Read Nyishi JOB 20 Bible Online

JOB 20 - Nyishi bible

JOB 20

¹Naamat nyi Jopar birwql hoo benum:

²“Hoggab ngoqg uralo odum-alam maagam gab hoqgab ngoqg mwwnamv ngam birwqdo.

³Ngam benyi-beya bej-beparnam mam ngo tapa do, hoo ngoqg cenglaqnamv hoqgv yalv ngam birwqdo.

⁴Nyia koam swcw nvg aoso ap yuk hoqgv jaq soq sam kolgv nyidwn hvl no cengma dvn yv,

⁵nyic-nyia boam yuunamv dooyu maadwn, hoo mwwjw maanbog hwnyir-cojornamv nyiqyab-nyiqbio gotwq maai yv?

⁶Mwv doa tol ao hooc sujaqkam, hoo mwwg dumpongv doomwq tol dvqc sujaqkam,

⁷mwwg atwg usum-ee niipaqnam hvb mwv nwrba gob yuupaq tayin; ho mwam kaanbo tulungv betayin, ‘Mwv hogloq doon kun yu?’

⁸Mwv yuma ak hvb jarpaq tayin hoo kaapa kuram; ho aiyam nyiqry kaanam ak hvb mwam ruqpaq taikun.

⁹Mwam kaanbo vnyiqkv lokta kaapa kuram, mwam kaapa ko nyookho mwam lokkam kaapa kuram.

¹⁰Mwwg ko huriv jwwgwbo hoqgv mwwswngam meegaq tayin, hoo mwwg alaqkv mwwg gumnam jikur tayin.

¹¹Mwwg alongv mwwg yaapa ho atornam hvb ator do, hvbmabde hoqhv mwwg lvgab diimwrho karmin gvtayin.

¹²“Mwwg agam ho almanv tiiswr sujaqkam, mwwg lyol ho ham mwv kvs sujaqkam,

¹³mwwg mwwlwq maanam mam hoqham wwm sujaqkam hoo hoqham mwwg agam gvmbw sujaqkam,

¹⁴hvbsujaqkam mwwg dvsv mwwg kepob haan kun; hoqhv mwwg ura lo borta cumdwq gob ya nyidku.

¹⁵Mwv nyet tulungam meqngam jaqb miqlwq sudo hvbmab hog mwlwngam lokta baalin xaad ku; mwwg kepo hoqgam Pwnbov huulin dukun.

¹⁶Mwv borta cumdwqkam buutayin; tvb akwg lyolv mwam mengtayin.

¹⁷Tong ngola ngamla doxingam pobu todu boam, mwv hoq pobu tulungam kaalaram.

¹⁸Mwwg hentwr henl bon nyilinam aaxiam mwv jikur tayin hoo ham mwv miqlwq nyokram; mwwg pudu ruujongam mwv dvpa-twwpa kuram.

¹⁹Hoggab mwv vmwq-yumgub mvtwl hoo jwwgw boam apaq paku; mwwg nam mvmanam mam mwv naareq paku.

²⁰“Hoggab mwwg kepo ho rvvsw-roogumnamv xumt maadwn hvl mwv cengdo, mwwg kaabynam hog mwlwngam mwv keleq mvmab naadwn.

²¹Mwwg dvxo kokwngam hog akkam dook maanum; hoqgab mwwg swwnam-geenamv dooyu ram.

²²Mwwg hog mwlwngv yaqbeq dvb bwwr yin mwv mwwdwq tayin; nyiicwr-cwrxig alman alaqkv mwam ceeko dvb haatayin.

²³Mwwg kepongam bwwr mvdwb Pwnbov mwwg wwm bioqnam hvb haaxaqnam mam mwam ceeko mvdwb kanam tayin hoo hoqhv mwwg gv aoho nyodo hvb hopup tayin.

²⁴Mwv dvvcw nwwxo-svtam hoqgv keleq tayin; ho tama uppuqkv mwam suupeq tayin.

²⁵Hoqhv ablwql hoo mwwg gv-ngam suupeq tayin; kwlwq-kvlaqbo mortongv mwwg sorpam suupeq tayin; vc loodab bosnamv mwwg aoho haatayin.

²⁶Vc looda kan twdwqnam mam mwwg gumn uddum gob ap jipa kun; nywywngam miqma bo wmv mwam gutayin; mwwg tombu ho apaq kunam hog mwlwngam guxia tayin.

²⁷Doangv mwwg nyimuram bepor tayin, swcwngv mwam ceekol daqrab tayin.

²⁸Pwnbog hang lingtwr de aalam, mwwg nam gumnam aadob seel baqxa tayin.

²⁹Soq si Pwnbo hoqgv nyic-nyia bo nyi akwg naady sanamv, ho Pwnbov mwam otu jisiq kunamv.”