Read Nyishi JOB 21 Bible Online

JOB 21 - Nyishi bible

JOB 21

¹Ho Job birwql hoo benum:

²“Ngoqg gomcwr tulu sam tal dooiya to, hoo noqgab soq si bet-bela gob nyin kuka.

³Ngoqg lvgab cwqya to, hoo ngo gootayin, hoo ngoqg gooxongam bej-bepar to.

⁴Ngoqg gab nyiloqkam, ngoqg ceekol sornam si nyia ko gab yv? Hoggub ngo cwqnyi maata yin?

⁵Ngam kaagabto hoo bosto, hoo noqg alaqkam noqg agam mompium suto.

⁶Hwdlo ngo mwwpa yin ngo lomnum, hoo ngoqg aiyaqkv lamngaq tvl doonum.

⁷Hog gab nyic-nyia bov swwdwn, nyekam namgub, hoo huqlwho atorb swwkub dvn yu?

⁸Bulug hosiqkv bulug doodwb swwd-geen kun, hoo bulug vnyiq kaagaho bulug hotamv doodwn.

⁹Bulug nammv bosnam hoqgv cumciq do, hoo Pwnbog beqnyiangv bulug aoho tvdaq ma.

¹⁰Bulug hvvb tulungv meemab nyima; bulug hvvn tulungv kongam jaqpaq ma.

¹¹Sviya roolinam hvb bulug ko huriam bulv roolin do, hoo bulug ko huriv noso soomin do.

¹²Bulv rwwxw-gungga lvgab bemin bedo hoo piul tabnam yal hoqgv hwnyir-hvmar do.

¹³Bulug aalam bulv swwl-geel doomin do, hoo bulv swrsob Sux-ywlwb ipoq dvn.

¹⁴Bulv Pwnboam bedo, ‘Ngulug soqg wleqto! Noqg lamta tulug cengsam ngulv mwwby ma.

¹⁵Pwnbo si hoggv, ngulv mwam bon nyij dvb? Hoo ngulv mwam swgw baloqkam hoggv ngulv kaapa tayin?’

¹⁶Kaato, bulug alaqho bulug swwnam-geenamv dooma dvn yv? Nyic-nyia bo tomswr-honynamv ngoqg hoqgv aado do.

¹⁷“Lwxiam hog hwdgo nyic-nyia bog lempam naapaq pakun? Ho bulug vs-axaqkv bulug aoho haad nvi yu? Ho Pwnbov mwwg haaxaqkam vc-ai mvdwb horma dvn yv?

¹⁸Ho bulv dooi agaho am piil hvb nyidwn, hoo ampam pwd dooiyv baql wgnam hvb nyima dvn yv?

¹⁹No bedo, ‘Pwnbov bulug nyixiaqkam bulug ko tulu gab pvvl ap jipan.’ Mwam hoqham bulam jimto, ho bulv hoqham cengkam yin pv.

²⁰Bulug ocu-aiyanam mam bulug at vnyiq hoqgv kaam to, hoo Pwnbog hang lingtwrnam mam bulam twwm to.

²¹Hwdlo bulug pool tulungam mvpaq kuba lo hoggab bulv bulug wxo kokwngam bulug nombu tulungam hoocum tayin?

²²Mwv aoho doon boam pw-hwwnam mam kaalv tvl, Pwnboam hiyv cenglaqkam tomswr nyotayin?

²³Hog mwlwngv jotwl doonul hoo mwwdwq kuma tvl, mwwg gv-ngv hwngkw tvla kam nyi akv sidwn,

²⁴mwwg uppum ho gwwiyv bwwr tvl doodo hoo mwwg alo tuluho loocinv kaqma ta.

²⁵Tuugin henc-henya yvjho sidwn, ho nywywngam swwnam-geenam mam swwpa ma.

²⁶Bulv diimwrho aiyin lvkin kard kun, hoo tadorv bulam pumlup dukun.

²⁷“Kaato, noqg ngam nyimur dvb mwwnam mam la pwr-rwnam ngo cengdo.

²⁸Hoggab nulv bedo, ‘Hogloq ho lvpw atwg ko tuupwg nammv? Hogloq ho nyic-nyia bog doogw ko tombungv?’

²⁹Lamta tuluho wl doonbo nyiam nulv tox maai yv, hoo bulug swwi-swwcangam nulv loorwq maad nvi yv

³⁰ho nyic-nyia bo nyiingam dwr-kano aalam sim maadwn ho hang lingtwr de aalam mwam ywwlin maap nvi yv?

³¹Mwwg lamtangam mwwg nyuqm kaaga lo bibwq do, hoo hoggv mwv nyipa kun mwam ham jikur maad nvi yv?

³²Hwdlo mwam nyubwb jooi kun, mwwg nyubu ho rvky boam pvvdwn.

³³Ked diilum lywpangv mwam tiiswr swrwq duku; nyia ko mwlwngv mwam wmin gvdwn, hoo mwwg otuq wnboam xila kuma.

³⁴Hvnyiloqkam asar lvgab nulv hoggub ngam bet-bela nyotayin i? Nulug birwqnamv niqtuq dooma hvbmabde xaalyo do.”