Read Nyishi JOB 19 Bible Online

JOB 19 - Nyishi bible

JOB 19

¹Ho Job birwql hoo benum:

²“Hog hwd oyu no ngam hentwr hemtayin hoo gomcwr tulu lvgab ngam vmwq-yumgub mvtayin?

³Lwyw taqt go no ngam hentwr hem dvb joopaq paku; ngam nyimur dvb no hvnyw maad nvi yv?

⁴Hoo jvqtw jaqb ngoqg nyimur paloqkam, ngoqg nyimurv ngoqg lvgab dootayin.

⁵Jvqtw jaqb ngam ceekol no atv koi gob mvs baloqkam hoo ngoqg vs-axaqkam ngam ceekol yolu baloqkam,

⁶ho Pwnbov ngam nyimur uraho vlwq pan hvl cengto hoo ngoqgab mwwg wswqkam mutum pakun.

⁷Kaato, ngo vc jaqb sogoql xablin dvn, ‘Henc jaqkv!’ hvbmabde ngam birwq maanum; ngo svka gab goqnam, hvbmabde akkam lootw bo dooma.

⁸Ngoqg lamtangam mwv bvly nwqtum paku, hoqgab ngo wpeq nyok ma, hoo ngoqg lamtangam mwv kan twdwq dvb mvp paku.

⁹Ngoqg yuunam mam mwam ngoqg galoqkv twqbin xaapa ku hoo ngoqg dumpo soqgv ywr dumtupam naag nukba.

¹⁰Mwv ngam taqg-loosaq hoqgv mucu-mviya paku, hoo ngo yuupaq paku, hoo svvnam bulinam hvb ngoqg mwwgwngam bulin paku.

¹¹Mwwg hang lingtwrnamv ngam ceekol rwlwq paku hoo mwwg ceebio gob ngam xipa ku.

¹²Mwwg acam tulungv lvkin gob haado; ngam ceekol bulv mutum tvl joopaq paku hoo ngoqg tombungam gooyuml svmcw doog paku.

¹³“Ngoqg vbw-boram ngoqg galoqkv mwv aadob pvvgin paku, hoo ngam cengn bo tulungv cengka maanbo hvb ngoqg hoqgv aado paku.

¹⁴Ngoqg lvqry-laqsongv ngam apaq paku, hoo ngoqg ajin jimbw tulungv ngam mwwpa kuma.

¹⁵Ngoqg nam hoqgv nyiin tulungv hoo ngoqg paqn tulungv ngam nyoodo nyi akgob xidku; bulug vnyiq kaagaho ngo nyoodo nyi gob nyipa ku.

¹⁶Ngoqg nyerangam ngo goqnam, hvbmabde mwv ngam birwq maanam; ngo agam lvgab ngo mwam aya mwwpa tvbwk hvl xumdwb nyidku.

¹⁷Ngoqg saqnamv ngoqg nywxwngv luusaq duku, hoo ngoqg annwg kepo hoqg vbw-bor tulu gab ngo naiya akgob nyipa ku.

¹⁸Ko huriv kam ngam bepaq-beyaq duku; hwdlo ngo daqrab yin bulv ngam ceekol agam goodo.

¹⁹Ngoqg ajin jimbw mwlwngv ngam oyum paku, hoo hiyam ngo abynam hv ngam ceeko paku.

²⁰Ngoqg alo tulungv ngoqg vpin hoola aiyaqho kaqtin paku, hoo exy xiipin-xiily hoqgv ngo keleq paku.

²¹Ngam aya mwwpa tvb, ngam aya mwwpa tvb, Oa ngoqg ajin tulunga, hoggab Pwnbog alaqkv ngam idaq paku!

²²Pwnbo hvb nul ngam hoggub ruqdwn? Ngoqg gv aiyaq lvgab hoggub nulv xumt maadwn?

²³“Oa ngoqg gomcwr tulu sam xeqnyi loqkam al yin pa! Oa hoq tulu ham kitap golo xiqlwq nyiloqkam al yin pa!

²⁴Oa dvvcw pen lvg bvla pitol lvgab wlw galo nwrba gob soq tulu sam taql xeqp nyiloqkam al yin pa!

²⁵Hoggab ngam pvlyw bov doodwn hvl ngo cengdo, hoo vtwr-anyangam mwv swcw nvg aoso daqtayin.

²⁶Hoo kokwngam ngoqg vpinam soq sib twryum sujaqkam, hvraqb ngoqg aiyaqkv ngo Pwnboam kaapa tayin,

²⁷hiyam ngo atv ngoqgab kaapa tayin, hoo ngoqg vnyiqkv kaatayin, hoo nyi asaqkam ma. ngoqg ura lo ngoqg hangv swnyiq-svnyiaq do!

²⁸Nulv bebnyiloqkam, ‘Hoggub ngulv mwam ruqmin gvtayin!’ hoo, ‘Pagoqg rwbam mwwg ho kaapa paku,’

²⁹lyoqr orioqkam bosto, hoggab hang lingtwrnam laqm mam lyoqr orioqkv haag dvn, pw-hwwnamv doodwn hvl nulv cengyi nvpv.”