laikul hoo benum, “Oa, soq nyiilu si koijaqb nyic nyipa ku. Bulv atv bul gab hunam pwnbo tulub mvpa ku.

³²‍Hvbmabde sija, no bulug nyicam apaq jitbv—hvbmab nyiloqkam, anya mwwpa gvdwl ngam noqg xeql apkunam kitap hoqgv tipaq tukbv.”

³³‍Hvbmabde At Sw Mojesnvn benum, “Hiyv lajaqkam ngam ceekol nyic nyipa kun, ngoqg kitap hoqgv ngo tipaq tayin.

³⁴‍Hvbmabde sija wnku, nyiilungam nam ngoqg agam gooknum gvdaho wggwl wgta; kaato, ngoqg gumtwngv noqg otuqb wtayin. Hvbsujaqkam, hwdlo aalam ngo bulam haal kaaikam, bulug nyicam ngo bulug aoho kaatayin.”

³⁵‍Ho At Sw nyiilug aoho swlin-mominam mam kanamnum, hoggab bulv hunam svv koob mwiyw ko-gab, hoqham Aaron mvnum.