Read Nyishi JOB 12 Bible Online

JOB 12 - Nyishi bible

JOB 12

¹Ho Job birwqnv hoo benum:

²“Mwum maab no nyiingv, hoo noqg lvgab pumb rwnamv sitayin.

³Hvbmabde ngoqg cengnam hvbkalam no kam cengdwn; nam ngo anyo yaama dvn. Hiyv soq pagoq tulu sam cengma dvn i?

⁴Ngoqg ajin tulug nyirj namgob nyipa ku; ngo Pwnboam goqnum hoo mwv ngam birwqnum, lootw bvla timb dvb nyima bo nyiingam nyirjnam akgob nyipa ku.

⁵Swrso dvnbo mwwnam nyi akam, vs-axaq haagam gab oyum dvn; hiyvg lvpiangv duleq tadwn hoqgab mwx-mvaq do.

⁶Naalil naareqbo tombu tulungv swrso duku, hoo hiyv Pwnboam hang biluqbov swrso duku, hiyv bulug pwnboam bulug alaqkv bwa do.

⁷“Hvbmabde svdin tulungam toxto, hoo bulv nam tomswr tayin; doa nvg pvta tulungv bulv nam betam tayin;

⁸ho maalo swcw nvg nwmw-nwsinv nam tomswr tayin; hoo sa-svlog nguiyv nam bibwq jitayin.

⁹Soq sam At Swg alaqkv pwnam mam soq tulug pengko sam hiyv cengma dvn?

¹⁰Mwwg alaqho hoolu luuxig swwgv hoo nyia koog svqyi-saqcangv doodwn.

¹¹Dvsam aiyv dvkanam hvb nyurungv gomcwr tulungam taka maad nvi yv?

¹²Nyekam-xox lvgab mwwlaqkv, hoo mood oyu go dooikam cenglaqkv doodwn.

¹³“Pwnbo lvgab mwwlaq kvla atorv; mwv tomswr-hony dvb la cenglaq dvn.

¹⁴Mwv mvpia baloqkam, hiyv kam mvdar nyoma dvn; mwv nyi ak mutum baloqkam, hiyv kam mvko nyoma dvn.

¹⁵Mwv issam parb nyiloqkam, bulv sengdwn; mwv bulam toolin baloqkam, bulv gvdangam tolup dvn.

¹⁶Mwwg lvgab ator rvla aljaqb mwwlaqnamv doodwn; xaalyo ngvla xaalyo bov mwwg gwj.

¹⁷Mwv tomswr-hony bo tulug cenglaqkam naapaq dvn, hoo mwv nyegam tulungam paca dvb mvdwn.

¹⁸Mwv lvpw at tulungam yuupaq mvdwn hoo bulug gvvs lo vj hiqlwq dvn.

¹⁹Mwv nyub tulug cenglaqkam naapaq dvn hoo ator boam mviya dvn.

²⁰Mwwjw dvb goonam mam mwv cooikab doom dvn hoo axa bo tulug mwwlaqkam naapaq dvn.

²¹Mwv lvpw atwg ko tuup tulungam oyum mvdwn hoo atorbo tulug soruqkam toosuq mvdwn.

²²Mwv ura jaqb kanboam mvko dvn hoo kan twdwq boam huto dvb mvdwn.

²³Mwv nyob asaqkam koi dvb mvdwn, hoo bulam mwv twrdwn; mwv nyob asaqkam mvqlw mvdwn, hoo bulam bool wgdvn.

²⁴Swcw nvg peelo bo nyiilug pengko hoqgv cenglaqkam mwv naapaq dvn hoo bulam lamta dooma ko dooxa bo gvdaho gaqxar mvdwn.

²⁵Bulv huto dooma ko kan ho yoqlwq dvn, hoo bulam opo twwxum bo nyi akv tabko-tablonam hvb mwv mvdwn.