Read Nyishi DOOGIN 7 Bible Online

DOOGIN 7 - Nyishi bible

DOOGIN 7

¹Hoo At Sw Mojesnvn benum, “Kaato, ngo nam Parog agaho Pwnbo hvb mvpa kun, hoo noqg vbw Aaron noqgab nyiqry benbov.

²‍Ngo hoggv nam gaml jipan mwlwngam no betayin, hoo noqg vbw Aaron Paronvn betayin Israel nyiilungam mwwg gvda hoqgv tolin tuku.

³‍Hvbmabde ngoqg kaaka-taka maanam mam la swrdorxeqkam naleqgo Ijipt gvdaho ngo nyisjaqkam, hoo ngo Parog hangam kamtwr mvtayin.

⁴‍Paro nam tvjw ram. Ho ngoqg alaqkv Ijipt ho ngo laqdaq tayin hoo ngoqg dvparam, ngoqg nyiilu Israelwg ko tulungam, Ijipt gvda hoqgv koi jaqb pw-hwwnam bonam nyigdvl boolin tayin.

⁵‍Hwdlo ngoqg alaqkam Ijiptam ngo ceekol hoo Israel nyiilungam bulug pengko hoqgv boolin yin, ngo At Swv hvl Ijipt nyi tulungv cengtayin.”

⁶‍Mojes la Aaron hvb nyinum; At Sw bulam gaml jinam hvb bulv nyinum.

⁷‍Hwdlo bulv Paronvn agam gooyikho, Mojes vnyw cam piin gob akam kunum, hoo Aaron vnyw cam piin leq nywum gob axa kunum.

⁸‍Ho At Sw Mojesnvn la Aaronnvn benum,

⁹“Hwdlo Paro nulam betayin, ‘Nulv atv swrdorxeqb bonam nyigdvl nulv ham kaakin kaato,’ ho no Aaronnvn beto, ‘Noqg beqnyiangam naagdvl hoo ham Parog agaho hurp to, ho hoqhv tvb soogwb nyitayin.’”

¹⁰‍Ho Mojes la Aaron Paro dookub wnum hoo At Swg gaml bekjaqb nyinum. Aaron mwwg beqnyiangam Paro gvla mwwg nyera tulug agaho hurpnum, hoo hv tvb soogwb nyiknum.

¹¹‍Ho Paro nyijwq-nyegam bo nyi tulungam, hoo nyioky nyub tulungam, hoo Ijipt gv gwwn-nyiqry kaanbo tulungam goqkumnum, hoo bulv kam ai dvb hvb nyinum.

¹²‍Nyi vxiv mwwg beqnyiangam hurpnum, hoo hoq tuluhv tvbwb nyinum. Hvbmabde Aaron gv beqnyiangv bulug beqnyiangam dvmeqnum.

¹³‍Hvbsujaqkam Parog hangv kamtwrnum, hoo mwv bulug benam mam tamanum, At Sw hoggub benum hvb nyinum.

¹⁴‍Ho At Sw Mojesnvn benum, “Parog hangv kamtwr dvn; mwv nyiilungam tolin tvl wmram.

¹⁵‍Soram Paro dookub wn, mwv iss pobub lengl haatayin. Nail pobu sugurho mwam kvvrwq dvb daqta, hoo tvbwb nyikubo beqnyia ham noqg alaqho bwwto.

¹⁶‍Hoo no mwam betayin, ‘Hibrug Pwnbo, At Sw, noqg dookub ngam kanam pa, hoo begamv, “Ngoqg nyiilungam tolin tukbv, ho bulv ngam deexa-rara alo xumtayin. Hvbmabde sija godab no tvjw kuma.”

¹⁷‍Soq sib At Sw bedo, “Ngo jaq At Swv hvl soq nyinam soqgv no cengtayin: kaato, ngoqg alaq beqnyia lvgab Nail pobu issam jwwdaq tayin, hoo hv uiyib nyikub tayin.

¹⁸‍Nail pobu ho doonbo nguiyv sitayin, hoo Nail pobungv naaiya tayin, hoo Ijipt nyiilungv Nail pobu hoqg issam twwdwb bos sorab tayin.” ’ ”

¹⁹‍Hoo At Sw Mojesnvn benum, “Aaronnvn beto, ‘Noqg beqnyiangam naato hoo noqg alaq lvgab Ijipt gv iss aoho tvdaqto, bulug pobu tulug aoho tvdaqto, bulug silam tulug aoho tvdaqto, hoo bulug sviyin hengpnam aoho tvdaqto, hoo bulug sokum mwlwho tvdaqto, ho hoq mwlwhv uiyib nyikub tayin, hoo Ijipt gvda mwlwho ui rooxo tayin, uppum-uddu ho hoo wlw uppum ho apnam iss mwlwngv uiyib nyitayin.’ ”

²⁰‍Mojes la Aaron At Swg gaml bekjaqb nyinum. Paro vnyiq kaagaho hoo mwwg nyera tulug vnyiq kaagaho mwv beqnyiangam lwwrab banv Nail pobu issam jwwdaqnum, hoo Nail pobu issiv uiyib nyikub kunum.

²¹‍Hoo Nail pobu ho doonbo nguiyv sinum, hoo Nail pobungv naaiyanum, ho Ijipt nyi tulungv Nail pobu hoq issam twwny kumanum. Hoo Ijipt gvda mwlwho ui rooxo kunum.

²²‍Hvbmabde Ijipt gv gwwn-nyiqry kaanbo tulungv bulug guunam-panam hoqgv ai dvb hvb nyinum. Ho Parog hangv kamtwr tvl hvraqb doonum, hoo mwv bulug benam mam tamanum, At Sw hog hvl benum.

²³‍Paro mwwg nammwb wkur kunv wknum, hoo mwv soq sam mwwg hangho hog gobkam mwwmanum.

²⁴‍Hoo Ijipt nyi tulungv Nail pobu sugurho sokum dukanum, hoggab bulv Nail pobu issam twwny kumanum.

²⁵‍At Swg Nail issam jwwdaq jwwxo kokw so aal kvn bumpw go dooknum.