Read Nyishi JOB 24 Bible Online

JOB 24 - Nyishi bible

JOB 24

¹“Pwnbov hog nyitwl pw-hwwnam moodam pvvmanum, hoo hog nyitwl mwam cengn bo nyiv mwwg aalam nywywngam kaapa maadwn?

²Nyi tuugin gvda nvvram muk-mvya dvn; bulv sibin-sviyangam naareq dvn hoo bulam sol doogdvn.

³Bulv ab dooma bo svdam tulungam ruqpaq dvn; xwwmy tulug svv hvvb huta taan nanam bulv naadwn.

⁴Bulv jwwgw boam lamta hoqgv tuupaq dvn; swcw soqg jwwgwbo mwlwngv atv kvs sudwn.

⁵Kaato, diixa-rara lo nyoro svdam tulu hvb jwwgw bov hentwr henl bulug dvsam meegaq taab lvvgwb wdwn; bulug ko hury gab dooxa bo gvdangv dvs aaxiam xiij dvn.

⁶Bulug dvsam bulv rongo lo laqjo jool nookum dvn, hoo nyic-nyia bo roo boolu hoqgv bulv aaxiam pukum dvn.

⁷Ai yupwngam vj pamab talo tvl bulv yubdwn, hoo swkwr jaqkam vj pams dooma.

⁸Bulam puutug nyodongv juja dvb hoiyaq do hoo nam dooma ko-gab wlw lwwpwq ho cwwgw do.

⁹(Ab dooma bo kongam oc hoqgv twqreq xaagdo, hoo bulv jwwgw boam ceekol dingrnam ak naado.)

¹⁰Vj koomab bulv talo tvl wdo; kano tvl, bulv am iginam baqdo;

¹¹bulv kutiam nyic-nyia bo olib hoqgv mvlin do; bulv roo ala raxorl ralinko ho rasdo, hvbmabde hentwrl hvngwr do

¹²Bopam hoqgv siriq tanbov sigin ginlin do, hoo un gvnbov svka gab xabdo; hvsjaqkam nyi akkam nyimur hvl Pwnbov bema.

¹³“Hoqg lamta tulungam pwbw maagam gab, hutongam ceekol taleq bov doodo, hoo hoq lamta tuluho doomabv.

¹⁴Hutongv lengma taab nyi mengn bov daqrab do, ho mwv jwwgw boam la dwc-twwpw maanboam mengkam yin pv, hoo aiyam mwv dvcobo ak hvb nyidwn.

¹⁵Bwwxin bo vnyiqkv ariyum jij-mam mood gab kaaya yaal doodo, begamv, ‘Hiyv kam ngam kaapa ram’; hoo mwwg nyuqm mam mutum dvn.

¹⁶Kanam bulv nam tulub roqkol haadwn; aalam bulv atv cwqtum tvl doodwn; bulv hutongam cengma dvn.

¹⁷Hoggab bul mwlw gab kan twdwqkv arkomc gob nyidwn; hoggab bulv vc loodab bos dvb kan twdwq bo lvgab ajin dvn.

¹⁸“No bedo, ‘Bulv iss aoho nyebia loodab xardwn; gvdaho bulug naady sanamv beenam gob nyidwn; bulug roo boolu daiyab bon nyinbo akkam wma.

¹⁹Jwwxa xaanam mvla oggv tapam issam xvvtwr gvnkun; hoqhvb kalam nyic nyin boam Sux-ywlwb naag nukun.

²⁰Ko bwwnbov bulam mwwpa kuma; tadar gab bulv tiiswr nukun; bulam lokam mwwpa kuma, svvn dwrnam hvb nyic-nyia bo dwrtu nukun.’

²¹“Bulv twrngum bo, ko dooma bo dvnam nyimur pa, hoo xwwmiam alwb nyima.

²²Hvbsujaqkam Pwnbov mwwg huqlw hoqgv koibo swwgam swwiyu mvdwn; hwdlo bulug swwgv niqtuq dooma yin bulv daqrab dvn.

²³Bulam mwv swrsob swwm dvn, hoo bulam svka dvn, hoo mwwg vnyiqkv bulug lamta ho tuugab dvn.

²⁴Anyo mood go bulam yuudwn, hoo bulv wpaq dukun; bulam akob mvl dvn hoo asaqkam nookum namhvb nookum dvn; bulam am vmlyw geqnam hvb geqpaq dvn.

²⁵Hoq hvb nyima nyiloqkam, hiyv ngam vm mvvn gob bela tayin hoo hoggv ngo benam hoqhv niqtuq dooma hvl hiyv kaakin nyotayin?”