Read Nyishi JOB 13 Bible Online

JOB 13 - Nyishi bible

JOB 13

¹“Kaato, ngoqg vnyiqkv soq mwlw sam kaapa kun, ngoqg nyurungv tapa kun hoo ham cengknum.

²Hoggv no cengdwn, ham ngokam cengdwn; ngo nam anyo yaama dvn.

³Hvbmabde Mwlwngam koi yaan boam ngo agam goodwn, hoo Pwnbo lvgab ngoqg bvrwqkam ngo goonw do.

⁴Noqgab nyiloqkam, no asar lvgab doodwn; nul mwlwngv dooxa bo doktor tulungv.

⁵Oa nulv cooikab dooto, hoo hoqhv nulug mwwlaqnamv!

⁶Tato sija ngoqg hvqrwqnam sam hoo ngoqg mvnyi-moiyul benam nvbcwr sam tato.

⁷Nulv Pwnbo gab vm mvvl good nvi yv hoo xaalyol mwwg gab agam good nvi yv?

⁸Nulv mwwg daiyab mwwsw-mwwpaq tan yv? Nulv Pwnbo gab bvrwq bij tan yv?

⁹Nulam mwv meelin baloqkam hv nulgab al yin yv? Ho maalo nyiingam xaalyonam hvb mwam nulv xaalyo yin yv?

¹⁰Nulv kvsil mwwsw-mwwpaq nyiloqkam mwv hoggub nyijaqkam nulam yolu ruqtayin

¹¹Mwwg ator yuunamv nulam bos mvram yv, hoo mwam bosnamv nulug aoho haaram yv?

¹²Nulug niitin-puqtu dootinv wm muiyib nyido; nulug cwwgwl ceetor nanv deekam hvb nyido.

¹³“Ngam tvmwl dooiya to, hoo ngo gootayin, hoo ngoqg aoso hoggv haata dvn ham haam to.

¹⁴Hoggub yu ngoqg aiyaqkam ngoqg exy lo gamgab tan hoo ngoqg swwgam ngoqg alaqlo pvvtan yv?

¹⁵Mwv ngam patab sujaqkam, ngo mwwg uraho mwwgw dvn; hvbsujaqkam ngoqg mwwnam mam mwwg nyuqm kaaga ho ngo betayin.

¹⁶Soq si ngam ywwlin tayin, ho dormo maanbov mwwg agaho haanyi ram.

¹⁷Ngoqg gomcwr tulu sam tal dooiya do, hoo ngoqg bibwqnam sam nulug nyuru ho haamto.

¹⁸Kaato, ngoqg bvrwqkam ngo mwx-mvaq pakun; ngo cengdo ngo kvtaq tayin.

¹⁹Ngam oyum dvb hiyv doodwn? Hvb doodnyiloqkam ngo cooikab dool hoo sitayin.

²⁰Ngam pagoq goqnyi go loorwq twqt bv, ho noqg nyuqm kaaga hoqgv ngo atv kvs ram:

²¹noqg alaqkam ngoqg soqgv aadob laqgin to, hoo noqg bos dvb nyinam mam ngam bos mvmabv.

²²Ho goqto, hoo ngo birwq tayin; ho maalo ngo gootayin, hoo no ngam birwq tvbv.

²³Hog hwdgo ngoqg nyixiaq kvla nyicv doodo? Ngoqg nyimurnam mam la ngoqg nyicam ngam cengm tvbv.

²⁴Hoggub noqg nyuqm mam kvsdvn hoo noqg ceebio gob ngam xig yukun?

²⁵No hurpaqnam okam bos belam tan yv hoo sengn bo ampam ruqmin gvtayin yv?

²⁶Hoggab no ngam ceekol kacaqbo pagoqkam xeqpa kun hoo ngoqg yaapa ho nyixiaq kunam tulu ham ngam otu naam pakun.

²⁷Ngoqg lvpiangam no liitul ap paku hoo ngoqg lamta tulungam kaal doodo; ngoqg lvpia lupupam no dwqswr-dwqywr mvma.

²⁸Nyia kov dupum-dvrab yaapaq bo hvb nyidwn, vjam tvpin puul ingnam hvb nyidwn.