Read Nyishi JOB 2 Bible Online

JOB 2 - Nyishi bible

JOB 2

¹Lokta aal loog golo hwdlo Pwnbog gumtw tulungv bulv atv atam At Swg agaho kaakin dvb haanum, hoo bulug pengko ho Uiyv mwv atv atam At Swg agaho kaakin dvb haanum.

²At Sw Uiyam benum, “No hogloqkv haai yin i?” Uiyv At Swn birwqnv hoo benum, “Swcw nvg ao bolo wkur-wxeql, hoo hoqho odum-akob wdul yvdu dvn.”

³Hoo At Sw Uiyam benum, “No ngoqg nyera Jobnvn kaapas i, swcw nvg ao bolo mwwg hvb dvrwq bvla nyiidarbo nyi akjijaqkam dooma dvn, hiyv Pwnboam bosdvn hoo almanam hoqgv aado dvn? Mwam pagoq doomab no ngam mwam ceekol hentwr hem dvb jisnum, hvbmabde mwv sija namgub mwwg nyij-mujam topaq maab nyil doodo.”

⁴Ho Uiyv At Swn birwql hoo benum, “Vpin gab vpinam! Nyi akwg doognam mwlwngam, mwwg swwg gab mwv jitayin.

⁵Hvbmabde noqg alaqkv ilin gvdwn hoo mwwg alongam la mwwg gv aiyaqkam idaq kvka to, hoo mwv noqg nyuqm mam moiya rvxa dvb beetayin.”

⁶Hoo At Sw Uiyam benum, “Kaato, mwv noqg alaqho doodwn; mwwg swwnam mam aro doom twqto.”

⁷Hoqgab Uiyv At Swg dook hoqgv lengla yukul hoo Jobnvn lvc koro hoqgv dumrwq tvqyw namgub hil pwmnum.

⁸Hoo mwv cvvk macaq tubdupnam ak naalayil hoqg lvgab mwwg gvvngam atv axaq xaql mub aoho doonum.

⁹Ho mwwg nywxwngv mwam benum, “No hvraqb noqg mwwjwl nyij-mujam bvvb tvl dootayin yv? Pwnboam beepe kul hoo sito.”

¹⁰Hvbmabde mwv mwnwn benum, “No paca bo nyem dvn benam hvb bedo. Ngulv albo arongam Pwnbo hoggv nvvtwq tan yv, hoo ngulv alman boam naamab nyitayin yv?” Soq mwlw si nyisjaqkam Job mwwg nvbcwr lo becam bemanum.

¹¹Hoq moodho hwdlo Jobwg ajin oumv soq alman hog mwlwngv mwwg aoho nyinam mam tapanum, ho Teman nyi Elipaj, Su nyi Bildad, hoo Naamat nyi Jopar, bulv at-atwg nyook hoqgv haanum. Bulv mwam lvkin gob kvvlwql hoo mwam bet-bela dvb moodam xiknum.

¹²Hoo hwdlo bulv mwam aado hoqgv kootu yikho, bulv mwam kaacin maanum. Hoo bulv lvkin gob sogoqnv xabnum, hoo bulug vjam bulv swrcnum hoo doonyi aob diimwram taacal bulug dumpo ho taiyaqnum.

¹³Hoo mwwg lvgab bulv deela ho aal kvn gola ai kvn go doomin gvnum, hoo hiyvkam mwam agam gamg kam goomanum, hoggab mwwg vc loodab hentwr henam mam bulv kaapanum.