Read Nyishi DOOGIN 33 Bible Online

DOOGIN 33 - Nyishi bible

DOOGIN 33

¹At Sw Mojesnvn benum, “Wtku; soqgv wrab tuku, no la noqg nyiilungv hiyam no Ijipt gvda hoqgv boolin kunum hv, hoo wtku ngo Abraham, Aisak, hoo Jakubnvn gvda jidwb dingrko gvdab, ‘Noqg hosiqkam ngo ham jitayin.’

²‍Ngo noqg otuqb gumtwngam kanam tayin, hoo ngo Kanaan nyi tulungam, Amor nyi tulungam, Hittait nyi tulungam, Perijj nyi tulungam, Hibitait nyi tulungam, hoo Jebus nyi tulungam ruqpaq tayin.

³‍Wtw lyuminko hoo ngola biqminko gvdab wtku; hvbmabde noqg pengko ho ngo wba ram, hvbmab nyiloqkam ngo nam dvmeq tai, hoggab no lwwpo xwqda bo nyiilungv.”

⁴‍Hwdlo nyiilungv soq almanbo gomcwr sam tapa tvl bulv mwwdwqnum, hoo nyi akkam mwwg gujam gvmanum.

⁵‍Hoggab At Sw Mojesnvn benum, “Israel nyiilungam beto, ‘Nulv lwwpo xwqda bo nyiilungv; vcwr gojaqkam ngo noqg lvgab wmin gvbnyiloqkam, ngo nam dvmeq tai. Ho sija noqg gujam pipaqto, ho noqg lvgab hoggv mvtan ham ngo cengdwn.’”

⁶‍Hoqgab Israel nyiilungv bulv atv bulug gujam Horeb puutu hoqgv pibinl pipaq kunum.

⁷‍Mojes tombungam naalayil svmcw lvvgwg meeg aadoho tombungam rwwnum, hoo mwv hoqham tombu kvvrwq minsko hvl goqnum. Hoo nyiicwr-cwrxiv hiyv At Swn meegaq bov svmcw agag tombu kvvrwq minsko ho wnum.

⁸‍Hwdlo jaqkam Mojes tombub lengyikam, nyiilu mwlwngv daqrabnum, hoo Mojes tombu urab hoolup maady deedib nyiicwr-cwrxiv mwwg atwg tombu viyap ho daqnum.

⁹‍Hwdlo Mojes tombu urab haaxy kalam doomwq piuarv tiqlwl ipoqnv tombu haagaho daqdwn, hoo At Sw Mojesnvn agam goonum.

¹⁰‍Hoo hwdlo nyiilu mwlwngv doomwq piuar tiqbungam tombu haagaho daqdwb kaapa yin, nyiilu mwlwngv gorab nv mwwg atwg tombu viyap ho xumdwn.

¹¹‍Hoqhvb At Sw Mojesnvn nyiv mwwg ajinam agam goonam hvb nyuqm mam kvvrwq minsul agam goonum. Hwdlo Mojes svmcwb wkur yukun, mwam svka bo Nunwg ko tuup Josua, yaapa ak hv tombu hoqgv wleq maadwn.

¹²‍Mojes At Swn benum, “Kaato, ngam no benam, ‘Soq nyiilu sam boorabto,’ hvbmabde no hiyam ngoqg lvgab kanam nvmlwq tayin ngo ham cengma. Hvbsujaqkam no ngam benum, ‘Ngo noqg eminam cengdwn, hoo ngoqg kaaga si no mwwsw dvb nyipa kun.’

¹³‍Hoqgab sija, noqg kaagaho ngo mwwsw dvb kaapa paloqkam, anya mwwpa gvdwl noqg lamtangam ngam kaakin tvb, ho noqg kaagaho mwwsw dvb kaapa dvloqkam ngam nam cengm tvb. Mwwdy kaato soq nyob si noqg nyiilungv.”

¹⁴‍Hoo mwv benum, “Ngoqg doomin gvnamv noqg lvgab wmin gvtayin, hoo ngo nam doonu dvb jitayin.”

¹⁵‍Hoo mwv mwam benum, “Noqg doomin gvnamv ngoqg lvgab wmin gvram nyiloqkam, ngulam tolo booca maabv.

¹⁶‍Hoggub ngo la noqg nyiilungv noqg kaagaho mwwsw dvb nyid nvbo hvl ngo cengtayin? Hoqhv noqg ngulug lvgab wmin gvgam gab maas i ngulv luusaq nyiib nyidwn, ngo la noqg nyiilungv swcw nvg ao soqgv nyi asaq hoqgv luusaq nyiilu gob nyidwn?”

¹⁷‍Hoo At Sw Mojesnvn benum, “Noqg soq tuugabl goonam sam ngo nyij tayin, hoggab no ngoqg kaaga lo mwwsw dvb nyipa ku, hoo noqg eminam ngo cengdwn.”

¹⁸‍Mojes benum, “Anya mwwpa gvdwl noqg yuunam mam ngam kaakin tvb.”

¹⁹‍Hoo mwv benum, “Ngoqg albo hog mwlwngam noqg agaho wpeq mvtayin hoo ngoqg eminam noqg agaho pui bepa tayin ‘At Sw.’ Hoo ngo hiyam anya mwwpa tayin ham anya mwwpa tayin, hoo hiyam ngo aya mwwpa tayin ham ngo aya mwwpa tayin.

²⁰‍Hvbmabde,” mwv benum, “Ngoqg nyuqm mam no kaapa deema, hoggab hiyv nyiv ngam kaapa bov hv swwk maadwn.”

²¹‍Hoo At Sw benum, “Kaato, ngoqg bviywrho nyook ak doodwn hoqho no wlw ao golo daqtayin,

²²‍hoo hwdlo ngoqg yuunamv wpeq yin ngo nam wlw lwwtam golo pvvtayin, hoo hwdlo ngo hoqb wpeq maady deedib ngo nam ngoqg alaqkv momlupl aptayin.

²³‍Ho ngoqg alaqkam ngo naapaq tayin, hoo no ngoqg langkam kaapa tayin, hvbmabde ngoqg nyuqm mam kaapa ram.”