Read Nyishi DOOGIN 8 Bible Online

DOOGIN 8 - Nyishi bible

DOOGIN 8

¹Ho At Sw Mojesnvn benum, “Paro dookub wgdvl mwam beta, ‘Soq sib At Sw bedo, “Ngoqg nyiilungam tolin tukbv, ho bulv ngam xumtayin.

²‍Hvbmabde no ngoqg nyiilungam wwm mvma baloqkam, kaato, ngoqg gvdaho ngo tvtwq lvgab swlin-momin mvtayin.

³‍Nail pobu hoqgv tvtwq twqtwngv lengtayin ho hv noqg namho haatayin hoo noqg yubk cwwrwb hoo noqg kartam nan ao hookam hoo noqg nyera tulug namho hoo noqg nyiilug namho, hoo noqg pwcwho hoo noqg loora ho uraho haal dootayin.

⁴‍Tvtwq tulungv noqg aoho hoo noqg nyiilug aoho hoo noqg nyera tulug aoho poqca tayin.” ’ ”

⁵‍Hoo At Sw Mojesnvn benum, “Aaronnvn beto, ‘Noqg alaqkv ilin gvdwl noqg beqnyia lvgab pobu tulug aoho, silam tulug aoho hoo sokum tulug aoho tvdaqto, hoo Ijipt gvdaho tvtwq tulungam lengdwb mvto!’ ”

⁶‍Ho Aaron mwwg alaqkam ilin banv Ijipt gv iss tulug aoho tvdaqnum, hoo tvtwq tulungv lengnum hoo Ijipt gvda mwlwngam pumlupnum.

⁷‍Hvbmabde Ijipt gvda hoqg gwwn-nyiqry bo tulungv bulug guunam-panam hoqgv tvtwq twqtaqkam Aaron lengdwb mvnam hvb ai dvb hvb mvnum.

⁸‍Ho Paro Mojes nvla Aaronnvn goqnv hoo benum, “At Swn modu gvdwl ngoqg soqgv la ngoqg nyiilu soqgv tvtwq tulu sam naapaq mvtbv, hoo At Swn pwr jim dvb ngo nyiilungam tolin tayin.”

⁹‍Mojes Paronvn benum, “Noqgab ngam gaml jim dvb hemp to hoo ngoqg nyera tulu gab hoo noqg nyiilu gab ngo xumj tayin, ho tvtwq tulungv noqg la noqg nam hoqgv niita yukun hoo Nail pobu aro ho dootayin.”

¹⁰‍Hoo mwv benum, “Aaram mam xumto.” Mojes benum, “Noqg bekwb nyimto, ho ngulug Pwnbo At Sw hvb nyinbo akjijaqkam dooma dvn hvl no cengtayin.

¹¹‍Tvtwq tulungv noqg hoqgv hoo noqg nam hoqgv hoo noqg nyera tulu hoqgv hoo noqg nyiilu hoqgv wleq tayin. Bulv Nail pobu aro alo dootayin.”

¹²‍Ho Mojes la Aaron Parog dook hoqgv lengknum, hoo mwv Paro lvgab loor minsnam bvrwq gab, Mojes At Swn tvtwq tulu gab xabl benum.

¹³‍Hoo At Sw Mojesg gomcwr benam hvb nyiknum. Tvtwq tulungv namho, bootu-baagho, hoo rongo ho sinum.

¹⁴‍Hoo bulv hoq tulu ham lvkin gob dorkuml paal apnum, hoo gvdangv naiya suunum.

¹⁵‍Hvbmabde hwdlo tvtwq tulungv sixaq dukub Paro kaapa yin, mwv mwwg hangam kamtwr mvnum hoo bulug benam mam tvjw maanum, At Sw benum hvb nyinum.

¹⁶‍Ho At Sw Mojesnvn benum, “Aaronnvn beto, ‘Noqg alaqkv ilin gvdwl hoo swcwg diimwram jwwdaqto, ho hoq tuluhv Ijipt gvda mwlwho tosub-toiyub tulu gob nyitayin.’ ”

¹⁷‍Hoo bulv hvb nyinum. Aaron mwwg alaqkam ilin banv mwwg beqnyia lvgab swcwg diimwram jwwdaqnum, hoo tosub-toiyub pv nyiingam la svdin tulungam pumbumnum. Ijipt gvdag ked diimwr mwlwngv tosub-toiyub tulu gob nyiknum.

¹⁸‍Gwwn-nyiqry bo tulungv bulug guunam-panam hoqgv diimwram tosub-toiyub gob mvdwb nyikanum, hvbmabde bulv nyinyi maanum. Ho nyiingam la svdin tulungam tosub-toiyub pv pumbumnum.

¹⁹‍Ho Paro gwwn-nyiqry bo tulungam benum, “Soq si Pwnbog lvqcw ponyi nvmv.” Hvbmabde Parog hangam kamtwr mvnum, hoo mwv bulug benam mam tvjw maanum, At Swg benum hvb nyinum.

²⁰‍Ho At Sw Mojesnvn benum, “Komc mikab gorab gvdwl no atv Parog dookub wto, mwv pobu issib haaikam, hoo mwam beta, ‘Soq sib At Sw bedo, “Ngoqg nyiilungam tolin tuku ho bulv ngam xumtayin.

²¹‍Ho hvb mabaloqkam, ngoqg nyiilungam no wwm mvma baloqkam kaato, ngo eka tviyw ywwtwngam noqg aoho hoo noqg nyera tulug aoho hoo noqg nyiilug aoho, hoo noqg nam uraho kanam tayin. Hoo Ijipt nyi tulug nam uraho eka tviywngv pumteq tayin, hoo bulug daqk deela hookam eka tviywngv puml yvtayin.

²²‍Hvbmabde hoq aalam ngo Gosen gvdangam mwbwql aptayin, hogloq ho ngoqg nyiilungv doodwn, ho hoqho eka tviyw cigkam jarl yvram, ho swcw nvg pengko so ngo jaq At Swv hvl no cengtayin.

²³‍Ho ngoqg nyiilu ngvla noqg nyiilug pengko ho ngo mvpin-mvral pvvtayin. Aaram mam soq swrdorxeq si nyitayin.” ’ ”

²⁴‍Hoo At Sw hoqhvb nyinum. Parog namho hoo mwwg nyera tulug nam uraho eka tviyw ywwtwngv puml yvnum. Ijipt gvda mwlwngam eka tviyw ywwtwngv domyu-damcanum.

²⁵‍Ho Paro Mojes nvla Aaronnvn goqnv hoo benum, “Gvda uraso wgdvl nulug Pwnboam pwr jita.”

²⁶‍Hvbmabde Mojes benum, “Hoqhv hvb nyidwb kvtaq ma, hoggab ngulug Pwnbo At Swn pwr aky jinamv Ijipt nyi tulu gab bulum-kac dvb nyido. Ngulv Ijipt nyi tulungam bulug vnyiq kaagaho bulum-kac dvb pwr aky jibnyiloqkam bulv ngulam wlw huram yv?

²⁷‍Ngulv hoggub nyijaqkam aal loum deexa-rarab wnam gob wl ngulug Pwnbo At Sw ngulam bekinam hvb pwr jiyin do.”

²⁸‍Ho Paro benum, “Ngo nulam nulug Pwnbo At Swnvn deexa-rara alo wl pwr jim tayin; hvbmabde nulv aado jaqb wmabv. Ngoqgab xumj tvb.”

²⁹‍Ho Mojes benum, “Kaato, noqg dook soqgv ngo lvvgwb wde kun At Swn xumta deen eka tviyw ywwtwngam Parog hoqgv, mwwg nyera tulu hoqgv, hoo mwwg nyiilu hoqgv aaram mam wpaq mvdkub xumnum. Ho nyiilungam wl At Swn pwr jim mvma dvb Paron lokta vm mvvm kumabv.”

³⁰‍Ho Mojes Paro dook hoqgv lengk nv hoo At Swn xumnum.

³¹‍Hoo At Sw Mojesg bekjaqb nyinum, hoo eka tviyw ywwtwngam Paro dook hoqgv, mwwg nyera tulu hoqgv hoo mwwg nyiilu hoqgv cikin gokam doom kumab mvpaq kunum.

³²‍Hvbmabde Paro mwwg hangv soq mood soorub kamtwrnum, hoo nyiilungam tolin kumanum.