Read Nyishi DOOGIN 37 Bible Online

DOOGIN 37 - Nyishi bible

DOOGIN 37

¹Bejalel hulungam akasiya svvda hoqgv mvnum. Daayarv kiubit vnyi gola papo gob, taqtam kiubit ak la papo gob, hoo aongv kiubit ak la papo gob nyinum.

²‍Hoo mwv loodwrbo hun hoqgv ura-aongam pioqlupnum, hoo hun lvgab hoqg gambam ywryiqnum.

³‍Hoo mwv hun hoqgv hoqg lvpia dvvpy gab kookwr kwrpy go mvnum, kwrnyi gon taqgwn ho hoo kwrnyi gon taqgwn kalam ho vlwqnum.

⁴‍Hoo mwv akasiya lyvxar tulungam mvnum hoo hoq tulu ham hun hoqgv pioqlupnum

⁵‍hoo hulungam joon dvb lyvxar tulu ham kookwr tulu ho xwrlwqnum.

⁶‍Hoo mwv aya mwwpa ko dootam ham loodwrbo hun hoqgv mvnum. Daayarv kiubit vnyi gola papo gob, hoo taqtam kiubit ak la papo gob mvnum.

⁷‍Hoo mwv hun hoqgv cerubim vnyi go mvnum. Mwv hoq tulu ham kvnyi lvgab taql aya mwwpa ko dootam tuur-tuusaqho mwlwqnum,

⁸‍akwn cerub ham tuur gonho, hoo akwn ham tuur gon kalam ho mwlwqnum. Aya mwwpa ko dootam akin ho tuur-tuusaqb cerubim vnyiam mwlwqnum.

⁹‍Cerubim tulug alapv aoho lvbjinum, bulug alapv aya mwwpa ko dootam ham lobyum tvl doognum; bulug nyuqmv tuurwq minsnum; aya mwwpa ko dootam daiyab cerubimwg nyuqmv tuurwqnum.

¹⁰‍Mwv akasiya svvda hoqgv tebolam kam mvnum. Daayarv kiubit vnyi gob, taqtam kiubit ak gob, hoo aongv kiubit ak la papo gob mvnum.

¹¹‍Hoo mwv ham loodwrbo hun hoqgv pioqlupnum, hoo ham hun hoqgv gambam ywryiqnum.

¹²‍Hoo mwv gamb ak ham loqd akgob jwwkam dvb mvnum, hoo gambam hun hoqgv ywryiqnum.

¹³‍Mwv hun kookwr kwrpy go mvnum hoo kookwr tulu ham tebol cwwrw vpig lvpia lvpy ho kvblwqnum.

¹⁴‍Mwgwnan bviywrho kookwr tulungam paqyin tayin, hoq tuluhv tebolam lyvxar xwrlwq tvl joon tayin.

¹⁵‍Tebolam joon dvb, mwv akasiya svvdag lyvxar tulungam mvnum, hoo hoq tulu ham hun hoqgv pioqlupnum.

¹⁶‍Hoo mwv hoqg sungam dvb parnan huku-betangam hoo pwcw-uddungam mvnum, hoo hoqg pvtaq-ujuqkam hoo pumkaq-paakaq tulungam aky toolwql twwnanam loodwrbo hun hoqgv mvnum.

¹⁷“Mwv loodwrbo hun hoqgv lemptvtam nanamkam mvnum. Mwv lemptvtam nan ham kvnyi lvgab taql mvnum. Hoqg doopiam, hoqg apongam, hoqg pvtaqkam, hoqg opu guugab nanham, hoo hoqg opu tulu ham lvkin gob daakin ho mwlwqnum.

¹⁸‍Hoo hoq hoqgv haqb haqx go taqg-taqsab lengnum, haqb oum gonhv taqcgon hoqgv hoo haqb oum gonhv taqcgon hoqgv lengnum;

¹⁹‍pvtaq toqum go almond opu puudo bo hvb mvnum, vx-cwram opungam guugab tvl haqb ak ho doodwb mvnum, hoo pvtaq toqum mam almond opu puudu bo hvb mvnum, vx-cwram opungam guugab tvl haqb ak hookam doodwb mvnum—ho haqb haqxv lemptvtam nan hoqgv lengnum.

²⁰‍Hoo lemptvtam hoq daa hoqgv almon opu puulin bo hvb pvtaq tvqpy go guugab dvb mwlwqnum,

²¹‍hoo lemptvtam nanwg haqb haqxwg niikum ho hoqgv opu guugab nanhv lengnum.

²²‍Bulug opu guugab nanv la hoo bulug haqb tuluhv akin gob hoq lvgab nyinum. Hoq mwlw hv kvnyi lvgab loodwrbo hun mvnam daakin gob nyinum.

²³‍Hoo mwv kvn go lempam mvnum nyinum hoo hoqg lemp sabku tulungam hoo hoqg joonnan tulungam loodwr hun hoqgv mvnum.

²⁴‍Hoq dupum-dvrab tulu ham mwlwngam dengkil loodwrbo hun hoqgv mvnum.

²⁵‍Mwv sulum mwwk yugwngam akasiya svvn hoqgv mvnum. Hoq daayarv ak, hoo taqtam kiubit ak gob mvnum. Hoqg poop-daayarv homyinum, hoo hoqg aongv kiubit vnyinum. Hoqg tuuly tuluhv hoq lvgab akgob nyinum.

²⁶‍Mwv hoqg aongam hoo hoqg taqg-loosaqkam hoo hoqg tuuly tulungam loodwrbo hun lvgab pioqlupnum. Hoo mwv hoqg gambam hun lvgab ywryiqnum.

²⁷‍hoo hun kookwr kwrnyi go mvnum hoqg gamb niikumg tuur-tuusaqho kookwr tulu ham rublwqnum, hoo hoq ham joon nadwb lyvxar tulu joogw nadwb mvnum.

²⁸‍Hoo mwv akasiyag svvda lyvxar tulungam mvnum hoo hoq tulu ham hun lvgab pioqlupnum.

²⁹‍Mwv dvrwqbo kuty neenanam la loodwrbo sulum mwwn nanam mvnum, hoqg hv sungam boam mviyo-mvconam hvb nyinum.