Read Nyishi JOB 10 Bible Online

JOB 10 - Nyishi bible

JOB 10

¹“Ngoqg swwgam ngo oyum duku; ngoqg sornam mam ngo mvvsmab gootayin; ngoqg kacaq bviyaqbo yvj hoqgv ngo gootayin.

²Pwnboam ngo betayin, ngam haqpaq maabv; no hoggab ngam ceeko dvn ham ngam cengm tvbv.

³Nyijab-nyiyiq dvb no al kaapa dvi yv, noqg alaq tulug bonam nyinam mam haqpaq bvi yv hoo nyic nyiag almab nyitws maanam mam mwwsw bvi yv?

⁴No nyia ko vnyiq baqd nvi yv? No nyia ko kvvcwb kaad nvi yv?

⁵Noqg aalv nyia ko aalv hvb nyid nvi yv, ho maalo noqg vnywngv nyia ko vnyw hvb nyid nvi yv,

⁶ho ngoqg nyixiaqkam no meelin dvn hoo ngoqg nyicam meegaqdvn,

⁷ngo cengdo ngo nyimur dooma dvn, hoo noqg alaq hoqgv naalin bo akkam dooma dvn yv?

⁸Noqg alaqkv ngam jinyir ywrl hoo ngam pwnum, hoo sija no ngam lvkin gob twryum paku.

⁹Mwwgab to no ngam deekam hvb mvpa kun; hoo no ngam diimwrb hookur mvta yukun?

¹⁰No ngam gwwi toolinam hvb toolin maan mvi yv hoo ngam gwwiyam kaqnam hvb kaqm mvma namyv?

¹¹No ngam gv vpinam la aiyaqkam gvm dvb jinum, hoo alongam la aiyaqkam lvkin gob hvmsiq-hameqnum.

¹²No ngam swwgam la tumanam abiam jipa kun, hoo noqg ngam hoocum ko-gab ngoqg yvjv doodwn.

¹³Hvbsujaqkam soq tulu sam noqg hvvjw uralo no kvs do; ngo cengdo soq si noqg nyin deenam pagoqkv.

¹⁴Ngo nyic nyipa loqkam, no ngam kaado hoo ngoqg nyixiaqkam ngam apaq maabv.

¹⁵Ngo nyimur paloqkam, ngam mwwdwq mvm to! Ngo kvtaq paloqkam, ngoqg dumpongam ngo paarab nyokma, hoggab ngam ximanam lvgab bwwr mvpa ku hoo ngoqg hentwr sam kaato.

¹⁶Hoo ngoqg dumpongv paarab paiyv, no sony nyot hvb ngam cetabdo hoo ngam ceekol swrdorxeq bonam tulungam nyido.

¹⁷Ngam ceekol mvdwb noqg hvvky tulungam mvdar-mvpar do hoo noqg haaxaqnamv ngam koi yaiya do; ngam ceeko mvdwb no nitbo dvparam boa do.

¹⁸“Hoggub no annwg nvmmam ngam hoqgv boolinum? Nyi kaapa maatab ngo sipaq nyiloqkam al tvba

¹⁹hoo ngo swwma kam, annwg nvmmam hoqgv nyubwb ws-wda nyiloqkam al yaat ba.

²⁰Ngoqg aalv anyo maai yv? Ho nyiyumto, hoo ngam vp-cwkwb apaqto, ho ngo anyo go hwrcwngam kaapa kamyi nvpv

²¹kan twdwq bvla doonyium ura ko gvdab— ngo wma taab—hoo ngo hoqgv hookur kuram,

²²doomwq pul kan twdwql nyinam hvb nyik gvdab, ho doonyium tvl adar-apar maak gvdab, hogloq ho hutongv kan twdwq pan hvb nyik gvdab.”