Read Nyishi DOOGIN 38 Bible Online

DOOGIN 38 - Nyishi bible

DOOGIN 38

¹Mwv boyuql aky jik yugwngam akasiya svvda hoqgv mvnum. Hoqg daayarv kiubit ang, hoo taqtam kiubit ang gob mvnum. Hoqg poop-daayarv homyinum, hoo hoqg aongv kiubit oumnum.

²‍Mwv cuukiq vpyho tuuly vpy go tuulin mvnum. Hoqg tuuly tulu ham luukin hoqgv mvnum, hoo mwv ham tama hoqgv pioqlupnum.

³‍Hoo mwv yugw hoqg dupum-dvrab tulungam, pwcw tulungam, tuqn nan tulungam, pukaq tulungam, xwqgab nan tulungam, hoo loora tulungam mvnum. Mwv soq dupum-dvrab tulu sam tama hoqgv mvnum.

⁴‍Hoo mwv tama ponyiab pam tengko-tempeq dvb mvnum, hoqham yugwg gamb uraho twlwql apnum ho hoqg tengko-tempeqnamv yugwg papo namgub iknum.

⁵‍Mwv hoqg tengko-tempeqko cwwrw vpy ho tama kookwr kwrpy go cuukiq kiqxham mwlwqnum.

⁶‍Mwv lyvxar tulungam akasiya svvda hoqgv lyvxar mvknum, hoo hoq tulu ham tama lvgab pioqlupnum.

⁷‍Hoo mwv lyvxar yugw tulu hoqgv bviywrho kookwr tuluho xwrlwqnum, ho lyvxar tuluhv ham joonum. Mwv ham taqt uro dvb mvnum.

⁸‍Mwv tama pagam mam hwrxaqkob hoo hoqg dvqgwngam tama hoqgv mvnum, hoq tulu ham kvvrwq minsko tombu haagag nyem tulug vrs kookub ko hoqgv mvnum.

⁹‍Hoo mwv baagam mvnum. Nyooko daiyag baagam kangam bo vjam torp ko daayaram kiubit lwwgwb mvnum;

¹⁰‍hoq tulu ham torca nadwb swwrw camnyi go hoo tama camnyi gob doopiam piulwqnum, hvbmabde rup lvgab swwrw tulug tookiv la rubtin nanham rubknum.

¹¹‍Hoo hoq hvbkalam nyoodum daiya ho kiubit lwwgwb torp koob daayaram mvnum, hoq tulu ham torca nadwb swwrw camnyi go hoo tama camnyi gob doopiam piulwqnum, hvbmabde rup lvgab swwrw tulug tookiv la rubtin nanham rubknum.

¹²‍Hoo dou-haaga daiya hoqg tortumnan daayarv kiubit camng gob mvnum, hoqg swwrw dvvyw hv, doopy wyw hv; swwrw tulug tookiv la rubtin nanhv rupv.

¹³‍Hoo aga hoqg dou-cagag namgub kiubit camngnum.

¹⁴‍Toggoq akwn ho tortum nan lvgab swwrw doum mvla doopy oumv kiubit camleq angnum.

¹⁵‍Hoo taqgwn hoqgab. Baag toggoqg taqg-loosaqg tortum nan lvgab swwrw doum mvla doopy oumv kiubit camleq angnum.

¹⁶‍Tortumnan mwlw hv kangam bo vj tulungam tornum.

¹⁷‍Hoo swwrw tulug doopiv tamangv, hvbmabde swwrw tulu hoqg tookiv la rubtin nanhv rupv. Hoq tulu ho dumtup purlwql joopnam tulungv rupv, hoo baagwg swwrw mwlwngam rup hoqgv rubtinum.

¹⁸‍Hoo baag toggoqkam alaq hoqgv hingky jaqb hamnam yajbo hoo lwwsa-lwwma bo hoo lwwcw cwwmo-cwwlo bo hoo kangam albo vjam tortum nan gob mvknum. Hoqg daayarv kiubit camnyinum hoo hoqg taqtv kiubit ang gob aonum, hoqhv baagwg torpnam tortumnan tulu hvb nyinum.

¹⁹‍Hoo hoq tulug swwrwngv dvvpynum. Hoqg doopy vpiv tamangv, hoq tulug tookiv rupv, hoo hoq tulu aoho dumtup purlwqnam tulungam joopnum hoo hoq tulu ham rupv rubtinanum.

²⁰‍Xumk pirr nyin-mvnnan dupum-dvrab mwlwngv, hoo hoqg baagam diiyiknan mwlw hv tama hoqgv mvnum.

²¹‍Soq tulu si xumk pirram mvn nanam xeqpnam tulungv, xumk pirrwg mwi-mvcangam xeqp kunamv, soq tulu sam Mojesg gaml jik jaqb xeqpnum, nyub Aaron gv ko tuup Itamar Lebi nyi tulug nyig bob nyitwl gorgy naal nyignum.

²²‍Juda nyob hoqgv Hurwg ko siqda Urig ko tuup Bejalel Mojesnvn At Swg gaml beknam hog mwlwngam nyiknum;

²³‍hoo mwwg lvgab Dan nyob hoolu hoqgv Ahisamak ko tuup Oholiyab nyimin gvnum, wlw taqlaq boam, ho nyiqar harn boam ho yajbo hoo lwwsa-lwwma bo hoo lwwcw cwwmo-cwwl bo hoo kangam albo vj hamlaq boam jiknum.

²⁴‍Dvrwq namlo gab hun bonam nyin kunam mwlwngam, hun aky jinam ham xikumnamv camnyi leq kiya twngk gola 730 sikil gob nyinum, hoqhv dvrwq namlog sikil lv.

²⁵‍Nyi tulu hoqgv rup jikumnamv rup lwwg telent gobla 1,775 sikil gob nyinum, hoqhv dvrwq namlog sikil lv:

²⁶‍dvrwq namlongam nam mvn mvdwb nyi vnyw camnyi hoqgv naalayil hoq odum mam nyiicwr-cwrxiam aky jinboam xikal xiqkumnamv 603,550 gob nyinum.

²⁷‍Dvrwq namlo doopiam yvqlwqnanv la doopiam tortumnanv rup twngk lwwgwb nyinum; doopy lwwg gab twngk lwwg, doopy ak gab twngk barg.

²⁸‍Hoo 1,775 sikil go mwv swwrw tulu gab tookiam hoo dumtup purlwqnam tulungam joopnum hoo hoq tulu gab rubtin nan tulungam mvnum.

²⁹‍Tama aky jikum kunamv twngk camkvn gola 2,400 sikil gob nyinum;

³⁰‍hoqg lvgab mwv kvvrwq minsko tombu haagag doopiam, tama yugwngam la tama ponyiab pam hoo yugw hoqg dupum-dvrab mwlwngam tama hoqgv mvnum,

³¹‍baag doopiam, hoo baag toggoqkam, xumk pirrwg tooky haqyinan tulu ham, hoo baag hoq tooky haqyinan tulu ham tama hoqgv mvnum.