Read Nyishi JOB 29 Bible Online

JOB 29 - Nyishi bible

JOB 29

¹Hoo Job lokta mwwg beg xwwnam xwwrabl, hoo benum:

²“Oa, ngo pool barg gob akam nyiloqkam, otuqg moodho Pwnbov ngam rvkil doognam hvb nyiny loqkam,

³hwdlo mwwg lempam ngoqg dumpo lo huuiyikho, hoo mwwg huto hoqgv ngo kan twdwq ho wpeqnum,

⁴ngoqg xinam moodho, hwdlo Pwnboam ajinamv ngoqg tombu ho doonum,

⁵hwdlo Pwnbov ngoqg lvgab dooxiq yikho, hwdlo ngoqg ko tulungv ngoqg taqg-loosaqb dooyikho,

⁶hwdlo ngoqg lvlam dwqkap pam gwwi lvgab hwrxaq yikho, hoo wlw lwwtaqkv ngoqgab kutiam toolin jinum!

⁷Hwdlo ngo bopam toggoqg lvvgwb lengyikho, ngoqg dootam mam deela mwlwho mwx-mvaq ap yikho,

⁸nyega yaapangv ngam kaapel hoo daqginnum, hoo nyi nyiixangv gorabl hoo daqnum;

⁹lvpw atwg ko tuup tulungv agam goongo tvl romonum hoo bulug agam mam bulug alaqkv mompiumnum;

¹⁰ho xinam nyi tulungv yal dulin maab doonum, hoo bulug lyolv bulug wtw kobdu ho tiqku tvl doonum.

¹¹Hwdlo nyurungv tapa yikho, hoqhv ngam xinam jaqkv hvnum, hoo hwdlo vnyiqkv kaapa yikho, hoqhv loomin gvnum,

¹²hoggab jwwgw bov svka gab xabyikam ngo ywwlinum, hoo ab doomab mwam svka bo akkam dooma boam svkanum.

¹³Yuupaq tanbo nyiig lvqcnamv ngoqg dookub haanum, hoo xwwmy tulug hang lo hemp beminam bem dvb ngo mvnum.

¹⁴Ngo nyiidaram koonum, hoo hoqhv ngam koomnum; ngoqg lootwnamv kamt koonam hvbla bopya gvnam hvb nyinum.

¹⁵Nyiqca bo gab ngo vnyiqb nyinum lutubo gab lvpiab nyinum.

¹⁶Pwwma-cimabo gab ngo ab gob nyinum, hoo ngo mwam cengma sujaqkam ngo mwwg pagoqkam hwwgaqnum.

¹⁷Nyiidar maanbog kiil tulungam ngo mwtwrnum hoo mwwg exy hoqgv mwwg citu kunam mam mwv gampaq mvdwb mvknum.

¹⁸Ho ngo mwwnum, ‘Ngoqg osup so ngo sitayin, hoo ngoqg swwnam aalv xuqx hvb naleq nyitayin,

¹⁹ngoqg rwbv iss aoho maaggaq tayin, ai mwlwho ngoqg haqb ho gumsiv dootayin,

²⁰ngoqg yuunamv ngam hwrcw mvtayin, hoo ngoqg alaqlo ngoqg illiv lwwxa-misuq tvl dootayin.’

²¹“Nyiv cooikab dootwl hoo ngam taiya tayin hoo ngoqg tomswr-hony ko-gab cooikab dootayin.

²²Ngo gooxo kokwngam bulv lokta gookram, hoo bulug aoho ngoqg gomcwrv hodaq tayin.

²³Nyodongam kaayanam hvb bulv ngam kaaya tayin, hoo dug poolam nyodo hoiyaqnam hvb bulug agam mam gamkaq tvl dootayin,

²⁴Hwdlo bulv atam mwwjw maaikam ngo bulug aoho nyirs puiyum mvtayin, ngoqg hwrcwnam nyuqmv bulam hang hom mvma tayin.

²⁵Ngo bulug lamtangam xuqnum hoo peelo bo hvb dootayin, mwwg sipai tulug pengko ho ngo lvpw at ak hvb swwtayin, nyix-riinbo tulungam bet-bela bo akgob nyitayin.