Read Nyishi DOOGIN 5 Bible Online

DOOGIN 5 - Nyishi bible

DOOGIN 5

¹Kokw so Mojes la Aaron Paro dookub wnum, “Soq sib Israelwg Pwnbo, At Sw bedo, ‘Ngoqg nyiilungam tolin tukub, ho bulv ngoqgab deexa-rara alo durum dvtayin.’”

²‍Hvbmabde Paro benum, “At Sw hiyv, ho mwwg agam mam ngo tvjwl hoo Israelam tolin deen bov? Ngo At Swn cengma, hoo hoq aoho, ngo Israelam tolin ram.”

³‍Ho bulv benum, “Hibrug Pwnbov ngulam kvvrwqnum. Anya mwwpa gvdwl ngulam aal loum go wnam gob wgdvl deexa-rara alo ngulug Pwnbo At Swn pwr jim tvbv, hvbmab nyiloqkam ngulug aoso dooi-palam maalo nyob panamv haatayi.”

⁴‍Hvbmabde Ijipt gv lvpw atv bulam benum, “Mojes la Aaron nunyi, hog nyitwl nulv nyiilungam bulug bonam nyik hoqgv boogin gvdwn? Nulug bon nyikwb wkur nuk.”

⁵‍Hoo Paro benum, “Kaato, gvdag nyiilungv sija naleqdo, hoo nulv bulam bulug bon nyik hoqgv hog nyitwl doonu mvdvn!”

⁶‍Hoq aal lookin ho Paro bonam kanam nvmlwq boam la bulug bon nyigbo nyiilungam gaml jinum,

⁷“Nulv nyiilungam otuqg hvb hita mvn mvdwb am piil jikmabv; bulam atam wgdvl am piilam boqkum mvto.

⁸‍Hvbmabde otuq ho bulv hog hwdwg hita mvlinum hwdgo hvraqb mvlin mvdwb gaml jito, nulv hoggub nyijaqkam ham kumwq dvb mvm mvmabv, hoggab bulv sepy do. Hoqgab bulv xabl sogoql bedo, ‘Ngulam wwm tvb hoo ngulug Pwnboam pwr jita deen hvdo.’

⁹‍Nyi tulungam koi-koi yaiya go bonam nyim dvb jito ho bulv ham nying ngv tvl vm mvvnam mam mwwpa ram.”

¹⁰‍Ho bonam kanam nvmlwqbo tulungv la nyiilungam bon nyigbo tulungv wnv hoo nyiilungam benum, “Soq sib Paro bedo, ‘Ngo nulam am piil jikram.

¹¹‍Nulv atv wgdvl hog loq kvjaqkam at-atv am piilam meepal naato, hvbmabde nulv otuqho hog hwdgo hitangam mvnum hwdgo hvraqb mvlin dvb nyiky tayin.’”

¹²‍Ho nyiilungv Ijipt gvda mwlwho cwrsaq twqb piakar kunv am piil nookuml yvnum.

¹³‍Bonam kanam nvmlwqbo tulungv nwwteql bon nyitwk hvl benum, “Hwdlo am piilv dooikam, nulam aal loongam bonam nyiyum mvdwb jinam ham nyiyum dvb nyito.”

¹⁴‍Hoo Israel nyiilungam bonam nyigbo tulungam Parog bonam kanam nvmlwqbo tulungv xinyiaq mvtwl hoo toxnum, “Otuqho hita mvnam hwdgo nulv hog nyitwl moiyo la soolo hita mvmanum?”

¹⁵‍Ho Israel nyiilungam bonam nyigbo tulungv Paron haanv xabkinum, “Noqg nyera tulungam no hoggub soq sib mvmin gvdwn?

¹⁶‍Noqg nyera tulungam am piilam jikma, hvbsujaqkam bulv begamv, ‘Hitangam mvto hvnum!’ Hoo kaato, noqg nyera tulungam xinyiaql mvpa; hvbmabde nyixiaqnamv noqg atwg nyiilu aoho doodo.”

¹⁷‍Hvbmabde mwv benum, “Nulv sepy do, nulv sepy do; hoqgab nulv bedo, ‘Ngulv wgdvl hoo At Swn pwr jitaj hvdwn.’

¹⁸‍Wgdvl hoo bonam nyita. Nulam am piil jikram, hvbmabde nulv kenlo hog hwdwg hita mvlinum hwdgo hvraqb mvlin dvb nyiky tayin.”

¹⁹‍Hwdlo Israel nyiilungam bonam nyigbo nyi tulungv hentwr-kaasam kaapa tvl hoo bulv benum, “Nulv hoggub nyijaqkam hita mvnam mam kumwq mvdwb nyiram, nulug aal loo loongam mvlinam ham mvlin dvb nyiky tayin.”

²⁰‍Bulv Mojes nvla Aaronnvn kvvrwqnum, hiyv bulam kaaya yaal doonum Paro dook hoqgv lengm tvl kvvrwq dvb hvl;

²¹‍hoo bulv bulam benum, “At Sw nulug aoho kaanum hoo hvvky swwnum, hoggab nulv ngulam Parog vnyiq kaagaho tvi-taga ponam hvb mwwg nyera tulungam pom paku, hoo bulug alaqhv lyoqr orioqkam gvqlwq tukul ngulam mengta duku.”

²²‍Ho Mojes At Swn doqkurnv hoo benum, “At Swa, hog gab no soq nyi tulu sam almab nyipa kun? Hog gab no ngam so kanamnum?

²³‍Hoggab hwdlo ngo Paro dook so haal noqg eminam agam goonum, mwv soq nyiilu sam almab nyipa ku, hoo noqg nyiilu sam no sija godab naalin kuma.”