Read Nyishi DOOGIN 34 Bible Online

DOOGIN 34 - Nyishi bible

DOOGIN 34

¹At Sw Mojesnvn benum, “No atv pirr lwpia loq vnyi go otuqg hvb taqto, hoo hogloq ham no joodub kunum, ngo gomcwr tulungam otuqg pirr lwpia ho xeqnam hvb xiqlwq tayin.

²‍Aaram mam Sinai puutub caadwb mwx-mvaqto, hoo puutu niqtuq tolo no atv ngoqg ogumb haato.

³‍Nyi akkam noqg lvgab caag maabv, hoo puutu tolo nam nyi akkam kaapa komabv. Puutu tuugwn ho sviya pvtwngam ho sibin-svvngam ww dvmwl rool yvg mvmabv.”

⁴‍Ho Mojes otuqg hvb pirr lwpia vnyi go taqlin kunum. Hoo mwam At Swg gaml jik jaqb, mwv ar komc gorab layil hoo Sinai puutub caanum, hoo mwwg alaqho pirr lwpia vnyiam joonum.

⁵‍At Sw doomwq ho ipoqnv ho hoq lvgab hoqho daqnum, hoo At Swg eminam pui baqnum.

⁶‍At Sw mwwg agaho wpeqnv hoo pui baqnum, “At Sw, At Sw, aya mwwpa bvla anya mwwpa bo Pwnbov, haaxaq xaqla maadwn, hoo naleqgo tumab abynamv la dengkynamv doodwn,

⁷‍lwwyw gogab tumab abynam mam pvvdwn, nyixiaqnam mam la nyimurnam hoo nyicam apaq jidwn, hvbmabde hiyvkam nyicam mvxaq nyoram, ab tulug nyimur nyijongam ko tulug aoho hoo ko kog aoho laqm-baqm tayin, hoqhv hotam tommum tvmpy namgub haatayin.”

⁸‍Hoo Mojes nyebia jaqb mwwg dumpongam kedho pvxw banv hoo xumnum.

⁹‍Hoo mwv benum, “Ngo noqg kaagaho mwwsw dvb kaapa paloqkam, At Swa, anya mwwpa gvdwl At Sw ngulug pengko so wmin gvt bvka, hoggab ngulv lwwpo xwqda bo nyiilungv, hoo ngulug nyixiaqkam la nyicam apaq tukub, hoo ngulam noqg gumn otu gob naat kubv.”

¹⁰‍Hoo mwv benum, “Kaato, ngo pvvb birnam ak mvgyin. Noqg nyiilug kaagaho ngo swrdorxeqkam nyitayin, hoqham swcw mwlw so ho nyob hoolu pengko lo nyika maapwn. Hoo nyiilug pengko ho no At Swg bonam nyinam mam kaatayin, hoggab swrdornyi pagoqkam ngo noqg lvgab nyitayin.

¹¹“Hoggv ngo soolo nam gaml jinam ham nyil dooto. Kaato, ngo noqg kaagaho hoqgv Amor nyi tulungam, Kanaan nyi tulungam, Hittait nyi tulungam, Perijj nyi tulungam, Hibitait nyi tulungam, hoo Jebus nyi tulungam ruqpaq tayin.

¹²‍Hengab to, noqg gvda wta ko alo doonbo nyiilungam no pvvb birnam mam mvbam maabv, hoggab hoqhv noqgab pwd-poto gob nyidwn.

¹³‍No bulug yugw tulungam sapaqto hoo bulug daapo tulungam cuqpaqto hoo bulug Aserim mam patab xaato

¹⁴(hoggab nulv asaq pwnboam xumny ram, hoggab At Swg eminv kaaneq bov, ho kaaneqbo Pwnbov),

¹⁵‍hoggab no gvdaho doonbo nyi tulungam pvvb birnam mam mvbam maabv, hoo hwdlo bulv bulug pwnbo tulungam swgw yikam hoo bulug pwnbo tulungam pwr jiyikam hoo nam goqtayi, hoo no bulug pwr jinam mam dvtayi,

¹⁶‍hoo no bulug nyem koam noq nyega ko tulu gab naatayi, hoo bulug nyem kov bulug pwnbo tulungam xumtayi hoo noqg ko tulungam bulug pwnbo tulungam xum dvb mvtayi.

¹⁷“Noqgab no atv dvvcwngam pwnbo gob mvma bvka.

¹⁸“No Opap Kiilwq maab Durum dvnam ham nyidwb nyitayin. Nam ngo gaml jinam hvb Abib poolwg mood xipko jaqho aal kvn go no opap kiilwq maanam wtwngam dvtayin, hoggab Abib pool ho no Ijipt gvda hoqgv lengknum.

¹⁹‍Otuqcob ko bwwnam mwlwngv ngoqgv, otuqcob noqg tuun-mee hoqg ko bwwnam nyegangv, sibin-svv hoo sviya tulungv ngoqgv.

²⁰‍Otuqcob svdam akwg ko bwwnam mam no sviya ko lvgab pvlyw to, ho no ham pvlyw kuma baloqkam hoqg lwwpongam hiqswr to. Noqg otuqcob nyega ko vxy gab no pvlyw dvb nyitayin. Alaq asarb nyi akjijaqkam ngoqg agaho daqa maabv.

²¹‍Aal loox go no bonam nyitayin, hvbmabde kvn deen aalam no doonu tayin. Vly liid mood sujaqkam hoo vly nvvd mood sujaqkam no doonu tayin.

²²‍No Opap kiilwq maab Sookuml sool wtw dvnam mam hapta gob nyil dootayin, amj dvnam mam, hoo Jurpy Durum dvnam mam vnywngam ducum dvb nyitayin.

²³‍Israelwg Pwnbo, At Swg Pwnbo agaho noqg nyega ko tulungv vnywngam luum go haadwb nyitayin.

²⁴‍Hoqgab ngo noqg kaaga hoqgv nyob nyi tulungam ruqpaq tayin hoo noqg gvda vrram taqt dvb mvtayin; hwdlo noqg Pwnbo At Swg agaho vnywngam luum go haal kaakin taab wro yin, hiyv kam noqg gvdangam kaabil kaaneqram.

²⁵“Ngam hijum lvgab pwr aky jiyikam no opap kiilwqnam mam jimabv, ho Dvtv Durum dvdwb pwr jinam ham ar namgub doolin mvto.

²⁶“Noqg rongo hoqgv aaxy-amar lengco boam noqg Pwnbo At Swg dvrwq namlo ho baqa tayin. Ann gwwi twwdu bo noqg sibin koam dvdwb xeenu maabv.”

²⁷‍Hoo At Sw Mojesnvn benum, “Noqg lvgab la Israel lvgab ngoqg pvvb birnam gomcwr benam tulu ham xeqto.”

²⁸‍Ho mwv At Sw lvgab aal campy hoo ai campy go doonum. Mwv wtw gokam dvmanum ho iss gokam twwmanum. Hoo mwv pvvb birnam gomcwr tulu ham pirr lwpia ho xeqnum, Pvvb Wyw ham.

²⁹‍Hwdlo Mojes Sinai puutu hoqgv pvvb xeqnam pirr lwpia tvqnyiam mwwg alaqho jootwl puutu hoqgv ipoq poqdu yukho, Mojes mwv atv mwwg nyuqm vpinv kwlwq-kvlaq dvnbo hvl cengmanum, hoggab mwv Pwnbo lvgab agam goodunum.

³⁰‍Aaron la Israel nyiilungv Mojesnvn kaapanum, hoo kaato, mwwg nyuqm vpinv kwlwq-kvlaqnum, hoo bulv mwwg ogumb hvvnwq dvb bosnum.

³¹‍Hvbmabde Mojes bulam goqnum, hoo Aaron la dvparam nyigbo mwlwngv mwwg dookub hookurnum, hoo Mojes bulam agam goonum.

³²‍Kokw so Israelwg nyiilu mwlwngv ogumb haaknum, hoo At Sw mwam Sinai puutu ho hoggv xeq agam gooknum, mwv bulam gaml jinum.

³³‍Hoo hwdlo Mojes bulug lvgab agam goonya yukun, mwv mwwg nyuqm mam putumnum.

³⁴‍Hwdlo jaqkam Mojes At Swg agaho mwam agam gook dvb wikam, mwv lvvgwb lengnam gob, mwv nyuqm mam pukonum. Hoo hwdlo mwv lvvgwb lengyikun hoo hoggv mwam gaml jinum ham Israel nyiilungam betamnum,

³⁵‍Israel nyiilungv Mojesg nyuqm vpinv kwlwq-kvlaq dvb kaapanum. Hoo Mojes mwwg nyuqm mam lokta putum layil mwam agam gook dvb mwv wnum.