Read Nyishi DOOGIN 6 Bible Online

DOOGIN 6 - Nyishi bible

DOOGIN 6

¹Hvbmabde At Sw Mojesnvn benum, “Hoggv ngo Paronvn nyitayin sija no kaaya to; atorbo alaq hoqgv bulam roolin tayin, hoo atorbo alaq lvgab bulam mwwg gvda hoqgv boolin tayin.”

²‍Pwnbov Mojesnvn agam goonum hoo mwam benum, “Ngo jaq At Swv.

³‍Mwlwngam koi yaanbo Pwnbo gob, ngo Abrahamnvn, Aisaknvn, hoo Jakubnvn kaakinum, hvbmabde ngoqg eminam hoqgv At Sw atv bulam cengm mvmanum.

⁴‍Ngoqg pvvb birnamv Kanaan gvdangam bulam jidwb hvnam mam ngo mvko pakun, hogloq gvdaho bulv nyoodo nyi hvb doonum.

⁵‍Hoq aoho, Ijipt nyi tulungv Israel nyiilungam raasur gob parl apnum, hoqgv bulug sigin gingnam mam ngo tapa paku, hoo ngoqg pvvb birnam mam ngo mwwpanum.

⁶‍Hoqgab Israel nyiilungam bedo, ‘Ngo jaq At Swv, hoo ngo nulam Ijipt nyi tulug bon nyimnam ura hoqgv boolin tayin, hoo ngo nulam raasurb nyimnam hoqgv naalin tayin, hoo ngo nulam alaq yvmjinl hoo koibo pw-hwwnam bon tulungam nyigdvl pvlyw tayin.

⁷‍Ngo nulam ngoqg nyiilu gob naatayin, hoo ngo nulug Pwnbob nyitayin, hoo ngo nulug Pwnbo At Sw jaqkv hvl nulv cengtayin, hiyv Ijipt nyi tulug bon nyimnam ura hoqgv boolin bov hvl.

⁸‍Ngo Abrahamnvn, Aisaknvn, hoo Jakubnvn dingrnum gvdaho ngo nulam boolwq tayin. Ngo ham nulam gumn bwwm dvb jitayin. Ngo jaq At Swv.’”

⁹‍Hoqgab Mojes Israel nyiilungam agam goonum, hvbmabde bulv Mojesnvn tvjw kumanum, hoggab bulam silo tors dvb raasur gob bon nyim ko-gab, bul pvnyi dook maanum.

¹⁰‍Ho At Sw Mojesnvn benum,

¹¹“Wn, Ijipt gv lvpw atam beta, Israel nyiilungam mwwg gvda hoqgv tolin tuku.”

¹²‍Hvbmabde Mojes At Swn benum, “Kaato, Israel nyiilungv ngam tvjw kuma. Hvnyiloqkam Paro ngam hoggub tvjw tayin, hoggab ngo agam pwbwb goolaq maanbo nyiingv?”

¹³‍Hvbmabde Ijipt gv lvpw at Parog pagoq gab, At Sw Mojes nvla Aaronnvn agam goonv hoo Israelwg nyiilu gab bulam yolu ruqnum: Israel nyiilungam Ijipt gvda hoqgv boolin mvdkub.

¹⁴‍Soq tulu si bulug imiq dvpar hoqg abv: Israelwg ko tuup vbw cociq Reubenwg ko tuupv: Hanok, Pallu, Hejron, hoo Karmi; soq tulu si Reubenwg nyob hoolungv.

¹⁵‍Simeon gv ko tuupv: Jemuyel, Jamin, Ohad, Jakin, Johar, hoo Soul, Kanaan nyem hoqgv ko tuupv; soq tulu si Simeon gv nyob hoolungv.

¹⁶‍Soq tulu si Lebi gv ko tuup tulug eminv bulug hotam-hotam hoqgv: Gerson, Kohat, hoo Merari, Lebi 137 vnyw gob swwl doonum.

¹⁷‍Gerson gv ko tuupv: Libni la Simei, bulug nyob hoolungv.

¹⁸‍Kohat gv ko tuupv: Amram, Ijar, Hebron, hoo Ujjiyel, hoo Kohat 133 vnyw gob swwl doonum.

¹⁹‍Merari gv ko tuupv: Mahli la Musi. Soq tulu si Lebi nyi tulug nyob hotamb lengknum.

²⁰‍Amram mwwg abwg bwrm Jokebednvn mwwg nywxwb naanum, hoo mwn mwam Aaron nvla Mojesnvn ko bwwjnum, Amram vnyw 137 gob swwl doonum.

²¹‍Ijarg ko tuupv: Kora, Nepheg, hoo Jikri.

²²‍Ujjiyelg ko tuupv: Misayel, Eljapan, hoo Sitri.

²³‍Aaron mwwg nywxwb Amminadabg nyem ko Nahsonwg bwrm, Elisebanvn naanum, hoo mwn mwam Nadab, Abihu, Eleajar, hoo Itamarnvn ko bwwjnum.

²⁴‍Kora ko tuupv: Assir, Elkana, hoo Abiyasap; soq tulu si Korag nyi tulu nyobv.

²⁵‍Aaron gv ko Eleajar mwwg gab Putiel nyem kongam nywxwb naanum, hoo mwn mwam Pinehasnvn ko bwwjnum. Soq tulu si Lebi nyob tulug imiq dvpar hoqg ab tulungv.

²⁶‍Soq tulu si Aaron la Mojesnvn hiyam At Sw benum: “Israel nyiilungam Ijipt gvda hoqgv bulam tuml apnam mam boolin to.”

²⁷‍Soq Mojes siila Aaron bunyi, bulv Ijipt gv lvpw at Paronvn Israel nyiilungam Ijipt gvda hoqgv boolin gvde kun hvl agam goon bov.

²⁸‍Hwdlo aalho At Sw Mojesnvn Ijipt gvdaho agam goonum,

²⁹‍At Sw Mojesnvn benum, “Ngo jaq At Swv; ngoqg nam benam hog mwlw ham, Ijipt gv lvpw at Paronvn betam to.

³⁰‍Hvbmabde Mojes At Swn benum, “Kaato, ngo agam pwbwb goolaq maanbo nyiingv. Hoggub yu Paro ngam tvjw tayin?”