Read Nyishi JOB 27 Bible Online

JOB 27 - Nyishi bible

JOB 27

¹Hoo Job lokta mwwg goosam goodwb nyinv hoo benum:

²“Pwnbov swwl dood deedib, ngoqg nyidy sanam mam hiyv naapaq tayin, hoo Pwnbov, ngoqg yvjam hiyv kacaq dvb mvpa kun,

³ngoqg uraso ngoqg saqnamv, hoo ngoqg nyupum saqnam so Pwnbog yalv dood deedib,

⁴ngoqg nvbcwrv vm mvvl agam gooram, hoo ngoqg lyolv xaalyongam belin ram.

⁵Nulv kvtaqdo hvl benam sam ngoqg soqgv aado mvto; ngoqg sinam xaqb ngoqg hoqgv ngoqg lootwngam ngo apaqram.

⁶Ngoqg nyedar nyinam mam ngo nootul doog tayin hoo ham wleq mvram; ngoqg hvvjwngv ngoqg swwde aal tuluho ngam benyi-beya ma.

⁷“Ngoqg ceebiongam nyic-nyia bo hvb nyimto, hoo hiyv ngam ceekol daqrab boam nyiidar nyiib nyim mvmabv.

⁸Hoggab hwdlo Pwnbov mwwjw maanbo mvpaqyin, hwdlo Pwnbov mwwg swwgam naapaq yin mwwgwngv hoggv?

⁹Hwdlo mwwg aoho vs-axaqkv haaikam Pwnbov mwwg xabnam mam tata yin yv?

¹⁰Pwnbon mwv hemp mwwpa tan yv? Mood lwxiam mwv Pwnbon goqtayin yv?

¹¹Pwnbog alaq pagoqkam nulam tomswr tayin; Pwnbo lvgab hoggv doodwn ham ngo mvpaq jiram.

¹²Kaato, nulv mwlwngv atv kaapa ku; hoggub nyitwl nulv lvkin gob niqtuq doomab nyidkun i?

¹³“Soq si nyic-nyia nyi akwg Pwnbo hoqgv naady sanamv, hoo nyijab-nyiyiqbo tulug Pwnbo hoqgv otu naady sanamv:

¹⁴Mwwg ko huriv mvqlw baloqkam, hoqhv lyoqr niqtuq gab, hoo mwwg hotamv dwc-twwpw ram.

¹⁵Swwl doon boam dwr-kanob sitayin, hoo mwwg xwwmy tulungv mwwdwql xabram.

¹⁶Rupam mwv diimwr hvb yaqcal ap sujaqkam, hoo vjam ked hvb paacal ap sujaqkam,

¹⁷mwv paal ap sutayin, hvbmabde nyedarbo tulungv ham kootayin, hoo nyi nyiinyongv rupam naapin-naara tayin.

¹⁸Mwwg nammam tvqngin pwnam hvb pwdo, rvky bo akwg taabo ak mvnam hvb mvdo.

¹⁹Mwv kartamho nyetwb wdo, hvbmabde hoqhv oyu go nyidu ram; ho mwwg vnyiqkv mwv nyiqbio yin, hoo mwwg gumnv dookma.

²⁰Diidwr iss hvb mwam vc loodab bosnamv mviya paku; aiyam cwkeq-lvmeq dooiyv mwam baqpaq paku.

²¹Dou-cagag dooiyv mwam nuurabnum hoo mwv dook ma; hoqhv mwwg dook hoqgv mwam nuupaq paku.

²²Mwam anya kaasar dvb leql wgdo; hoqg ator hoqgv mwv hoggub nyijaqkam keleqdvb nyidu do.

²³Hoqg alaqkv mwam cupup jido hoo hoqg nyook hoqgv mwam su-su twqb miqyaqdo.