Read Nyishi DOOGIN 36 Bible Online

DOOGIN 36 - Nyishi bible

DOOGIN 36

¹“Bejalel la Oholiyab hoo jem mvlaqbo nyiicwr-cwrxiv At Swg pwbwb nyilaq mvdwb cin ywrnam mam la mwwlaq cenglaql hoggub hog mwlw bonam nyil dvrwq namlongam At Swg gaml jik jaqb bonam nyirab mvdwb ator jiknum.”

²‍Hoo Mojes Bejalel nvla Oholiyab hoo At Swg nyiicwr-cwrxiam jem mvlaq mvdwb cin ywrlwqnamv hoo hiyv hangho hwrcwl bonam nyitab haady bo mwlwngam goqnum.

³‍Hoo dvrwq namlongam bon nyin mvdwb Israel nyiilungam Mojesnvn jikumnam hog mwlwngam bulv Mojes hoqgv nvvrwqnum. Bulv at mwwlwqb jinwnam mam ar roxiam hvraqb jidul doonum,

⁴‍ho dvrwq namlog bonam nyirab hoolu deediam bon nyinbo nyi mwlwngv hookumnum, nyiicwr-cwrxiv at-atwg bonam nyitab haanum,

⁵‍hoo Mojes benum, “At Sw ngulam nyim dvb gaml jinam mam nyiilungv, bonam nyid mvdwb laleq-kaakeq dvbya bwwkum jipa ku.”

⁶‍Ho Mojes gaml jinum, hoo svmcw mwlwho gomcwram pui bepanum, “Nyega jaqkam ho nyem jaqkam dvrwq namlo gab akiam jik maakam hemo to.” Ho nyiilungv aky bwanam mam hemo kunum,

⁷‍hoggab bulug dupum-dvrab jikum kunam hv bonam nyin dukub laleq-kaakeql naleq kunum.

⁸‍Hoo cin ywrnam bon pwbwb nyilaqbo nyiilungv xumk pirram vj rwwtumnan rumyw lvgab bulug pengko ho mvrab kunum. Hoq tuluhv kangam albo hoo yajbo hoo lwwsa-lwwma bo hoo lwwcw cwwmo-cwwlo bo lvgab cerubim mam hingky jaqb hvmlwql mvto.

⁹‍Rwwtumnan vj rumxig daayaram kiubit camnyi leq piin gob, hoo taqtam kiubit vpy gob mvmnum. Rwwtumnan vj mwlw hv homyin lvkinum.

¹⁰‍Mwv rwwtumnan vj rumg gon lvkin gob hvmsiqnum, hoo rumg kalam gon lvkin gob hvmsiqnum.

¹¹‍Mwv otuqg rwwtumnan vj rum hoqgv jemy niqtuqho tan nvjam jemib hiqlwqnum. Hoq hvbkalam mwv rumnyi deen vj ham jemiv hiqlwqnum.

¹²‍Mwv otuq rumho camng go jemy hiqlwqnum, hoo mwv rumnyi deen hookam camng go hiqlwqnum. Jemiam hiqko-hiqpeql hiqlwqnum.

¹³‍Hoo mwv hun peqs camng go mvnum, hoo vj rumnyi ham xwqko-xwqpeql lvkin gob xwqcupnum. Ho xumk pirrv akin hvb nyinum.

¹⁴‍Xumk pirr aoho tombu tortum nadwb mwv sibin vm mam tortumnan dvb mvnum. Mwv camleq rumkin go mvnum.

¹⁵‍Rwwtumnan vj rumxig daayarv kiubit cammum gob, hoo taqtam kiubit vpy gob mvnum. Camleq rumkin hoqg tortumnan tulug homyin lvkinum.

¹⁶‍Mwv tortumnan tulu ham rumg gon lvkin gob hvmsiqnum, hoo rumx gon kalam lvkin gob hvmsiqnum.

¹⁷‍Hoo mwv otuq rum hoqg jemy niqtuq-niqtuq jaqho jemy camng go hiqlwqnum, hoo hvbkalam rumg gonho camng go jemy hiqlwqnum.

¹⁸‍Hoo mwv tama peqs camng go tombu tulungam xwqcupnan dvb mvtwl ho ham rumkin gob kaam dvb xwqcup kunum.

¹⁹‍Hoo mwv tombungam tomlupnan dvb yaap tvmwr vpinam la sibin vpinam mvnum.

²⁰‍Ho mwv xumk pirram tuudaql daqdwb akasiya svvda hoqgv yarab kunum.

²¹‍Yarabnam vx-cwrwg daayarv kiubit camgwb, hoo taqtam kiubit papo gob mvnum.

²²‍Yarabnam hoqgv jubtaqbo vnyiam lvkin gob rubtinum. Mwv hoqg hvb nyinv xumk pirrwg yarabnam mwlwngam rubtin kunum.

²³‍Xumk pirram mwv soq sib mvknum: nyooko daiyab camnyi go yarabnum.

²⁴‍Hoo mwv hoq niikumho rup campy go doopib mvknum, ak ho vnyi-vnyi go rup doopiam vlwqnum

²⁵‍Ho xumk pirrwg taqcgon, nyoodum daiya ho mwv camnyi go yarabnum

²⁶‍hoo hoq niikumho rup campy go doopiam mvknum, ak yarabnam ho vnyi-vnyi go rup doopiam hoo dvqsin yarabnam mam vnyi-vnyi go doopiam mwlwqnum.

²⁷‍Xumk pirrwg dou-haaga daiya langk ho mwgwngam ax go yarabnum.

²⁸‍Mwv xumk pirr cuukiq tulungam mwgwnan vnyi go langk ho mvnum.

²⁹‍hoo hoq tulug lwkwngv asaq-asaqnum hvbmabde mwwlog otuqg kookwrho wrwq minsnum. Mwv hoq vnyiam soq sib mvl cuukiq kiqnyi go mvnum.

³⁰‍Rup lvgab doopiam mvnv hoqho piin go mwgwnanv yarabnum: ak-ak ho vnyi gogab vlwqnv, camleq ax go rup doopiam nyinum.

³¹‍Mwv akasiya xaapo tulungam mvnum, xumk pirr taqcgon ho mwgwnanv poong go mvnum,

³²‍hoo mwgw nadwb poong kalam go xumk pirr taqcgon ho mvnum, hoo dou-haaga daiyag xumk pirr langk ho mwgwnanv poong go mvnum.

³³‍Hoo mwv lvpag xaapongam kviyw swcwb tuur gon hoqgv tuur gon namgub mwgwnan tulungam lengmnum.

³⁴‍Hoo mwv mwgwnan tulu ham hun lvgab pioqlupnum, hoo hoq tulu gab hun hoqgv kookwram xaapo tulu ham hoqgw naadwb mwlwqnum, hoo xaapongam hun lvgab pioqlupnum.

³⁵‍Mwv yajbo hoo lwwsa-lwwma bo hoo lwwcw cwwsa-cwwma bo hoo kangam albo vjam tortumnanam mvnum; mwv hoq tuluho hingky jaqb cerubim mam hamtaql hvmlwqnum.

³⁶‍Hoo hoggab mwv akasiya swwrw dvvpy go mvnum hoo hoq tulu ham hun lvgab pioqlupnam. Hoq tulug tookiv hunv, hoo mwv hoq tulu ham rup vpy go doopiam piulwqnum.

³⁷‍Mwv tombu haagag tortumnan vjam yajbo hoo lwwsa-lwwma bo hoo lwwcw cwwmo-cwwlo bo hoo kangam albo vjam hingky jaqb peqs lvgab hvmlwqnum,

³⁸‍hoo hoqg swwrw daang lvgab tooky tulungam mwlwqnum. Mwv hoq dumtup purlwqnam tulungam joopnum, hoo hoqg rubtin nan tulungv hunv, hvbmabde hoqg doopy daang gonhv tamangv.