Read Nyishi DOOGIN 40 Bible Online

DOOGIN 40 - Nyishi bible

DOOGIN 40

¹At Sw Mojesnvn agam goonv begamv,

²“Otuq poolwg otuq aalam no kvvrwq minsko tombug xumk pirram diirab tayin.

³‍Hoo no hoqho pvvb wywngam vlwql aptayin, hoo no hulungam vj lvgab tortum tayin.

⁴‍Hoo no tebolam bwa layil hoo ham mwx-mvaql aptayin, hoo no lemptvtam nanham bwa layil hoo lemp tulungam hoqho aptayin.

⁵‍Hoo no sulum mwwk hun yugwngam pvvb uddumg agaho joop tayin, hoo xumk pirr viyap pam vj tortuml aptayin.

⁶‍No boyuqnam aky jik yugwg xumk pirr kvvrwq minsko tombug viyap agaho mvl aptayin,

⁷‍hoo hursko pagam mam kvvrwq minsko tombu gvla yugwg pengko ho mvptayin, hoo hoqho iss loq aptayin.

⁸‍Hoo no baagam taqg-loosaqb mvl aptayin, hoo baag toggoqg tortum nanam torptayin.

⁹“Hoo no neenanam kuty naatayin hoo xumk pirram la hoqho doonbo mwlwngam neetayin hoo hoqham la hoqg mwlw dootam-daqtamnan garxaqtayin, ho hoq tuluhv dvrwq tayin

¹⁰‍No boyuqnam aky yugwngam hoo hoqg hog mwlw dupum-dvrab pam kuty neel hoo yugwngam garxaqtayin, ho yugwngv dvrwq kwrwq tayin.

¹¹‍No hursko pagam mam hoo hoqg twgwnan tulu ham kuty neel garxaqtayin.

¹²‍Ho no Aaron nvla hoo mwwg ko tuup tulu ham kvvrwq minsko tombu haagaho boalayil bulam iss lvgab hwrxaq tayin

¹³‍hoo Aaronnvn dvrwqbo vj tulu ham koom tayin. Hoo no mwam kuty neel mwam garxaqtayin, ho mwv nyub gob nyitwl ngam bon nyij kodub.

¹⁴‍No mwwg ko tuup tulungam kam booa layil bulam lvlwq kamtam koom tayin,

¹⁵‍hoo bulug abam no kuty neenam hvb bulam kuty neetayin, ho bulv nyubwb nyitwl ngam bon nyij kodub. Hoo bulam kuty neenam hv bulam kuiyum namgub bulug hotam-hotam xaqb nyubwb swwm dvb mvknamv.”

¹⁶‍Soq sam Mojes nyiknum; mwam At Swg gaml bekjaqb mwv nyinum.

¹⁷‍Vnyw nywnyi deenwg otuq poolwg otuq aalho xumk pirram diirab kunum.

¹⁸‍Mojes xumk pirram diirab kunum. Mwv hoqg doopiam ywrgab kunum, hoo hoqg mwgw tulungam mvrab kunum, hoo hoqg lyvxar tulungam xwrlwq kunum, hoo hoqg swwrw tulungam diilwq kunum.

¹⁹‍Hoo At Sw Mojesnvn gaml bekjaqb mwv tombungam xumk pirram tomlup kunum hoo tombungam hoqg aoho rwwlwql putum kunum.

²⁰‍Mwv pvvb wywngam naaknum hoo ham hulu urab vlwqnum, hoo lyvxar tulungam hulu aoho xwrlwqnum hoo aya mwwpa ko dootam ham hulu aoho joopnum.

²¹‍Hoo At Sw Mojesnvn gaml bekjaqb mwv hulungam xumk pirr urab joanum hoo tortumnan vjam mvnum, hoo pvvb wyw uddum mam vjv torlupnum.

²²‍Mwv kvvrwq minsko tombug nyoodum daiyag xumk pirram vj tortumko lvvgho tebolam joopnum,

²³‍hoo At Sw Mojesnvn gaml bekjaqb At Swg agaho wtwngam mwx-mvaql apnum.

²⁴‍Mwv lemptvtam nanham kvvrwq minsko tombug nyooko daiyag xumk pirrwg taqcgon ho tebol apnum,

²⁵‍hoo At Sw Mojesnvn gaml bekjaqb lemp tulungam At Swg agaho apnum.

²⁶‍Mwv hun yugwngam kvvrwq minsko tombug vj tortumko agaho apnum,

²⁷‍hoo At Sw Mojesnvn gaml bekjaqb sungam bo sulum mam hoqho mwwnum.

²⁸‍Mwv xumk pirr viyap gab tortumnan vjam mwlwqnum.

²⁹‍Hoo At Sw Mojesnvn gaml bekjaqb mwv boyuqnam aky jik yugwngam kvvrwq minsko tombug xumk pirr haagaho joop kunum, hoo hoqho boyuqnam akiam hoo dvs akiam jinum.

³⁰‍Mwv hursko pagam mam kvvrwq minsko tombu gvla yugwg pengko ho mvl apnum, hoo hoqho hurs dvb issam pvvnum,

³¹‍hoqho Mojes la Aaron hoo mwwg ko tuup tulungv bulug all-alaqkam hursnum.

³²‍At Sw Mojesnvn gaml bekjaqb bulv kvvrwq minsko tombub wikam, hoo bulv yugwb hvvnwq yukam bulv hursnum.

³³‍Hoo mwv xumk pirram la yugwg taqg-loosaqg baagam diirab kunum, hoo baag toggoqkam vj lvgab tortumnum. Ho Mojes bonam nyiyum kunum.

³⁴‍Ho kvvrwq minsko tombungam doomwqkv pulupnum, hoo At Swg yuunamv xumk pirram hwrlupnum.

³⁵‍Hoo kvvrwq minsko tombungam doomwq pulupl doog ko-gab Mojes urab haanyi maanum, hoo At Swg yuunamv xumk pirram hwrlupnum.

³⁶‍Bulug nyiody book mwlwho, hwdlo doomwqkam xumk pirr hoqgam aob naaca yukam, Israel nyiilungv bulug nyiodam boorab kunum.

³⁷‍Hvbmabde doomwqkam naaca maaikam, ho bulv hwdlo aal namgub naaca maady deedib, bulv wrab maab doonum.

³⁸‍Hoggab Israel nyiilungv kaapa dvb bulug nyiody book mwlwho, At Swg doomwqkv aalam xumk pirr aoho doonum, hoo aiyam wmmwb nyitwl doonum.