Read Nyishi JOB 11 Bible Online

JOB 11 - Nyishi bible

JOB 11

¹Ho Naamatwg Jopar birwqnv hoo benum:

²“Soq naleqgo gomcwr goonam tulu sam birwqmab nyiyin dvi yv, hoo nyi akv naleqgo gooikam mwv kvtaq dvn yv?

³Noqg xupiq-tviyiq lengl goonamv nyiingam cooikab doom tan yv, hoo hwdlo no bej-bepar yin nam nyi akkam hvnyw mvram yv?

⁴Hoggab no bedwn, ‘Ngoqg mwwjwngv dvrwq cojor dvn, hoo ngo Pwnbog kaaga lo dvrwqdvn.’

⁵Hvbmabde oa, Pwnboam goom to hoo mwwg nvbcwram kuqkol nam goom to,

⁶hoo mvvsil apnam mwwlaqkam nam mwam betam koto! Hoggab mwv naleqgo cenglaq dvn. Cengto Pwnbov noqg nyixiaqkam kumwq yaab nam laqm-baqm dvn.

⁷“No Pwnbog urw pagoqkam meepal meelin yid yv? No Mwlwngam Koi yaan bog nyila maanam mam meepal meelin yid yv?

⁸Hoqhv doangam ao yaadwn—hoggv no nyila tan? Sux-ywlwngam ura yaadwn—hoggv no cengla tan?

⁹Hoqg aasongv swcwngam aaso yaadwn hoo sa-svlongam taqt yaadwn.

¹⁰Mwv wpeql hoo pvtwq tumk baloqkam hoo nyel pukum ho goqa baloqkam, hiyv mwam mvtur nyodwn?

¹¹Hoggab mwv dooxa bo nyiam cengdo; hwdlo mwv nyimuram kaapa yin, mwv ham kvvmw dvn yv?

¹²Hvbmabde hwdlo nyoro svdamv nyi ak dwrbuq yikam mwwlaq maanbo nyiv cenglaq tayin!

¹³“Noqg hangam no mwx-mvaq nyiloqkam, noqg alaqkv mwwg daiyab no ijin tayin.

¹⁴Noqg alaqkv nyimur paloqkam, ham aadob pvvpaqto, hoo noqg tombu uraho lootw maanam mam doogw mvmabv.

¹⁵Ho jvqtw jaqb noqg nyuqmv hvnyw-har doomab no swwtayin; ho no swrso bvla bos haai maab dootayin.

¹⁶Noqg hentwrl vs-axaqnam mam no mwwpa kuram; hoqham no iss topeql wnam hvb mwwpa twqtayin.

¹⁷Hoo noqg swwgv aal lvpangam huto yaatayin; hoqg kanv arkomc hvb nyitayin.

¹⁸Hoo no swrso tayin, hoggab mwwgwngv hoqho dootayin; noqg bviywr-bvcaram kaatayin hoo no swrsob doonu tayin.

¹⁹No gel kartayin, hoo nam hiyvkam bos dvb mvkram; naleqgo noqg mwwswnam mam kotayin.

²⁰Hvbmabde nyic-nyia bog vnyiqkv yoqpaq tayin; keleqtak lamta mwlwngv bulam nyiileq tayin, hoo bulug svqriq tanam mam bulv mwwgw twqtayin.”