Read Nyishi DOOGIN 4 Bible Online

DOOGIN 4 - Nyishi bible

DOOGIN 4

¹Ho Mojes birwqnum, “Hvbmabde, kaato, bulv ngam mwwjwram ho ngoqg benam mam tvjwram, hoggab bulv betayin, ‘At Sw nam daqlinl kaakin ma.’”

²‍At Sw mwam benum, “Hoggv noqg alaqho doodo?” Mwv benum, “Beqnyia daag.”

³‍Hoo mwv benum, “Ham kedho hurp to, hoo hv tvb soogwb nyinum, hoo Mojes hoq hoqgv keginum.

⁴‍Hvbmabde At Sw Mojesnvn benum, “Noqg alaqkv ilin gvdwl hoqg amiam nootuto”—mwwg alaqkam ilin banv hoqham mwv nootunum, hoo hv mwwg alaqho beqnyia daagwb nyiknum—

⁵“ho bulug ab tulug Pwnbo, Abraham gv Pwnbo, Aisakwg Pwnbo, hoo Jakubg Pwnbo, At Sw nam daqlinl kaakin pakun hvl bulv mwwjw tayin.”

⁶‍At Sw lokta mwam benum, “Noqg alaqkam noqg kamt cuk urab ilwqto.” Hoo mwwg alaqkam mwwg kamt cuk urab mwv ilwqnum, hoo hwdlo mwwg alaqkam cuk hoqgv laqlin yukho, kaato, mwwg alaqkv tapam hvb tviyiq nyiknum.

⁷‍Ho Pwnbov benum, “Noqg alaqkam noqg kamt cuk urab ikurl ilwqto.” Ho mwwg alaqkam mwwg kamt cuk urab mwv ikurl ilwqnum, hoo hwdlo mwv ham laqlin yukho, kaato, hoqhv otuqg mwwg gv vdin hvb nyiknum.

⁸“Bulv nam mwwjw mabaloqkam,” Pwnbo benum, “Otuq swrdorxeq ham tvjw mabaloqkam, bulv kokwg ak sam mwwjw tayin.

⁹‍Bulv soq swrdorxeq vnyi sam mwwjw maab ho noqg goonam mam tvjw maab nyiyi nyiloqkam, no Nail hoqgv iss loq meeg naato hoo ham pwtw bo kedho toopto, hoo noqg Nail hoqgv iss naanam hv pwtw bo kedho uiyib nyitayin.”

¹⁰‍Hvbmabde Mojes At Swn benum, “Ngoqg At Swa, ngo pwbwb agam goolaq ma, otuq hookam ho noqg nyerangam noqg agam gooxo sookam, hvbmabde ngo nyinyiaq jaqb agam doodwn hoo ngo lyongaq bov.”

¹¹‍Ho At Sw mwam benum, “Hiyv nyi tulug agam mam mvn bov? Hiyv mwam agam goolaq maadwb, ruutar dvb, kaam dvb, ho nyiqca dvb mvn bov? Hoqham ngo ma i, At Sw mvn bov?

¹²‍Hoqgab sija wn, hoo ngo noqg agam ho dooba tayin hoo nam tomswr tayin hoggv no agam gootayin.”

¹³‍Hvbmabde mwv benum, “Ngoqg At Swa, anya mwwpa gvdwl nyi asaq loq ak kanam to.”

¹⁴‍Ho At Sw Mojesnvn hang lengnum hoo mwv benum, “Noqg vbw Lebi nyi Aaron alo dooma dvn yv? Ngo cengdo mwv pwbw jaqb agam goolaqdvn. Kaato, mwv nam kvvrwqtab lingdu do, hoo hwdlo mwv nam kaapa yin, mwwg hangho mwv hwnyir-hvmar tayin.

¹⁵‍No mwam agam gootayin hoo mwwg agamho gomcwr tulu sam bilwqto, hoo ngo noqg agam hoola mwwg agamho dooba tayin hoo nunyi vnyi-vnyiam tomswr tayin hoggv nyitayin.

¹⁶‍Mwv noqg bid gab nyiilungam agam gootayin, hoo mwv noqg agam bidam betayin, hoo no mwwg Pwnbo hvb nyitayin.

¹⁷‍Hoo noqg alaqho soq beqnyia sam bwwto, soq lvgab no swrdorxeqkam nyitayin.”

¹⁸‍Mojes mwwg at akwg Jetro dookub hookur kunv hoo mwam benum, “Ngam anya mwwpa gvdwl ngoqg vbw-bor dookub Ijiptwb wm tvbv, bulv alwb swwl dood nviya bwdwq kaaka taden.” Hoo Jetro Mojesnvn benum, “Swrsob wn.”

¹⁹‍Hoo At Sw Mojesnvn Midianho benum, “Ijiptwb wkur tuku, hoggab noqg swwgam meekar bo nyi mwlwngv sin kuba.”

²⁰‍Ho Mojes mwwg nywxwngam hoo mwwg ko tulungam svdam aoho baqm tvl Ijipt gvdab wknum. Hoo Mojes mwwg alaqho Pwnbog beqnyiangam bwwl wgnum.

²¹‍Hoo At Sw Mojesnvn benum, “Hwdlo no Ijiptwb wkur yukun, kaato ngoqg nam ator jiknam ham, no Parog agaho swrdorxeq mwlwngam nyidwb nyitayin. Hvbmabde ngo mwwg hangam kamtwr mvtayin, ho mwv nyiilungam wlin mvram.

²²‍Ho no Paronvn betayin, ‘Soq sib At Sw bedo, Israelv ngoqg ko tuup vbw cociqkv,

²³‍hoo ngo nam bedwn, “Ngoqg kongam wwm to ho mwv ngam xumtayin.” No mwam wwm mvmab bitur baloqkam, kaato, ngo noqg ko tuup vbw cociqkam mengpaq tayin.’”

²⁴‍Lamta doonu ko nyookho At Sw mwam wrwqnum hoo mwam mengpaq dvb meegaqnum.

²⁵‍Hoo Jippora wlw hvreqbo ak naalayil mwnwg ko tuupam vpin niqtuqkam pepaql-mux mvnum hoo pepaqnam vpinam Mojesg lvpiaho tvdaq tvl benum, “Jvqtw jaqb hijum soqgv no ngoqg lyalo ngvku!”

²⁶‍Ho mwam vp-cwkwb mwv doomnum. Ho mwn benum, “Hijumg lyalo akv ku,” hoggab pepaql-muxnam gab.

²⁷‍At Sw Aaronnvn benum, “Mojesnvn kvvrwqtab deexa-rarab wto.” Ho mwv wnum hoo mwam Pwnbog puutu ho wrwqnum hoo mwam moopupnum.

²⁸‍Hoo At Swg gomcwr mwlwngam Mojes mwam roolwq tvl agam goom tanam ham Aaronnvn betam kunum, hoo swrdorxeq mwlwngam mwam nyim dvb mwwg gaml jinam ham betamnum.

²⁹‍Ho Mojes la Aaron wknv Israelwg nyiilu axangam lvkin gob goqkumnum.

³⁰‍Aaron At Swg Mojesnvn gomcwr gooknam mwlwngam gootamnum hoo swrdorxeqkam nyiilug kaagaho nyinum.

³¹‍Hoo nyiilungv mwwjwnum; hoo hwdlo bulv At Sw Israel nyiilungam haal kaan mvk hvl hoo mwv bulug hentwr-kaasam kaapa namvk hvl tapa yin, bulug dumpongam bulv pvxwl hoo xumnum.