Read Nyishi JOB 22 Bible Online

JOB 22 - Nyishi bible

JOB 22

¹Ho Teman nyi Elipaj birwql hoo benum:

²“Pwnbo gab nyia kov niqtuq dood nvi yv? Jvqtw jaqb hiyv pumb-rwnam hv mwwg atgab aro niqtuq doodwn.

³No kvtaq dvb nyiyi kam Pwnbov hemp dvn yv, ho noqg lamtangv timb dvb nyima yin hoqhv mwwg gab niqtuq dood nvi yv?

⁴Noqg mwam bosko gab yv mwv nam yolu ruqdwn hoo noqg lvgab pw-hwwnam mam haam dvn?

⁵Noqg alman naleqgo nyigam gab maai yv? Noqg nyimurnamv nyitwr dooma dvn.

⁶Hoggab pagoq doomab noqg vbw-bor tulug dingrnam mam no jot kvl dvb naapa ku hoo bulug vjam twqbin xaal talo dvb mvpa ku.

⁷Nyelinl laanyi maanboam no iss twwdwb jima, hoo kano boam dvs jimab no parl ap paku.

⁸Nyiv huqlw lvgab gvdangam gumn doogdvn, hoo hoqho doonbo nyiam mwwsw dvn.

⁹No xwwmy tulungam asarb kanam nampaq paku, hoo ab dooma laqpo tulungam mwmwq paku.

¹⁰Hoqgab noqg taqg-loosaqb pwd-potongv mvp paku, hoo haqma paqb bosnamv nam tumlup do,

¹¹ho kan twdwqnum, hoqgab no kaapa kuma, hoo diidwr issiv nam tolup paku.

¹²“Pwnbov doa tol ao maad yv? Kaaka to mwlwngam ao yaanbo takar tulungam, bulv hog hwdgo aotv doodo!

¹³Hvbmabde no begamv, ‘Hoggv Pwnbov cengdwn? Mwv kan twdwqkam kaapeql pw-hwwnyi dvn yv?

¹⁴Mwam jwwkam bo doomwq tulungv putum pa, hoqgab mwv kaapa ma, hoo mwv doa nvg naakap aotol wdwn.’

¹⁵No kolwg nyic-nyia bo nyi tulug lamta wkam wta nvi yv?

¹⁶Bulug moodv haama taab bulam naareqnum; bulug gwwlam nuuxaqnum.

¹⁷Bulv Pwnboam benum, ‘Ngulug soqgv wleqto,’ hoo ‘Pwnbov ngulam hoggv nyila tan?’

¹⁸Hvbsujaqkam albo lvgab dupum-dvrab pam bulug nam tuluho bwwr mvnum— hvbmabde nyic-nyia bo tomswr-honynamv ngoqg hoqgv aado do.

¹⁹Nyedar bov ham kaatwl hoo hemp dvn; nyiinyongv nyi akv bulam bej-bepar do,

²⁰begamv, ‘Jvqtw jaqb ngulug ceebio tulungam mvpaq paku, hoo hoggv bulv apaqnum ham wmv dvmeq paku.’

²¹“Pwnbo lvgab loomin gvto, hoo swrsob dooto; hoq lvgab albov noqgab haatayin.

²²Mwwg agam hoqgv tomswrnam mam svgagvrwq to, hoo noqg hvvjw ho mwwg gomcwr tulungam pvvcumto.

²³No Pwnbo dookub hookur baloqkam; noqg tombu hoqgv noqg lootwb nyimanam mam aadob mvpaq baloqkam mwv lokta nam mvdar tayin,

²⁴no hunam diimwr ho pvvbnyiloqkam, hoo Opir hunam suduq duql ko wlw lwwtaq pengko ho pvvbnyiloqkam,

²⁵ho Pwnbov noqg hunwb hoo noqg xinam rup gob nyitayin.

²⁶Hoggab no Pwnbo uraho no atv hemp tayin hoo noqg nyuqmv Pwnboam nywdul kaatayin.

²⁷Noqg swgwnam mam no mwam swgw tayin, hoo mwv nam tapa tayin, hoo noqg dingrnam mam no jitayin.

²⁸No pagoq akam goobwq tayin, hoo hoqhv noqg gab mvp jitayin, hoo noqg lamta tuluho hutongv huutayin.

²⁹Hoggab hwdlo bulv nam yanwl good nyiloqkam, ‘Hoqhv largam gab’; hvbmabde laanyi maanboam mwv ywwlin dvn.

³⁰Mwv nyi nyiinyo maanam kam ywwlin dvn, hiyam noqg dvrwqbo alaq hoqgv ywwlin tayin.”