Read Nyishi DOOGIN 39 Bible Online

DOOGIN 39 - Nyishi bible

DOOGIN 39

¹Dvrwqbo Dook ho kootwl bon nyitaqnan vjam yajbo hoo lwwsa-lwwma bo hoo lwwcw cwwmo-cwwlo bo tan hoqgv bulv aljaqn bo vjam cumnum. Bulv Mojesnvn At Swg gaml bek jaqb Aaron gab dvrwqbo vj tulungam mvnum.

²‍Mwv hunwg lolup pam, yajbo hoo lwwsa-lwwma bo hoo lwwcw cwwmo-cwwlo bo, hoo albo tan hoqgv mvnum.

³‍Hoo bulv hunam ok hvb kvnyi lvgab jwwjab tvl, hoo mwv ham tan hvb soonyio koodwb twqlin layil yajbo hoo lwwsa-lwwma bo hoo lwwcw cwwmo-cwwlo bo, hoo albo tan tulu lvgab anya jaqb riiyo-riiconum.

⁴‍Bulv lolup pam vnyi go mvnum, ho hoqg niqtuqkam lvkin gob hvmsiqnum.

⁵‍Hoo At Sw Mojesnvn gaml jinam hvb bulv hun, yajbo hoo lwwsa-lwwma bo hoo lwwcw cwwmo-cwwlo bo, hoo albo tan tulu hoqgv pusam luukin aiyin dvb hingky jaqb cumknum.

⁶‍Bulv onex wlw tulungam mvnum, Israelwg ko tuup tulungam wlw ho tvqlwqnum, hoggub morx lvqcam yip pwnbov hingky jaqb pwnam hvb tvqtwqnum, hoo ham hun lvgab putuml apnum.

⁷‍Hoo At Swg Mojesnvn gaml bekjaqb mwv hoq wlw tulug gorbw aoho lolup pam cumlwqnum, ho hv Israelwg ko tuup tulungam mwwpa dvb nyinum.

⁸‍Mwv haabog kuiyam hingky jaqb mvnum, lolup mwcw jaqb, hun, yajbo hoo lwwsa-lwwma bo hoo lwwcw cwwmo-cwwlo bo, hoo albo tan tulu hoqgv ham mvnum.

⁹‍Hoqhv poop-daayar homyinum. Bulv haabog kuiyam cwrkap dvb mvnum, hwdlo cwrkap yin hoqg daayarv haqg kiya gob nyinum hoo hoqg taqtv haqg kiya gob nyinum.

¹⁰‍Hoo bulv hoqho wlw ham jvpy gob paacanum. Otuq jabho sardius, topaj, hoo karbunkel tulungam pvvlwqnum;

¹¹‍hoo jvbnyi deenho emerald, sappir, hoo viyinam pvvlwqnum;

¹²‍hoo jobum deenho jakin, agate, hoo ametisam pvvlwqnum;

¹³‍hoo jvpy deenho beril, onex, hoo jasparam pvvlwqnum. Hoq tulu ham hun putumko lwkw ho apnum.

¹⁴‍Hoqho wlw camleq pwnyi go Israelwg ko tuup tulug eminam gab doomnum. Hoq tuluhv morx lvqc hvb nyinum, camleq vnyig nyob tulu ham ak-ak ho hoqg eminam xiqlwqnum.

¹⁵‍Hoo bulv haabog kuiyam dvrwqbo hun gai loq tuko-tupeql tulwqnum.

¹⁶‍Hoo bulv haabog kui gab hun lvgab kookwr kwrnyig mvnum, hoo kookwr kwrnyiam haabo kuiywg gamb ho kvrlwqnum.

¹⁷‍Hoo bulv haabog kuiywg kookwrho hun axangam mwlwqnum.

¹⁸‍Bulv tuur-tuusaqb axa ham hunwg putum nanho hoq-gabnum. Hog gab bulv lolup vjwg agaho kaapa dvb mwlwqnum.

¹⁹‍Ho bulv hun lvgab kookwr kwrnyi go mvnum, hoo hoq tulu ham haabog kuiyam tuur-tuusaqb hoq-gabnum, hoq ham lolup dvqsin uraho doomnum.

²⁰‍Hoo bulv hun lvgab kookwr kwrnyi go mvnum, hoo hoq tulu ham lolup vnyig akog jemy odumho hingky jaqb cumlwqnum.

²¹‍Hoo At Sw Mojesnvn gaml bekjaqb bulv haabo kuiywg kookwram lolup kookwrho yajbo pus lvgab ham tvl apnum, ho hoqhv hingky jaqb alaq lvgab lolup vjho cumlwqnum, ho haabog kuiyv lolup hoqgv hwdlo kam pusuq maanum.

²²‍Mwv lolup kamt tulu hamkam yajbo tan hoqgv cumnum,

²³‍Hoo lvpa ra ho dumpo tulwqko ungngam mvkonum, ho ham puceq mvma dvb cumnam vj hoqgv hiqcubnanam hvmlwqnum.

²⁴‍Kamt jemy niqtuqho yajbo, lwwsa-lwwma bo hoo lwwcw cwwmo-cwwlo bo hoo kangam albo tan hoqgv bulv annar aaxiam hvmlwqnum.

²⁵‍Bulv loodwrbo hun riinyiam mvnum, hoo riinyiam annar aaxy pengko-pengko ho kamt rumpwho hvmlwql hvmyiq lwqnum—

²⁶‍At Sw Mojesnvn gaml bekjaqb riinyi ak hoo annar aaxy ak hamko-hampeql bon nyin mvdwb kamt rumpwho hvmlwq kunum.

²⁷‍Bulv Aaron gab la mwwg ko tuup tulu gab kam aljaqn bo lvlwqkam cumjnum,

²⁸‍hoo albo dumlupam, hoo albo bopyangam, hoo albo ura vj koosam,

²⁹‍hoo At Sw Mojesnvn gaml bekjaqb albo pusam hoo yajbo hoo lwwsa-lwwma bo hoo lwwcw cwwmo-cwwlo bo tan hoqgv tonab hingky jaqb cumknv hvmjnum.

³⁰‍Bulv loodwrbo hun beta golo morx lvqcam taqnam hvb xeql, “At Sw gab Dvrwq dvn.” hvl tvqlwqnum.

³¹‍Hoo At Sw Mojesnvn gaml bekjaqb bulv ham dumlup aoho yajbo tan lvgab hwwtinum.

³²‍At Sw Mojesnvn gaml bekjaqb xumk pirr kvvrwq minsko tombug bonam nyinya kunum, hoo Israel nyiilungv bulv gaml bekjaqb nyiknum.

³³‍Ho bulv xumk pirram Mojesnvn joa jinum, tombungam la hoqg dupum-dvrab mwlwngam, hoqg tooky tulungam, hoqg mwgwnan tulungam, hoqg xaapo tulungam, hoqg swwrw tulungam, hoo hoqg doopy tulungam;

³⁴‍tombungam rwwtumnan yaap tvmwr vpinam tamin neenam tulu ham hoo sibin vpin tulu ham, hoo vj tortumnan tulu ham;

³⁵‍pvvb wyw uddum lvgab hoqg lyvxar tulu ham hoo aya mwwpa ko dootam mam;

³⁶‍tebol lvgab hoqg hog mwlw dupum-dvrab pam, hoo lwxiam wtwngam doomnam mam;

³⁷‍loodwrbo hun hoqgv lemptvtam nanham hoo hoqg lemp lvgab lemp tulu ham hoo hoqg dupum-dvrab pam, hoo huto gab kuty tulu ham;

³⁸‍hun yugw ham, neenan kuty ham hoo sungam bo sulum mwwnan ham, hoo tombu haagag tortumnan vj ham;

³⁹‍tama yugw ham, hoo tama ponyiab ham, hoqg lyvxar tulu ham, hoo hoqg hog mwlw dupum-dvrab pam; hursko pagam ham hoo hoqg dvqgwnan ham;

⁴⁰‍baag ho haqyinan ham, swwrw tulu ham, hoo hoqg doopy tulu ham, hoo baag toggoqkam tortumnan vj tulu ham, hoqg osongam, hoo hoqg tortum nanham; hoo kvvrwq minsko tombug xumk pirr bon nyinan hog mwlw dupum-dvrab pam;

⁴¹‍Dvrwqbo Dook ho bonam nyitaqnan kangam bo vj tulu ham, nyub Aaron gab dvrwqbo vj tulu ham, hoo mwwg ko tuup tulug nyubwb nyitwl bon nyitaqnan vj tulu ham mvknum.

⁴²‍At Sw Mojesnvn gaml bekjaqb Israel nyiilungv hog mwlw bonam nyinum.

⁴³‍Hoo Mojes bonam mwlwngam kaanum, hoo kaato, At Swg gaml bekjaqb bulv hog mwlwngam nyinum, bulv bonam nyiyum kunum. Ho Mojes bulam lvqc ciknum.