Read Nyishi JOB 23 Bible Online

JOB 23 - Nyishi bible

JOB 23

¹Ho Job birwql hoo benum:

²“Soolo kam ngoqg sornamv kacaq dvn; ngoqg sigin ko pagoq gab ngoqg alaqkv vgw do.

³Oa, ngo cengnyi loqkam hoglo mwam ngo kaapa tayin, ho mwwg dook hoojaqkam ngo haanyi tayin!

⁴Mwwg agaho ngoqg bvrwqkam ngo pvvp nvpv hoo ngoqg agam lvgab ngo xumt dvb haqmin sud nvpv.

⁵Ngo cengd nvpv hoggv mwv ngam birwq dvn hoo mwv ngam hoggv bedwn ham ngo cenglaq dvn pv.

⁶Mwwg vc loodab huqlwngam mwv ngam ceeko dvn yv? Hvbma; mwv ngam ruucw kwrgab dvn pv.

⁷Nyedarbo nyiingv mwwg lvgab haqmin sud nvpv, hoo ngoqg nyegam lvgab nwrba xaqb ngam apaq jip kun pv.

⁸“Kaato, ngo otuqb wdwn, hvbmabde mwv ho dooma do, hoo kokwb wnam, hvbmabde ngo mwam hempa ma;

⁹hwdlo mwv laqc taqc ho bon nyidu yin, ngo mwam kaapa ma; mwv lvqbwq taqcib wyin, hvbmabde ngo mwam kaapa ma.

¹⁰Hvbmabde ngoqg lamta wnam mam mwv cengdwn; hwdlo mwv ngam pooka yin, ngo hun hvb lengtayin.

¹¹Mwwg dwqkapam ngoqg lvpiangv dwqxaq maab dwqmin gvpa kun; mwwg lamtab ngo wpa kun hoo wxaq maab wpa kun.

¹²Mwwg nvbcwr hoqg gamlam ngo nyixiaq maab nyipa kun; ngoqg dvs-twwsam xibin yaadwb mwwg agam gomcwr tulungam ngoqg gumn gob pvvpa kun.

¹³Hvbmabde mwv nywywngam kwly maadwn, hoo hiyv mwam tobkur dvb mvnyi tayin? Hoggv mwv mwwby dvn ham mwv nyidwn.

¹⁴Hoggab mwv hoggv ngoqgab xuqp pan ham mwv nyiyum tayin, hoo soq svk pagoqkv mwwg dumpo lo vigo doodwn.

¹⁵Hoqgab mwwg dooba ko-gab ngo vc loodab bosdo; hwdlo ngo mwwka yin, ngo mwam bos looda do.

¹⁶Pwnbov ngoqg hvvjwngam swnyiq-svnyiaq dvb mvpa ku; Pwnbov ngam vc loodab bos mvpa ku;

¹⁷hvbsujaqkam kan twdwq ko-gab, ho ngoqg nyuqm mam kanv twngw-manga dvb pulup sujaqkam ngo cooikab dooma.