Read Nyishi JOB 3 Bible Online

JOB 3 - Nyishi bible

JOB 3

¹Kokw so Job mwwg agamv gamkoq banv hoo mwwg dwrbuqd aalam beenum.

²Hoo Job benum:

³“Ngam dwrbuqd aal ham, hoo nyi akam ko gvrabnam, ai ham yuupaq mvto.

⁴Hoq aal ham kan mvto! Hoq aal ham Pwnbov meegaq maabv, ho hoq aalam huto huum mvmabv.

⁵Hoq aal ham muqsw rwbwl hoo kan twdwq mvto. Hoq aal ham doomwq pulup mvto; hoq aal ham kan twdwql bosnam dvb nyim to.

⁶Hoq ai ham—kan twdwqkam naareq mvto! Hoq aal ham vnyw pengko hoqgv hwnyir-cojor namgub nyim mvmabv; hoq aal ham poolwg aal uraho haam mvmabv.

⁷Kaato, hoq ai ham twrngum mvto; hoq ai ham hwnyir-hvmarnam mam haam mvmabv.

⁸Been boam hoq aal ham beem to, hiyv Doojw-buram dogoq goqrab dvb ator doodwn.

⁹Hoq huur-mumur takar tulungam kan mvto; hutongam hoq hoqgv mwwgwnam, hvbmabde akkam doomanum, ho arwg nyiqbar tulungam kaapa mvmabv,

¹⁰hoggab hoqhv ngoqg annwg mambam mutum maanum, ho ngoqg vnyiq soqgv vs-axaqkam kvs maanum.

¹¹“Hog gab ngam ko bwwyikho simanum, mamb hoqgv lengda kalam sima namyu?

¹²Hog gab ngam lwbw kumbwl nvvrwq namyu? Ho hog gab ngam gwwi twwm namyu?

¹³Hoggab hoqho ngo sinyi loqkam sija ngo cooikab dood nvpv; ngo yubk ban pv; ho ngo doonu pak nvpv,

¹⁴swcw nvg lvpw at tulu ngvla tomswr-hony bo tulungv hiyv yuupaq kunboam bul atgab pwdar bo hvb,

¹⁵ho maalo lvpw atwg ko tuup tulungv hun lvgab doonam hvb, hiyvg nammam rup lvgab bwwr dvb mvtwl doonam hvb dood nvpv.

¹⁶Ho maalo ngo hog gab ko bwwma tanam hvb kvsil doomanum, ko hoiyinv nywywngam huto kaaka maanbo hvb nyima namyu?

¹⁷Hoqho nyic-nyia bov vs-axaqdvb nyila kuma dvn, hoo hoqho nyelin bov doonu dukun.

¹⁸Hoqho pvtwq tumnam nyi tulungv lvkin gob nyiidkun; hoqho bulv kanam namnbog yalam tapa kuma dvn.

¹⁹Hoqho anyo ngvla koiyv doodwn, hoo raasurv mwwg nyiit at hoqgv poopwb swwd kun.

²⁰“Hiyv vs-axaql swwdu boam, hog gab mwam hutongam jipa kun, hoo kacaq-bviyaqbo yvjam swwgam jipa kun,

²¹hiyv sidwb mwungnum, hvbmabde sigv haamanum, hoo hoqham gumn liipaqnam mam dugaqnam hwdgo meegaqnum,

²²hiyv vc looda hwnyir-hvmar dvn, hoo hemp-hvnyirnam dvn hwdlo bulv nyubungam kaapayin?

²³Hiyam Pwnbov gooyum kunam, nyi akwg lamtangam kvsnam mam hog gab hutongam jipa kun?

²⁴Hoggab ngoqg dvs kwlib ngam nyix-riinamv haado, hoo iss toolinam hvb ngoqg sigin ginamv gingdu do.

²⁵Hoggab ngoqg bosnam pagoqkv ngoqg aoso haado, hoo ngo hoggam bosnum hv ngam haapa ku.

²⁶Ngo swrso kuma, ho cooikab doola kuma; ngo doonu lakma, hvbmabde vs-axaqkv haado.”