Read Nyishi JOB 30 Bible Online

JOB 30 - Nyishi bible

JOB 30

¹“Hvbmabde hiyv ngam bor yaanbo nyiingv, hiyv iky lvgab ngoqg sviyangam kaaya bog, ab tulungam ngo ximanamv sija bulv ngam nyirj duku.

²Hiyv nyi atorv wpaq kun bo hoqgv hoggv ngo bulug alaq ator hoqgv ngo niqtuq kaapa tayin?

³Vc loodab daagabl hoo dwnw-twwnwl kanol ho dooxa bvla deexa-rara deela ho bulv aiyam sengn bo rwbam nyaml dvnum;

⁴bulv kwcwqbo nwmwngam la miidwram pul dvnum, hoo taja svmpwqg rwbv bulug dvs gob nyinum.

⁵Bulam nyia ko dvpar hoqgv ruqpaq kunum; bulam bulv dvcobo akam sogoql ruqnam hvb ruqpaq kunum.

⁶Bulv iss tokoqko deeroq ungho, ho gvdag ung tulu hoola wlw lwwpwqho doogwnum.

⁷Bulv puum pengko ho sogoq goqg gaqnum; pos-poi sotaqho bulv lvkin gob pumkuml doonum.

⁸Mwwlaq looda maanbo, emin dooma bo imiq dvpar, bulam gvda soqgv ruqtwrl ruqpaq lengnum.

⁹“Hoo ngo sija bulug bemin gob nyipa ku; ngo bulug gomcu gob nyipa ku.

¹⁰Bulv ngam oyum do; bulv ngam aadob pvvgin do; bulv ngam tacor curxab dvb hog gokam mwwma do.

¹¹Hoggab Pwnbov ngoqg osongam toosuq paku hoo ngam yan dvb mvpa ku, ngoqg agaho bulv ngam mvturl joopaq paku.

¹²Ngoqg lvqbwq tac ho nyiilungv daqrab do; bulv ngoqg lvpiangam tuupaq do; bulv ngam ceekol bulug twrtanam lamtab joopaq do.

¹³Bulv ngoqg lamtangam mvpia do; bulv ngoqg hentwr-kaasam koi yaiya dvb mvdo; bulam nyi akkam svka nyima nyikma.

¹⁴Utbo ung hoqgv bulv haado; vmwq-akaq mvk pengko ho bulv duqlwqdo.

¹⁵Bos looda dvb nyinamv ngoqg aoso haado; ngoqg xinam-paqnam sam dooi lvgab ruqmin gvdo, hoo ngoqg swwn-geenam mam doomwq wrnam hvb wrpaq paku.

¹⁶“Hoo sija ngoqg yvjv ngoqg ura soqgv tooxa paku; hentwr-kaasv ngam nootul ap paku.

¹⁷Aiyam ngoqg alongam dvc cil kwrdo, hoo dvc cil vcnamv ngam doonu mvkma.

¹⁸Koi jaqb vc hoqgv ngoqg vjv nyadku; hoqhv ngoqg lwwpo lo vj tulwqnam hvb ngam hoqtu paku.

¹⁹Pwnbov ngam suiyu urab joolwq paku, hoo ngo diimwr hvbla wm mui hvb nyipa ku.

²⁰Nam ngo svka gab xabnam hoo no ngam birwq maanam; ngo daqnam, hoo no ngam kootul kvvtwqnum.

²¹No ngam kwc-kvra nyipa ku; noqg alaq ator hoqgv no ngam raql-parl ap paku.

²²No ngam dooi aob joorab paku; hoqho no ngam xarm do, hoo doogum-dooi ho no ngam hurcal hurlwqdo.

²³Hoggab swwl doonbo mwlw gab xuql ap kunam namho ngo cengdo no ngam sig ho boolwq tayin.

²⁴“Hvbsujaqkam yuupaq dvb mvnam ak hv mwwg alaqkam ijinl ilin maanam, hoo svka gab mwwg ciqcaq-bviyaqho xama do?

²⁵Vs-axaq moodho ngo mwam xamanam yv? Dwc-twwpw maanbo gab ngoqg yvjv mwwdwq maad nvi yv?

²⁶Hvbmabde hwdlo ngo al gab mwwgw yin, almanv haanum, hoo hwdlo ngo huto gab kaaya yin, kan twdwqkv haanum.

²⁷Ngoqg gv urangv dwql-xaal doonum hoo nywywngam swrso maanum; hentwr-kaas aalv ngam kvvrwqtab haado.

²⁸Ngo kanho wdul doonam, hvbmabde doonyi huto hooma; ngo dookumko ho daqrabl hoo svka gab xabnam.

²⁹Ngo jekelg vbw-borv hoo mvra-kiigag ajin tulungv.

³⁰Ngoqg gv vpinv kaiya poogub nyil hoo ngoqg soqgv yaqpaq do, hoo ngoqg alo tulungv oggv rvxaml gul doodo.

³¹Ngoqg bemin benamv nyix-riinam gob nyikub paku, hoo ngoqg piul tabnamv xabnam yal gob nyikub paku.