Read Nyishi JOB 14 Bible Online

JOB 14 - Nyishi bible

JOB 14

¹“Nyia koam nyem ak hoqgv dwrbuqdwn anyo mood gob doodwn hoo vs-axaqkv naleq dvn.

²Mwv opu hvb puulin layil hoo sengd kun; mwv doonu maab yal bobo hvb wpaq dukun.

³Hoo noqg vnyiqkv hvk nyi akam kaad nvi yv hoo noqg lvgab pw-hwwdwb boa dvn yv?

⁴Dvrwq maan hoqgv hiyv dvrwq boam bwwlin nyodwn? Akkam dooma.

⁵Hoggab mwwg swwg aalam xil ap pakun, hoo mwwg pool tulungam noqg lvgab xip pakun, hoo mwam swwr mvdwb noqg xuqp kunam mam mwv wbo nyokram,

⁶mwwg galoqkv nywpaqto hoo mwam vpwb apaqto, ho ree goqnam ak hvb mwwg aalam mwwg alaqho hwnyir-hvmar mvto.

⁷“Hoggab svvn gab mwwgw ak doodwn, hoqham kwrtab baloqkam, hoqgv lokta jurlin tayin, hoo hoqhv nvjur jurlin bov doomab dooram.

⁸Swcw ura lo hoqg rwbv akam sujaqkam, hoo hoqg ked ho swtungv sis jaqkam,

⁹hvbsujaqkam issam hempa layil hoqgv nvjur jurlin tayin hoo svvn apa swwcanam hvb haqbv swwlin tayin.

¹⁰Hvbmabde nyia kov sidwn hoo ham liipaq dukun; nyia kov mwwg svqtwr saqnyangam saqdwn, hoo hoqho mwv doodwn?

¹¹Swnyiq hoqgv iss biqlin maaikam hoo pobungv niqtuq dook maab hoo pwtw dukun,

¹²hvbkalam nyia kov siyi kun hoo lokta gorab kuma dvn; doangv doody deedib mwv gorab kuram ho maalo mwwg yubk hoqgv gorab kuram.

¹³Oa ngam no Sux-ywlw ho kvs tvbv, ho noqg hang lingtwrnamv wnya namgub ngam no kvs tvbv, ho no mood loq ak ngoqgab xuqlin gvdwl, hoo ngam mwwpa tvbv!

¹⁴Nyi sik bov mwv lokta turab dvn yv? Ngoqg swwdarnam moodv haama deedib, ngoqg bon nyinam mood mwlwho ngo kaaya tayin.

¹⁵No ngam goqyikam, hoo ngo nam goqrwq tayin; noqg alaqg bonam nyinam mam no mwung tayin.

¹⁶Hoggab ngoqg dwqkap kvbxiam no xika tayin; ngoqg nyicam no tuury tuugab ram yv;

¹⁷ngoqg nyicam cuk uraho morxtubtwl pvvnum, hoo ngoqg nyixiaqkam no tomlupl tan yv.

¹⁸“Hvbmabde puutungv yaql dvn hoo yvqmwq-yaqkaq dvn, hoo wlwngam hoqg dook hoqgv duqpaq dvn;

¹⁹issiv wlw tulungam liqbin xaadwn; kedam diidwr issiv nuupaq xaadwn; hvbkalam nyia koog mwwgwngam no twrm dvn.

²⁰No mwam nwrba xaqb ceeko dvn, hoo mwv wpaq dukun; no mwwg swwcangam kwly dvn, hoo mwam wpaq mvdkun.

²¹Mwwg ko tuup tulungv xinam gob haadwn, hoo mwv ham cengma dvn; bulam anyo dvb mvl kunam, hoo mwv ham cenglaq maadwn.

²²Mwwg gv aiyaq aro vcnam mam mwv hempa dvn, hoo mwwg atgab aro mwv nyix-riidwn.”