Read Nyishi JOB 18 Bible Online

JOB 18 - Nyishi bible

JOB 18

¹Suhit nyi Bildad birwql hoo benum:

²“Hog hwd oyu go no gomcwram ruqgaq tayin? Mwwka to, hoo ngulv agam gootayin.

³Hoggab ngulam sibin svv gob xigdvn? Hoggub ngulam noqg kaagaho pacab mvgyin?

⁴Noqg haaxaqnam ho no atv mucu-mviya sudo, noqgab swcw sam ludum tan yv, ho wlwngam wlw dook hoqgv duqpaq bvi yv?

⁵“Jvqtw jaqb nyic-nyiayag hutongam mwmiq paku, hoo mwwg wm moiliv huulin maado.

⁶Hutongv mwwg tombu ho kan do, hoo mwwg aoho hoqg mwwg lempam mwmiq paku.

⁷Mwwg ator jaqb lwql wnam mam otu dvb mvpa ku, hoo mwwg pwr-rwnam nammv mwam akob mvl paku.

⁸Hoggab mwwg at lvpiangv mwam wswq urab joolwq paku, hoo mwv hoq wswq urab wpa ku.

⁹Mwwg lvpiangam komangv xutin paku; mwam pwd-potongv hoqtu paku.

¹⁰Mwam pwtwq twqtu dvb deela ho kvsil doodo, mwwg gab lamta ho pwd-poto mvp paku.

¹¹Mwam taqg-loosaqb vc loodab bos belam do, hoo mwwg lwqkap kvbx lo mwam ruqmin gvdo.

¹²Mwwg atorv kanongv, hoo mwam dwqtup mvdwb vs-axaqkv mwx-mvaq paku.

¹³Hoqhv mwwg gv vpin taqgwn lyomeq paku; otuqcob ko bwwconam sinamv mwwg oxub tulungam lyomeq paku.

¹⁴Mwwg mwwgwnam tombu hoqgv mwam puc-pui paku hoo kwr-korbo lvpw atwg dookho boanum.

¹⁵Mwwg apaq kunam doogw tombungam hiyv lajaqkam doola tayin; mwwg dook taqg-loosaq ho suudwq-suuk boam toos-tootwrl taapnum.

¹⁶Uraho mwwg rwbv sengknum, hoo mwwg ao haqb tulungv sengtwr kunum.

¹⁷Swcw soqgv mwam mwwpanam mam yuupaq paku, hoo lyobu ho mwwg eminv dook ma.

¹⁸Mwam huto hoqgv kanwb tuulwq paku, hoo gvda gvt soqgv ruqlin paku.

¹⁹Mwwg nyiilug pengko ho mwv ko hosiq-hosiq dook ma, hoo mwwg dookho nyi akkam swwl dook ma.

²⁰Mwwg aalam dou-haaga ho doonbo tulungv mooka-sa tayin, hoo dou-caga hoqgv bulam bosnamv naareq tayin.

²¹Jvqtw jaqb lootw maanbo doogwngv hoqhvb nyidwn, ho Pwnboam cengma bo nyookv kam hoqhvb nyidwn.”