Read Nyishi DOOGIN 35 Bible Online

DOOGIN 35 - Nyishi bible

DOOGIN 35

¹Mojes Israelwg nyiilu mvqlwngam goqkuml hoo bulam benum, “Soq pagoq tulu sam At Sw nulam nyim dvb gaml jipa ku.

²‍Aal loox go bonam nyitayin, hvbmabde kvn deen aalam hingky jaqb Doonu de Aalv, hv At Sw gab dvrwqdvn. Hiyv lajaqkam hoq aalam bonam nyin boam sim dvb mvtayin.

³‍Doonu Aalam nulv nulug dook tuluho wm parma bvka.”

⁴‍Mojes Israelwg nyiilu mvqlwngam benum, “Soq tulu sam At Sw gaml jipa ku.

⁵‍Nulug pengko hoqgv At Swn aky jikum mvto. Hiyv lajaqkam hoolumb hang hoqgv jinw dvn At Sw gab jikumto: hun, rup, hoo tama;

⁶‍yajbo hoo lwwsa-lwwma bo, lwwcw cwwsa-cwwma bo hoo kangam bo vjam, sibin vm mvm,

⁷‍yaap tvmwr vpinam tamin neenam mam, sibin vpinam, akasiya svvdangam,

⁸‍lemp gab kutiam, darxaqnan kutiam hoo sungam bo sulum mam,

⁹‍onex wlwngam, hoo asaq xinam wlwngam jitwl lolup vjam la haabog kuiyam mvl ap mvmto.

¹⁰“Nulug pengko hoqgv jem mvlaq nyi mwlwngam haamto hoo At Swg gaml jinam mwlw ham mvmto:

¹¹‍xumk pirram, hoqg tombu ham hoo hoqg rwwtumnan ham, hoqg tooky tulu ham hoo hoqg ywrabnam tulu ham, hoqg xaapo tulu ham, hoqg swwrw tulu ham, hoo hoqg doopy tulu ham;

¹²‍hulu hoqg lyvxar tulu ham, aya mwwpa ko dootam ham, hoo rwwtumnan vjam;

¹³‍hoqg tebol lvgab lyvxar tulu ham hoo hoqg dupum-dvrab tulu ham, hoo aky wtw jinam mam;

¹⁴‍huto gab lemp dvqgwngam, hoqg dupum-dvrab pam la lemp tulu ham, hoo huto gab kuty tulu ham;

¹⁵‍hoo yugwg sulum mam la hoqg lyvxar tulu ham, hoo neexaqnan kutiam la sulum mwwnam mam, hoo viyap gab rwwtumnan vjam, xumk pirrwg viyap pam;

¹⁶‍yugw ho boyuqnam akiam, hoqg tama nyobtumnan ham, hoqg lyvxar tulu ham, hoo hoqg dupum-dvrab tulu ham, hoqg pagam mamla hoqg dvqgwnanam;

¹⁷‍hoqg baagho haqyinan ham, hoqg swwrw tulu ham hoo hoqg doopy tulu ham, hoo toggoqg rwwtumnan vj tulu ham;

¹⁸‍xumk pirr lvpia tulu ham hoo baagwg lvpia tulu ham, hoo hoqg oso tulu ham;

¹⁹‍Dvrwqbo Dook ho bonam nyidwb kangam jaqb vjam mvnam tulu ham, nyub Aaron gab dvrwqbo vj tulu ham, hoo mwwg ko tuup tulu gab vj mvnam tulu ham bulv nyubwb nyitwl bon nyitaqnan tulu ham mvmto.”

²⁰‍Ho Israelwg nyiilu mvqlwngv Mojes dook hoqgv wleq kunum.

²¹‍Hoo nyiicwr-cwrxiv mwwg hang hwrcwl jidynam mam, hoo nyiicwr-cwrxiv mwwg hang jidwb mwwbwq kunam mam bulv haaknv kvvrwq minsko tombungam mvn mvdwb, hoo hoqho bon nyin mvdwb, hoo hoqg dvrwqbo vj tulungam mvn mvdwb At Sw gab jikum kunum.

²²‍Ho nyem nyegab haaknum. Mwlwngv hiyvg hangv jidwb mwwbwqbo tulungv bulv xubtinan peqsam la nyuru gagiam hoo lvqcam hoo koojam, hoolu deed hun mvnam dupum-dvrab pam nyiicwr-cwrxiv hun akiam bwal At Sw gab darxaqnum.

²³‍Hoo nyiicwr-cwrxiv hiyv yajbo ho lwwsa-lwwma bo, ho lwwcw cwwsa-cwwma bo hoo kangam bo vjam, sibin vm mvm, yaap tvmwr vpinam tamin neenam mam, ho sibin vpinam bulam doogbov jikumnum.

²⁴‍Nyiicwr-cwrxiv hiyv rup ho tama jidy bov ham At Sw gab jikumnum. Hoo nyiicwr-cwrxiv hiyv akasiya svvda jidy bov ham bonam nyin mvdwb jikumnum.

²⁵‍Hoo vj mvlaqbo nyem vx-cwrv mwnwg alaq hoqgv hingky jaqb yajbo hoo lwwsa-lwwma bo hoo lwwcw cwwmo-cwwlo bo hoo aljaqn bo vjam jikumnum.

²⁶‍Nyem vxiv bulug hwrcw hang hoqgv sibin vm mam caqnam hoqgv jikumnum.

²⁷‍Hoo nyigbo tulungv onex wlwngam hoo asaq wlwngam, lolup pamla haabog kuiyam jikumnum,

²⁸‍hoo duiyub-dvgab nanam la huto gab kutiam, hoo neexaqnan kutiam, hoo sulum sungam boam jikumnum.

²⁹‍Israel nyiilug nyem-nyega mwlwngv hiyvg hanglo jidwb mwwbwqnam mam bulv hog gojaqkam bonam nyin mvdwb bwa jinum, ho At Sw Mojesnvn gaml begamv hoq mwlw ham atwg hang mwwlwqb At Swn aky jitwk hvl benum.

³⁰‍Ho Mojes Israel nyiilungam benum, “Kaato, At Sw Juda nyob hoqgv Hurwg ko siqda Urig ko tuup Bejalelnvn emin goql xuqlin pakun;

³¹‍hoo ngo mwam Pwnbog Yalam, nyilaq dvb la mwwlwq dvb, cenglaq dvb la mwlw jem-teriam pwbwb mvlaq mvdwb cin ywrlwql atoram jigyin,

³²‍mwwi-mwwmil mwwl hingky hunam, rupam hoo tamangam yip pwmdvb,

³³‍wlwngam la svvda tulungam taqlinl hoggub jaqb hvlap mvseql lvliq-mvmiq dvb mvtayin ham nyilaqnan atoram, hoo luuxy cwr jem-teriam bonam nyilaq mvdwb jinum.

³⁴‍Hoo mwv mwam hwrcw dvb tomswr pakun, mwam la Dan nyob hoolu hoqgv Ahisamak ko tuup Oholiyabnvn xuqlin pakun.

³⁵‍Mwv bulam hog mwlw bon nyikho pwbwb nyilaq dvb jipa kun, wlw taqnam mam, ho nyiqar harnam mam ho yajbo hoo lwwsa-lwwma bo hoo lwwcw cwwmo-cwwl bo hoo kangam albo vj hamlaqnanam, ho vj cumlaqnanam—hog mwlw bon nyilaqnanam ho mwlwngam pwbw yaab nyiqar harlaq mvdwb ator jipa kun.