Read Nyishi JOB 15 Bible Online

JOB 15 - Nyishi bible

JOB 15

¹Ho Teman nyi Elipaj agam birwql hoo benum:

²“Cengla lvgab dooiyi yinam hvb pumb rwnam nyiingv birwq tan yv, hoo mwwg kepongam dou-cagag dooiyam lvgab bwwr mvd nvi yv?

³Mwv niqtuq dooma bo haqyaq mins tayi yv, ho mwv almanboam nyidwb gomcwr tulu lvgab goota yin yv?

⁴Hvbmabde Pwnboam bosnam mam no nyipaql gvdo hoo Pwnbog agaho xumnam mam otup-ac mvdo.

⁵Hoggab noqg nyixiaqkv noqg agam mam tomswr do, hoo xaalyo nam lyolam no xuqpa ku.

⁶Ngo ma, noqg atwg agamv nam bepaq-taiyaq sudo; noqg atwg nvbcwrv nam ceeko do.

⁷“No otuqcob ko bwwnam nyi akv yv? Ho yorn tulungam pwma taab no lengco nam yv?

⁸No Pwnbog dookum ko ho tan mvi yv? Hoo pumb rwnamv no twq mwwd nvi yv?

⁹Ngulug cengmanam mam hoggv no cengdwn? Ngulug pwbw maanam mam hoggv no cenglaq dvn?

¹⁰Noqg abam axa yaanbo, dumpo bov la nyi axangv ngulug pengko lo doodwn.

¹¹Ho noqg lvgab anyab gomcwr gool, Pwnbog bet-belanamv noqgab anyo dvi yv?

¹²Hoggub noqg hangv nam baqpaq gvdwn, hoo hoggub noqg vnyiqkv nyiqyab-nyiqbio dvn,

¹³noqg yalv Pwnboam ceekol no wkur dvn hoo soq svk gomcwrv noqg agam hoqgv lengd nvi yv?

¹⁴Hoggv nyia kov, mwv dvrwq dvb? Ho nyem ak hoqgv dwrbuqnamv, mwv nyiidar gob nyila tai nvi yv?

¹⁵Kaato, Pwnbov mwwg dvrwqbo tuluho mwwgw maadwn, hoo mwwg kaagaho ao lvpwngv dvrwq maadwn;

¹⁶Anyo jaqdvn hiyv bulum-kac dvb la nyiwq-nyito dvn, hoq nyi ak hv lootw maanboam iss twwnam hvb twwdwn!

¹⁷“Nam ngo kaakin tayin; ngam tato, hoo hoggv ngo kaap kun ngo bibwq tayin

¹⁸(bulug ab tulu hoqgv kvs maab, hoggv pumb rwnam nyi tulungv betam pakun,

¹⁹bulam aro gvdangam jipa kun, hoo bulug pengko ho nyoodo nyi akkam wpeq maanum).

²⁰Vnyw mwlwho kwcwr-kvpar nyil swwkum kunamv, nyic-nyiabo nyiv mwwg swwca mwlwho vc cil doodwn.

²¹Mwwg nyuru ho bosnam yalam tapa dvn; swwl-geel dooikam mwwg aoho twrn bov haatayin.

²²Mwv kan urab hoqgv lingkur pan hvl, hoo mwv lyoqr orioq gab mux pakun hvl, mwv mwwjw maadwn.

²³Mwv aado gvda lo dvs gab meegaql begamv, ‘Hoqhv hoglo yu?’ Kanbo aalv mwwg gab mwx-mvaq pak hvl mwv cengdo;

²⁴hentwr rvla mwwdwq-saqkv mwam bos mvdo; lvpw at ak nyob pata tanam hvb hoq tuluhv mwam ceeko do.

²⁵Hoggab Pwnboam mwwg alaqkv ceekol mwv ijin paku hoo Pwnboam ai paku,

²⁶jwwkam bo svtam lvgab tamil mwam ceekol xardu do;

²⁷hoggab mwwg oxv mwwg nyuqm mam mwv pulup paku hoo mwwg hwwpo ho oxam boqkum paku

²⁸hoo haqpaq kunam bopam tuluho, nyi akkam dooma ko nam tuluho, yuupaq boam mwx-mvaql pookum tanamho dood ku;

²⁹mwv nyet kuram, hoo mwwg gumnv dooyu kuram, ho mwwg gumn-ranv swcw nvg aoho so wpy ram;

³⁰mwv kan hoqgv wleq nyoram; mwwg jurlin boam wm moiliv rvmtwr tayin, hoo mwwg agam hoqg saqnamv mwam wleq tayin.

³¹Asaram la xaalyongam mwam atam mwwgw mvmabv, hoggab mwam asaram laqjo tayin.

³²Mwwg moodv haama taab ham bumpwb jitayin, hoo mwwg haqbv jeenyeq kuram.

³³Roo nwwda hoqgv ningma taanbo roo aaxiam hwqgeqnam hvb mwam hwqpaq tayin, hoo olib svvn hvb mwwg opu-aaxiam mvpaq tayin.

³⁴Hoggab pwnboam mwwjw maanbo dvparv twrngum dvn, hoo kam naal nam mvnam mam wmv guxia dvn.

³⁵Bulv vs-axaqkam ko gvrab dvn hoo almanam ko bwwdwn, hoo bulug hangv xaalyo dvb mwx-mvaq dvn.”